SALMOS 113 - Icamanal Toteco

Toteco quitanana se cati teicneltzi

¹ ¡Xijpaquilismacaca TOTECO! ¡Quena, nochi amojuanti cati anitequipanojcahua TOTECO, xijhueyimatica!

² Ma tijhueyimatica TOTECO ama huan para nochipa.

³ Quena, nochi masehualme ten campa quisa tonati hasta campa oncalaqui ma quihueyimatica TOTECO.

⁴ TOTECO quipiya tanahuatili ica nochi cati itztoque ipan nochi talme. Huan ihueyitilis conpano ilhuicacti.

⁵ ¿Ajquiya seyoc más hueyi quej TOTECO toDios cati mosehuía nepa huejcapa para tanahuatis?

⁶ Tatzinta ten ya eltoc ilhuicacti huan taltipacti. Huan yaya mohuijtzoma para tachiyas ipan ni taltipacti.

⁷ Huan quitanana nopa teicneltzi cati eltoc quej masitoc ipan soquit cati huejcata. Huan cati huetztoc campa quitepehuaj tasoli quitanana huan quisehuía campa cuali.

⁸ Quena, quitanana huan quisehuía inihuaya huejhueyi tacame cati quinyacanaj inialtepet ehuani.

⁹ Yaya quichihua para nopa sihuat cati amo quema conepixqui ma quinpiya iconehua huan ichaj. Quena, quichihua ma eli se tenanti cati senpactoc. ¡Paquilisti!