SALMOS 130 - Icamanal Toteco

Ximotemachica ipan Toteco para amechmanahuis

¹ TOTECO, quema nimopantía ipan se hueyi taohuijcayot, na nimitztzajtzilía para techtitanili motapalehuil.

² Toteco, techtacaquili quema nimitznojnotza. Xijchihuili cuenta cati nimitztajtanía huan techpalehui.

³ TOTECO, sinta tiquelnamiquisquía nochi totajtacolhua, amo aqui huelisquía moquetzas moixpa.

⁴ Pero ta nelía titetapojpolhuía, para nochi masehualme ma mitztepanitaca.

⁵ Na nimochiya ipan ta, TOTECO, para techpalehuis, Quena, ica nochi noyolo nimotemachía ipan nopa cati techtajtolcahuilijtoc ipan mocamanal.

⁶ Ipan noalma senquisa nitachixtoc para ta, TOTECO, xitequiti. Nitachixtoc para techpalehuis, quej nopa tamocuitahuiani quichiyaj ma tanesi. Quena, más nitachixtoc huan amo quej tamocuitahuiani cati tahuel quinequij ma tanesi.

⁷ Nochi anisraelitame, ximotemachica ipan TOTECO, pampa san yaya quipiya hueyi iyolo huan san yaya temaquixtía talojtzitzi.

⁸ Yaya quinmaquixtis israelitame ten nochi inintajtacolhua.