SALMOS 137 - Icamanal Toteco

Inintequipachol israelitame cati itztoque ipan tali Babilonia

¹ Ipan tali Babilonia timosehuiyayaj iteno hueyat, huan timochoquiliyayaj, pampa tiquelnamiquiyayaj altepet Jerusalén, huan quenicatza nelía cuali eliyaya.

² Tiquintahuelcajtoyaj toarpas huan tiquincuapilojtoyaj ipan inimacuayo nopa cuame.

³ Amo hueliyaya tihuicaj. Pero inijuanti cati techhualicaque ica fuerza ipan inintal, techtajtanijque ma tihuicaca ica paquilisti nopa cuajcualtzitzi huicat cati tihuicayayaj quema tiitztoyaj ipan altepet Jerusalén.

⁴ Pero amo tihuelque. Amo hueli tihuicase se huicat para Toteco ipan seyoc tali ica masehualme cati amo tiquinixmatij.

⁵ Sinta niquelcahuasquía altepet Jerusalén, ma quipolo ichicahualis nonejmat, huan ma ayecmo huelis quitzotzonas nopa arpa.

⁶ Sinta ayecmo niquicnelisquía Jerusalén cati techpaquilismaca, xijcahua nonenepil ma tatzqui ipan nocamachal para ayecmo nihuicas.

⁷ TOTECO, amo xiquelcahua cati nopa tali Edom ehuani quiijtojque, quema nopa soldados ten tali Babilonia quisosolohuayayaj altepet Jerusalén. Inijuanti quiijtohuayayaj: “Xijsosoloca nopa altepet hasta campa tatzquitoc.”

⁸ Teicneltzi ni tali Babilonia, pampa nojquiya quisosolose. Nelía paquis nopa tacat cati quitamisosolos huan quintzontamiltis imasehualhua.

⁹ ¡Tahuel paquis nopa tacat cati quinitzquis coneme ten Babilonia huan quinxaxamatzas ipan tet, por cati fiero quichijtoque inintatahua ipan altepet Jerusalén!