Yudas 1 - ALA WENE HIVIS DIRUP WATUGWA

¹ An Yudas, Yakobus aot, Yesus Keretus ayeloman dugwit hai wakhinivisiga o. At Ala heneyanggup yukhirigya lagagirik, endawi hunik dugwit, hit Yesus Keretus ake malhenombogo agarik ako, wene yi dirup warogo henadema lakba wandiga.

² At Ala aigwak aberen okbigigu, henendawi ugun seyalek adenggen dogovovok yiluk, okbigigu, endawi hunik okhinipu, ogasiga ako, ambi inim eve iya erogo okbigigu dogopwak.

Huluk molalogo yugerelagwi avok wene

^3-4 Ai naswei nendawi hunik. An wene ambi yukherayogon. Hit ugun hinunggut hinigik, it ap Ala wene sagalisagwi menda nin henanggelekma nunggu wagu lagarwik, Ala endawi nenabwa en sek okbininaliga wene ako, avut endenogo, “Ala endawi hunik okbininaliga atma, nit weyak ogagu niniselok, anggin nenovaga bininayogonbukheda,” enendawi ninggya halok ugun-ugun ogarit lendagwi. Ogarit lagu dugwit, At Itok Agarik Nenowa Inis Ombok Yesus Keretus ako andi, “Nit Nenowa dek atma,” yiluk, yagalagwi. It andi, Ala en it weyak ogasagwi onggo enovaga bisagiluk, o muk ogarogo bogogi agarik ako, ugun inunggut dugwit, yagan nelagwi. Anderogo atma, nit nenagap wendakninipigi wene ndatak wagagup ako, an wene nggatuk erogo dirup warogo wokheraup imbiti ovara, it ap ako anderogo yagan naguselok, avyarat ombasagwi wene ambi yi, henaruk warigiluk dirup warogo wokheraliga. Wene yi, At Ala en o endak nit At aburi ake denek mondok-mondok andok okbininggigi wene ako, weyak erogo hekbagu hinisaoen, “Yi Ala wene atma, weyak erogo babuk o,” yiluk, henendawi mondok wadokdek dugwit vagago dogovovok yiluk, dirup yi, warogo wokheraliga.

⁵ O endak, Nenasin Ala en it At aburi Iserali menda o Mesir en enagap wendarogo woginiviluk wulu wagya dugwit, andien, it nin andi avyarat embetetekma, Ala en initu dugwit, mondok degerogo bogogi. Wene ako andi, hit endak henaruk hunggugup ovara, henape wenggelek dogovovok yiluk, ambi inim yukheraliga.

⁶ Eke, At Ala en it malaikat nin, “Yerogo ogagu dogones o,” yiluk, o andok okbogogi hegek, “O yi adigat andok dogop nenanggon,” yiluk, hekbagagwa. Hekbagu lagagwama, At Ala en, “Eve iya menda ogarugwis ako vaga enowak dilogo weyak ogasagwi onggo enovaga bisagwis,” yiluk, eneyave mondok-mondok mbusi heda vaga magago o hwiserekma mabogogi agarwik ako, henape wenggenggu dogones.

⁷ Eke, it malaikat okbogogi ako ndatak, it avakwa o Sodom inim, o Nggomora inim, yi kota ndi kota avilis-ambot welagagwa ako inim, avakwa ugun oginivit lagwi, enendawi weyak ogarup oginipu halok ogasagwidek menda hegek ugun-ugun oginivit lagwi, ogagu lagagwama, “It avakwa weyak ogaguselok, Ala en hali abya nagaup yagaligadekma mondok-mondok lakbisayogon-at helagwi,” yiluk, ninilup arupwak yiluk, hali vaga initigi.

⁸ Anderogo wane-wane, it ap huluk molalogo yugerelagwi menda henanggelekma nunggu wagao ako andi, nogo-nabi vaga hugu lagarwik, ogasagwidek menda hegek ugun-ugun oginivit lagwi, Ala wene hunggu dogop “Nenanggon o,” yiluk, weyak erogo hekbagwi, eke, it enagayuk werek winimen vaga agarwik menda ako ogo, wiyiknom-weyaknom erogo bugwis, ogarit lendagwi.

⁹ At malaikat Ala en yonggo lakbisa wandiga menda enowa ombok Mikael akoen, it ap anderogo ogasagwi andi hak ogarup alon welagagi. Aren, Musa hambigya lagagimu, Sile iperen, “Eyave an hedaup hat hedaup,” nidi-hidi yugu dugwit, at Mikael en Sile wiyiknom-weyaknom erogo yugurup embetetek ovara, “Nasin en adigat mbethirupwak,” yiluk yugogogi.

¹⁰ Anderogo ovara, it ap henanggelekma nunggu wagao andi, wene adem des erogo inunggut hegek wiyiknom-weyaknom erogo bagu dugwit, yangge endawi dek en ugun ogarit landiga hak, it anderogoat enendawi weyak ogarup oginipu halok ogarit laup ako adigat inilup dugwit ogarit lendagwi atma, eneyave-at degerogo betelagwi.

¹¹ It ap huluk molalogo yukherelagwi menda ako, anggin enovaga arugup! Iren o endak at Kain ogagagi ako wane-wane ogarit lendagwi. Eke, ap Mbileam weyak ogagagi ako hak, it ogo enendawi dek ovagak yoparip hedaup adigat enape wenggelek dugwit musek lendagwi. Eke, ap Kora aori inim Musa wene weyak erogo hekbagu lagagwama, Ala en enelose degerogo bogogi ako hak, it ogo wane-wane eneyave degerogo betaguluk, okhedegek lendagwi.

