SALMOS 149 - Icamanal Toteco

Nochi ma quipaquilismacaca Toteco

¹ Xijpaquilismacaca TOTECO. Xihuicaca para TOTECO se huicat yancuic. Nochi amojuanti animasehualhua, xijhuicatica Toteco por nochi cati quichijtoc.

² Anisraelitame, ximopaquilismacaca ipan Toteco pampa yaya amechchijchijqui. Anmasehualme ipan altepet Jerusalén, ximopaquilismacaca ipan amotanahuatijca.

³ Xijpaquilismacaca TOTECO ica mijtotilisti. Huan xihuicaca ica pandero huan ica arpa.

⁴ Pampa Toteco quipantía paquilisti ipan imasehualhua, huan quinmaquixtía cati moechcapanohuaj iixpa.

⁵ Nochi cati iaxcahua TOTECO ma paquica pampa yaya tahuel hueyi ihueyitilis. Huan hasta quema ya motectoque ipan inintapech noja ma quihuicatica.

⁶ Ma quihueyitalica TOTECO nochi imasehualhua. Quipixtoc ipan imax se macheta cati oncac tatequi,

⁷ para ica quincuepilis nopa sequinoc talme cati quinchihuilijque cati amo cuali, huan para ica quintatzacuiltis.

⁸ Ma quinilpica inintanahuatijcahua huan inintayacancahua ica tepos cadena,

⁹ para quiselise nopa tatzacuiltili cati eltojca tasencahuali. Huan ica ya ni TOTECO quinhueyitalis nochi itatzejtzeloltica masehualhua. ¡Ma nochi quipaquilismacaca TOTECO!