Yohanes 9 - ALA WENE HIVIS DIRUP WATUGWA

Ap il mbuk sek ogagagi wene

¹ Andien, hivis, At Yesus suvaga lagya dugwit, ap ambi isa agaum elola en itok il mbuk endaklagagi ako hagagi.

² Higya lagagimu, At Yesus ane welagwi menda en At yugugu dugwit, “Ngguru wai! Ap yi, at weyak ogagagi vaga il mbuk endaklagagi a, ata at asin-isa weyak ogagagwa vaga il mbuk endaklagagi a?”

³ Yugugu lagagwama, At Yesus en yugirigya dugwit, “Dek. At weyak ogagagi vaga inim, eke, asin-isa weyak ogagagwa vaga inim, il mbuk anderogo endaklagetek. Ata, At Ala ogasiga ako yedok hapwak yiluk, il mbugat endaklagagi.

⁴ O hup arup vage horok ari wandiga. O hup yavup ogarup meyan atma, ao ari wagetek hegek, At lakbani wagagi ogarup ombasiga ako, o awiya vaga mbikirat ogagu dogosogom.

⁵ An o wen vaga yoma dugwit, avakwa ovok erogo awiya oginivisiga menda An aro.”

⁶ Anderogo yugirigya lagagirik, At owaris wen vaga suvutbaluk, isaben okbagya lagagirik, ap ako il vaga lobabagagi.

⁷ Lobabagya lagagirik, “Avyak! Hat is yanggadek Siloam hurilak.” Yugugu lagagimu, hurilagya lagagirik, il sek akluk wagagi. (Is yanggadek Siloam yagagi ako, nit nenane vaga, inis Lakbagagirikmu, aro.)

⁸ Ap ako wagya lagagimu, at inim agarwik menda inim, it nin at endak ambenggino iri hugu lagagwa ako inim, yugu dugwit, “Ap yi, horaik dugwit, ambenggino iri laga ako hunogo helagwi a, ata arat helagwi a?”

⁹ Yugu dugwit, it ninen, “Ako yi aro,” yugwi, eke, ninen, “Dek o. Andi at ovagak ap adik aro,” yugwi, ogagu lagagwama, at akoen, “Hit yegep ako andi, an aro,” yugeragagi.

¹⁰ Yugirigya lagagimu, iren at yugugu dugwit, “Avyak! Hat hil nggarogonggan sek agen?”

¹¹ Yugugu lagagwama, aren, “Ap ambi inis Yesus en owaris wen vaga isaben ogarogo nil vaga lobabaningga lagarik, ‘Is yanggadek Siloam hurilak,’ yiluk, yuknugu lagama, hurilagya lagirik, nil sek agi.”

¹² Yugirigya lagagimu, iren at yugugu dugwit, “At eyave nggoma agarik?” Yugugu lagagwama, aren iri dugwit, “An ninggut,” yiluk, yugeragagi.

Ap il mbuk sek ogagagi ako hemethagagwa wene

¹³ Yugirigya lagagimu, it avakwa akoma en ap il mbuk sek agagi ako wolok it ap Varisi enadema lagagwa.

¹⁴ At Yesus en, wen isaben lobalogo ap il sek ogagagi ako andi, it Yakuri samban ogasagwi vaga-at ogagagi.

¹⁵ It Yakuri samban ogasagwi ako vaga ogagagirikmu, it ap Varisi menda en ap ako yugugu dugwit, “Hil nggarogonggan sek agen?” yugugu lagagwama, ap akoen, “Wen isaben nil vaga lobabaningga lagama, is hurilagya lagirik, yogak nil sek agi,” yiluk, yugeragagi.

¹⁶ Yugirigya lagagimu, it ap Varisi menda ninen, “Ap andi, nit Yakuri samban ogasagwi vaga moga ilup dugwit ogarit lagyama, At Ala en lakba wagetek.” Yugugusigik, it ninen andi, “Ap weyak ogasiga menda en nggarogo ogarubuk menda yerogo ogarup sek embetep? Dek,” yugu dugwit, irat ogot hedagagwa.

¹⁷ Ogot hudugu lagagwarik, at il mbuk welagagi ako ambi inim yugugu dugwit, “Avyak! Ap hat hil sek okhetas ako avok nggarogo yuknerami?” Yugugu lagagwama, aren it yugirigya dugwit, “Ala yugugu hegek yugeraliga menda navi Araro.”

¹⁸ Yiluk, yugeragagi ovara, it ap Yakuri menda enasini ap ombok-ombok akoen ap endak il mbuk welagagi sek ogagagi ako iren avyarat embetetek dugwit, asin-isa yanggup yugeragagwa. Yanggup yugurugu lagagwarik, wagu lagagwama, yugirigya dugwit,

¹⁹ “Hit henabut-heneyak il mbuk endaklagagi yegep ako, yiat a? Eke, il mbuk endaklagagi atma, yogak nggarogonggan en il sek aga?”

²⁰ Yugurugu lagagwama, asin-isa akoen, “Dek o. Ap yi, nit nenabut-neneyak-at. Eke, at il mbuk endaklagagi andi, ninilup ovara,

²¹ yogak nggarogonggan il sek aga ako inim, eke, saen at il sek ogaga ako inim, nit ogo, ninunggut. At ap ovok anggok atma, aren adigat yukherapwak yiluk, yugeres,” yiluk, yugeragagwa.

