SALMOS 12 - Icamanal Toteco

Techpalehui, TOTECO

¹ Techpalehui, TOTECO, pampa ayecmo aquijme cati nelía mitzneltoquilía. Ayecmo aquijme masehualme cati quiijtohuaj cati melahuac.

² Se ica seyoc moistacahuíaj. Quipiyaj ome inixayac huan quipataj inincamanal.

³ TOTECO quintzontamiltis nochi cati quipiyaj ome inixayac huan cati mohueyimatij quema camanaltij.

⁴ Quintzontamiltis cati quiijtohuaj: “San ica tocamanal titatanise. Sinta tijnequij tiistacatise, tojuanti tijmatij. Amo aqui huelis technahuatis.”

⁵ Pero quej ni quiijtojtoc TOTECO: “Inijuanti cati teicneltzitzi huan cati amo quipiyaj fuerza nechtzajtzilíaj por nopa fiero masehualme cati quintaijyohuiltíaj. Yeca ama nimotananas para niquinpalehuis. Niquinmaquixtis inimaco cati quincualancaitaj.”

⁶ Nelía temachti cati quiijtohua TOTECO. Icamanal senquisa melahuac. Quena, eltoc quej se cuali plata cati quinelicxitijtoque, huan quipajpactoque miyac huelta hasta senquisa cuali.

⁷ TOTECO, ta techmocuitahuía. Techmanahuis para nochipa ica masehualme cati amo cuajcualme quej ama itztoque.

⁸ Quena, masque mosisinijca masehualme mooquichmajtinemij campa hueli huan nochi masehualme san quipatiitaj cati amo cuali, Ta techmocuitahuía.