Yohanes 8 - ALA WENE HIVIS DIRUP WATUGWA

Hwa ambi ap adik inim ogagyama vagatugwa wene

¹ Enamwa adik-adik lagusigik, At Yesus ndom Saitun vaga inggigi.

² Hutun o yanggok eyami vaga wambu wagya lagagirik, Ala awi valekma mbumbumu nunggwigya lagagirik, werekma, avakwa wisane At adema wagu lagagwama, hora yiluk, wene mamulirigya lagagi.

³ Mamulirigyaim, it ap Ala wene vagago welagagwa menda inim, it ap Varisi menda inim, iren hwa ambi ap adik inim ogagyama vagatugwa ako, wolok Yesus adema wagagwa. Wolok wagu lagagwarik, hwa ako ilim okbaluk,

⁴ Yesus yugugu dugwit, “Ngguru wai! Hwa yi, ap adik ambi inim ogagyama heyakbagyo.

⁵ Ala wene Musa en dirup watigi ako vaga yuknirigya dugwit, ‘Hwa yerogo ogagya halok andi, helep vaga mondok nggorak erogo warogo baup,’ yiluk, yukneragagi ovara, Hat andi, nggarogo yuknerami?” yiluk, yugogogwa.

⁶ (Wene anderogo yugogogwa ako, Yesus ane nggarogo iri hamwi yiluk, avut mbaluguluk, yugogogwa.) Yugugu lagagwama, At Yesus wene onggo yugeregetek elose wen vikit ut sibalek dugwit, inggis wen vaga dirup watigi.

⁷ Dirup watyama, iren, enane nggengges vaga, “Hodo iru,” yugugu lagagwama, At mendek iri lagagirik, it yugirigya dugwit, “Ap henanggelekma yoma ambi weyak ogasigadek halok, at endak hwa yi helep vaga warup.”

⁸ Yugirigya lagagirik, hora yiluk, elose wen vikit ut sibalek dugwit, inggis vaga ambi inim wen vaga dirup watigi.

⁹ Wene yugeragagi ako hunggu lagagwarik, it enanggok endak ambi nggigik mberen nggigik lagwi, enaori ogo anderogoat ambi nggigik mberen nggigik hekbaluk lagwi, ogagu lagagwama, At Yesus hwa ako iperen enadigat agagi.

¹⁰ Enadigat agya dugwit, At Yesus ako mendek iri lagagirik, hwa ako yugugu dugwit, “Hat hwa narup wai! Ap akoma nggoma lagao? It ambi en, ‘Hat weyak ogagen,’ yiluk, enane weyak ambi hovaga bagagao a dek a?”

¹¹ Yugugu lagagimu, hwa akoen iri dugwit, “Mondok dek, Nasin,” Yugugu lagagimu, At Yesus en, “An ogo, hat weyak ogagen o, yiluk, nane ambi hovaga bagasogonbuk atma, hamwa elak. O yogak yi hudien weyak ogagya lagen ako ambi inim ogagya dogobuk,” yiluk, yugogogi.

Yesus en avakwa enendawima awiya oginivisiga wene

¹² Yugugu lagagirik, At Yesus en avakwa ambi inim yugirigya dugwit, “It avakwa o wen vaga agarwik ako awiya oginivisiga menda An aro. Hit An ninim nagu hiniselok, iniluk oginivisiga menda awiya An akoen henendawi awiya okhinivisogon atma, o hup vaga nagu dogosogom mondok dek.”

¹³ Yugirigya lagagimu, it Varisi menda en yugugu dugwit, “Avyak! Harenen adigat havok vagalhedegek lagyama, hane andi hulugat iri heyalagwi.”

¹⁴ Yugugu lagagwama, At Yesus en, “Anenat navok vagalhedegek landiga ovara, An nggoma en wagagis, eke, nggoma layogon ako An nilup atma, nane yukheraliga yi, avyarat. An nggoma en wagagis, eke, nggoma layogon ako, hit hinunggut aro.

¹⁵ Avakwa en enowak dilogo anggin enovaga biselagwi hak, hiren, ‘Weyak ogagen,’ yiluk, yuknisagwi ovara, Anen avakwa enowak dilogo anggin enovaga bisaligadek.

¹⁶ Anen, avakwa enowak dilogo anggin enovaga bisela en, avyarat, An nadigen ogasigadek An Nasin lakbani wagagi niperen ogasagwi atma, ogagya dugwit, An segerogo atma-at enowak dilogo anggin enovaga bisela.

¹⁷ Ap eneyave mberenen inilup dugwit, vagalogo yuguselok andi, enane avyarat o, yiluk, Musa wene dirup warek agarik. Musa wene dirup warek agarik atma,

¹⁸ Niren neneyave mberenen, An ogasiga navok vagalogo yukherelagwi ako, ambi Anenenat vagalogo yukheraliga, eke, ambi At lakbani wagagi Nenasin Ala ako enat vagalogo yukheraliga.”