²² Yugeragagwa ako andi, ap asin-isa ako, “‘At Yesus en nenabut-neneyak sek ogaga o,’ yugu niniselok, it ap Yakuri enasini en nit samban ogasagwima en mondok wibininasogom,” yiluk, enalon en yagagwa. Endak it ap Yakuri enasini en yugu dugwit, “Avakwa saen, ‘Ap Yesus andi, At Ala en denogo mondok okbagagi Keretus aro,’ yiluk, vagangguselok, nit Yakuri samban ogasagwima en wibisasogom o,” yiluk, wene endak mbanggugwa.

²³ Wene endak mbanggugwarikmu andi vaga ap ako asin-isa andi ap Yakuri enasini enalon en, “At ap anggok atma, yugeres,” yiluk, yugeragagwa.

²⁴ Anderogo yugurugu lagagwama, it Yakuri menda en ap il mbuk welagagi ako ambi inim yanggup yugu lagagwarik, wagya lagagimu, yugugu dugwit, “Avyak! Ap ako weyak ogasiga menda nit ninilup atma, hat hane huluk yubuk. Ala ivaga avyarat adigat vagalogo yukneraup.”

²⁵ Yugugu lagagwama, ap akoen, “At weyak ogasiga a, dek a? Andi, an ninggut ovara, o muk nil mbuk welagagis. Eke, yogak andi, nil haliga yiat nilup.”

²⁶ Yugirigya lagagimu, iren at yugugu dugwit, “At nggarogo okhetas? Nano okbagagarikmu, hil sek agen?”

²⁷ Yugugu lagagwama, aren, “Ovok yukhirigi ovara, hulup henanggon umbutu dugwit, ‘Ambi inim yukneran,’ adigat yuknisagwi andi, nggarogo yiluk, yuknisagwi. Hit ogo, At ane welagwi menda aruguluk yagalagwi yi?”

²⁸ Yugirigya lagagimu, iren ap ako vudilogo mondok wiyiknom-weyaknom erogo bagu dugwit, “Hat At ane waliga menda-at heyagyo. Nit andi, Musa ane welagwi menda-at agurik.

²⁹ At Ala en Musa wene yugugu lagagi andi, ninilup ovara, At Yesus ako andi, nggoma en wagagi andi, nit ninunggut,” yiluk, yugogogwa.

³⁰ Yugugu lagagwama, at il mbuk sek ogagagi akoen, “Wi! Hit yagalagwi andira, meyan. Ap andi, nggoma en wagagi hinunggut ovara, an nil sek oknetas andi!

³¹ It ap weyak ogasagwi menda enane Ala aruk hulisigadek andi ninilup. Avakwa Ala enalon ombakluk, sek ogarup At ombasiga ako ogaguselok, enane Ala aruk hulisiga.

³² O muk endak erogo mbikit, yogak yi hudi ap ambien ap il mbuk endaklagagi ambi il anderogo sek ogagagi mondok hulisagwidek atma,

³³ ap yi, Ala en lakbawaklipuk en, yi ogagek ndi ogagek ovok erogo ogarup mondok degat helap.”

³⁴ Yugirigya lagagimu, iren onggo at yugugu dugwit, “Hat mondok hitok weyak adigat endaklagagin en yogak wene nit mamulneraigen yiluk ogasiga yi?” yiluk, at eyave weram haryogo wibagagwa.

Ap inil mbuk ovagak agarwik yugeragagi wene

³⁵ Haryogo wibagagwa ako Yesus aruk hunggu lagagirik, hivis inim avuk agu lagagwarik, at yugugu dugwit, “Avyak! At Ap-At Endaklagagi ako hendawi ovaga vanggabaluk, avyarat ombasiga a, dek a?”

³⁶ Yugugu lagagimu, ap akoen, “Nasin o. Nendawi At Ap-At Endaklagagi ako ovaga vanggabaluk avyarat ombarik en At eyave sa? Yukniru.”

³⁷ Yugugu lagagimu, At Yesus en, “Hil vage neyagen ninim nenane yagalagwi yi, An neyave aro.”

³⁸ Yugugu lagagimu, ap akoen, “Ai, Nasin. Nendawi hovaga vanggabaluk, avyarat hombasiga o,” yiluk, inis siyabagagi.

³⁹ Inis siyabagya lagagimu, At Yesus en, “It inil mbuk halok inil sek oginipu, inil sek halok inil mbuk oginipu, ogagya dugwit, henowak dilogo bigigaik yiluk, An o wen vaga yoma wambu wagagis o,” yiluk, yugeragagi.

⁴⁰ Yugeragagi ako it Varisi menda inim welagagwa ako, enaruk hunggu lagagwarik, “Avyak! Nit ogo, ninil mbuk embeten yi?”

⁴¹ Yugugu lagagwama, At Yesus en, “Hit hinil mbuk duklip en, henomaduk henovaga lobalek duklipuk ovara, hiren, ‘Nit ninil sek,’ yagalagwi andi vaga, henomaduk andi henovaga-at lobalek agarik,” yiluk, yugeragagi.