¹² Hit nendawi-hendawi hunik vaga erom naguluk, wongganggusim, it ap andi enanggadidek dugwit, “Nit adigat nasogom,” yiluk, milo-milo nelagwi atma, yum eve mudu sek hegek, agakoma weyak mudis lobalek agarik ako hak dugwit, ogasagwi. It andi, musu nenggetek ovara, havut en enam warogo wolok naliga andi, irat. Yo enggen eve yupwak yiluk, awi yasagwi ovara, enggen yup amor ari wagyaim, enggen eyave yigitek angga mudu hale iri halok, henogo bagarwikmu, mondok mbuk asiga andi, irat.

¹³ Is laut ombok yanggadekma mogoliluk navunak-kavunak ogagya dugwit, owarilagap en imunup bawilisiga hak, it ap andi, enanggadidek dugwit anderogoat ugun-ugun ogarit nelagwi. Eke, dadiwap nin enavoloma hunik inigik, it nin yegebeya herek damok yagan ugun higilogo ari wilisiga hak, it anderogo ogasagwi atma, At Ala en o hwiserekma mondok-mondok dogopwak yiluk, ovok enake wererogo bogogirikmu agarik.

¹⁴ At Adam ombawi endaklarit wulu wagu dugwit, elap 7 vaga Henok endaklagagi ako, it ap henanggelekma dugwit yagan nelagwi ako enavok Ala en Henok yugugu hegek aren avakwa yugirigya dugwit, “Nenowa Inis Ombok en At eyaganggom ake denek malaikat eneyave wisane ininggis dinggilup meyan ako, At inim wambu warusogom.

¹⁵ Wambu wagu dogomundik, Ala en it avakwa ovok erogo enowak dinggu dugwit, it avakwa Ala eve enanggon ombasagwi menda, yi weyak ndi weyak ogasagwi ako anggin enovaga bugu, it Ala enanggon ombasagwi menda en weyak ogagu dugwit enane wiyiknom-weyaknom erogo belagwi ako, anggin enovaga bugu, okbisayogon o,” yiluk, yagagi.

¹⁶ It ap huluk molalogo yukherelagwi menda akoen enanggin-enanggon yugwi, it nin meyan erogo bugwis, ogarup enendawi ninggya halok adigat ogarit nagwis, wogobategek nagwis, enangge-enangge hedaguluk, enane agil-amok vaga yagan nagwis, ogasagwi.

Henape wenggelek dugwit, ogagu dogop wene

¹⁷ Anderogo ovara, naswei o. Hit an nendawi hunik agipik atma, wene ambi yukherayogon. It ap Nenowa Inis Ombok Yesus Keretus en lakbigik menda mendok okbogogi akoen wene endak yukhirugu lagagwa ako henape wenggenggu dogones.

¹⁸ It akoen hit yukhirugu dugwit, “O hivis atok vaga it avakwa Ala eve enanggon ombasagwi menda akoen, enendawi ninggya halok ugun adigat ogarit lagu dugwit, hit wiyiknom-weyaknom erogo bigigaup ako sigam ari warisogon o,” yiluk, yukhirugu lagagwa ako, henape wenggenggu dogones.

¹⁹ It ap andi, Ala Averiniki enendawima dekma, wen vaga menda adigat enendawi ninggya halok musek lagu dugwit, Ala aburi sek dambulik werekma adik-adik ndindis erogo bigik lendagwi irat.

²⁰ Anderogo ovara, naswei nendawi hunik hit andi, henendawi hoda arupwak yiluk, wene eve adik denek hit avyarat umbutugup wene ako adigat ogarit lagu dogones. Ala Averiniki henendawima dugwit samban ogagu dogones.

²¹ Anderogo ogagu dugwit, Nenowa Inis Ombok Yesus Keretus aigwak aberen mondok-mondok niniluk dogomenda okbininaup ako, okbigigapwak yiluk, abyam dugwit, Ala endawi hunik okhinivisiga ako okbigigik adigat ogagya hugu dogovovok yiluk, okhidugu dogones.

²² It nin enendawi mberen halok andi, henaigwak aberen sagain erogo yugurugwi,

²³ it nin hali abyama nunggugusim, enagap wendaruguluk nggigilogo wibisa wagwi, eke, it nin andi, enendawi ninggya halok amusek lagu dugwit, yum mudu sek hegek, agakoma mudis lombalisagwi andi hak it weyak ogasagwi ako agoda werek atma, hinim dambunggu hinisaoen, “Nenalon o,” ombasagwi ovara, hegek, henaigwak abet erogo yugurugu dogones.

Atok vaga heyaga wakbogogi wene

²⁴ At Nenasin Ala nenagap wendarisiga menda akoen nit avyarat ombasagwi ako hekbaluk, adik ambi ogarit lagu ninisaoen, nenabyam des erogo agarik. Andien, hivis At, “Hit wene ambi henovaga agetek atma, nadema yenam mendek yimanes o,” yiluk yuknirigya dogomima, nenendawi adenggen embetek At mondok siyalek agarik adema mendek yi laguluk, wokniniviluk binina layogon.

²⁵ Nenasin Ala en Nenowa Inis Ombok Yesus Keretus ogagagi vaga nenagap wendasiga menda ako, At adigat mondok iya, inis ombok, anye wisane, yi menda ndi menda ovok At avema bininaliga atma, o endak inim, o yogak inim, o hivis inim, At inis adigat adup ogagu dogopwak o! Amin.