SALMOS 122 - Icamanal Toteco

Netatajtili para ma onca tasehuilisti ipan altepet Jerusalén

¹ Na nipajqui quema nechilhuijque: “Ma tiyacajya ichaj TOTECO.”

² Pero ama ya tiitztoque nica ipan altepet Jerusalén. Quena, ya ticalactoque campa icaltehua ni altepe.

³ Jerusalén quisencajtoque para nopona nochi ma mosentilica.

⁴ Nochi imasehualhua TOTECO ten cati hueli hueyi familia ten israelitame hualahuij nica sese xihuit, para quitascamatise huan quipaquilismacase Toteco senquisa quej quiijtohua itajtol.

⁵ Pampa nopona mosehuía para tetajtolsencahuas nopa tanahuatijquet cati iixhui David.

⁶ Ximotatajtica ica TOTECO para ma onca tasehuilisti ipan altepet Jerusalén. Xijtiochihua Jerusalén ica ni camanali:

⁷ “Ma itztoca cuali nochi cati quiicnelíaj ni altepet Jerusalén. Ma onca tasehuilisti ica calijtic nopa tepamit cati quiyahualojtoc. Ma itztoca ica paquilisti ipan nochi tequicalme.”

⁸ Pampa niquinicnelía noicnihua huan nohuampoyohua cati itztoque nica, niquijtohua: “Ma quipiya tasehuilisti ni altepet.

⁹ Pampa niquicnelía ichaj TOTECO cati eltoc nica, ma onca tasehuilisti ipan ni altepet.”