SALMOS 124 - Icamanal Toteco

David quihueyimatqui Toteco pampa quimanahui ten icualancaitacahua

¹ Nochi israelitame ma quiijtoca taya tijchijtosquíaj sinta TOTECO amo itztosquía tohuaya huan amo techpalehuijtosquía.

² Sinta TOTECO amo itztosquía tohuaya quema nopa tacame motananque para techtehuise,

³ techtolojtosquíaj tiyoltoque huan techtzontamiltijtosquíaj ica inihueyi cualancayo.

⁴ Inijuanti techhuahuatatztosquíaj quej at tatilana, huan huajca eltosquía quej hueyat panotosquía topani.

⁵ Quena, eltosquía quej topani panotosquía tahuel miyac at cati tetetztic, cati tehuahuatatza huan titzontantosquíaj.

⁶ Ma tijtascamatica TOTECO pampa amo quincahuili ma techcococa.

⁷ Quej se totot cholohua ten se taquetzti, quej nopa nojquiya Toteco techchololti inimaco tocualancaitacahua, cati quinequiyayaj techmasiltise. Nopa laso cotonqui huan tojuanti timocajque timajcajtoque.

⁸ Tojuanti totapalehuil huala ten TOTECO, cati quichijchijqui ilhuicacti huan taltipacti.