SALMOS 114 - Icamanal Toteco

Cati Toteco quinchihuili nopa israelitame ipan tali Egipto

¹ Huejcajquiya quema nopa israelitame quisque ipan tali Egipto, campa nopa masehualme camanaltij seyoc camanali,

² hualajque huan quichijque itiopa Toteco ipan tali Judá para nopona ma mocahua inihuaya, huan nochi tali Israel eltoya ital campa nojquiya yaya tanahuati.

³ Quema nopa Hueyi At Chichiltic quinitac hualahuij nopa israelitame, nimantzi moisihuilti huan motapo para ma panoca campa tahuactoc. Nojquiya nopa hueyat Jordán motapo para ma panoca.

⁴ Nochi paquiyayaj hasta elqui quej nopa tepeme huitonque ica paquilisti quej chivojme, huan nopa taixtemolis huitonque quej pilborregojtzitzi.

⁵ ¿Taya panoc ica nopa Hueyi At Chichiltic? ¿Para ten motajcoxelo? Huan nopa hueyat Jordán, ¿para ten motilquetzqui?

⁶ Huan nopa tepeme, ¿para ten huitonque quej chivojme? Huan nochi taixtemolisti, ¿para ten huitonque quej pilborregojtzitzi? Elqui pampa nochi tahuel quitepanitaj Toteco.

⁷ Nochi taltipacti huihuipica iixpa TOTECO, yaya cati iTeco Jacob,

⁸ pampa yaya quichijqui para ipan nopa tet ma meya at. Quena, yaya quiquixti at ipan nopa tet huan mochijqui quej se hueyat.