¹⁹ Yugirigya lagagimu, iren At yugugu dugwit, “Hat Hasin eyave o nggoma agarik?” Yugugu lagagwama, Aren yugirigya dugwit, “An inim, An Nasin inim, hit hininggurat agipik. An neyave hinilup aklipmu en, An Nasin ogo hinilup aklip,” yiluk, yugeragagi.

²⁰ Anderogo yugeragagi ako andi, Ala awi valekma yoparip belagwima horok andenam dugwit, mamulirigya lagagi. Eke, At warup ako ao amor ari wagetekma, Yesus vagatitek-at welagagwa.

“An lapim andoma hit hinim laup meyan,” yugeragagi wene

²¹ At Yesus en it avakwa ambi inim yugirigya dugwit, “An layogon aro. Eke, hiren An belalnetek lasogom ovara, An lapim andoma hit laup meyan atma, hit henomaduk henovaga dinggilik dugwit hambusogom.”

²² Yugirigya lagagimu, it Yakuri menda en, “‘An lapim andoma hit laup meyan,’ yagaliga andi, At eram naga hedagiluk yagaliga?”

²³ Yugu lagagwama, Aren it yugirigya dugwit, “Hit andi, ap wen vaga yoma menda, eke, An andi, winimen menda aro. Hit ap wen vaga menda ovara, An andi, wen vaga menda dek.

²⁴ Hit henomaduk henovaga dinggilik dugwit hambusogom yiluk, yukhirigi ako andi, hiren ‘At eyave itok agarik menda aro,’ yiluk, henendawi novaga vanggabaluk, avyarat nembetetek hiniselok, hit henomaduk henovaga dinggilik dugwit-at hambusogom.”

²⁵ Yugirigya lagagimu, iren, “Hat sa?” Yugugu lagagwama, At Yesus en it yugirigya dugwit, “‘An ap anderogo,’ wene yukheraliga ako andi, An aro.

²⁶ Hit ogarit lendagwi ako vaga weyak henovaga bugugu dugwit, yi wene ndi wene wisane yukheraup yiluk agirik. At lakbani wagagi ako avyarat yagaliga atma, An At ane hobaluk adigat hit wen vaga agipik ako yukheraliga,” yiluk, yugeragagi.

²⁷ Wene yugeragagi ako andi, “At Asin avok yukneraliga,” yiluk, it dibagetek-at welagagwa.

²⁸ Dibagetek welagagwama, At Yesus en it yugirigya dugwit, “An Ap-At Endaklagagis yo vaga ilik banunggu hiniselok, hiren, ‘Itok agarik menda ako eve yi aro,’ yiluk, hinilup arugup. Eke, An ombasiga menda vaga ogasigadek, ata, Nasin en yuknisiga ako adigat yukheraliga hit hinilup arugup.

²⁹ At lakbani wagagi ako An nimat agarik. At endawi sek nombasiga ako, An adigat ogasiga atma, nadik dogwegen yiluk, Aren An hekbanenggetek,” yiluk, yugeragagi.

³⁰ Wene anderogo yugirigya lagagimu, avakwa wisane enendawi Yesus ovaga vanggabaluk, At avyarat umbutugwa.

“Ala en heda visilogo bigigayogon,” yiluk, yugeragagi wene

³¹ At Yesus en it ap Yakuri menda enendawi At ovaga vanggabaluk, avyarat umbutugwa ako yugirigya dugwit, “Hiren An nane henendawima vagago dugwit, mondok musek lagu hiniselok, An nane welagwi menda avyarat agipik.

³² Eke, avyarat wene Ala avok ako hinilup arusogom. Hinilup arusogom vaga heda visilogo bigigayogon.”

³³ Yugirigya lagagimu, it akoen At yugugu dugwit, “Avyak! Nit Averakam ombawi endago ninigik, ap ambi avema heda mago vaknenombogo welagatekma, Haren, ‘Heda visilogo bininayogon,’ yagaliga andi, nggarogonggan yukneraliga?”

³⁴ Yugugu lagagwama, Yesus en it yugirigya dugwit, “Avakwa weyak ogasagwi menda andi ovok erogo, weyak ogasagwi andi vaga heda magoat agarwik, yiluk, mondok avyarat yukheraliga.

³⁵ Ap ambi ayeloman onggo hunik menda ako asin inim mondok-mondok agarikbuk. At eve Abut halok andi, Asin inim mondok-mondok agarik.

³⁶ Anderogo atma, At Ala eve Abut Anen heda visilogo bugugu neyalok, hit mondok avyarat heda visilek dogogup.

³⁷ Hit Averakam ombawi endago menda, An nilup ovara, An nane henendawima wegetek atma, An mondok naruguluk ogagu hinisaliga.

³⁸ An Nasin ninim dugwit, nil hagagis ako yukheraliga andi hak, hit anderogoat henasin en yukheragagi hunggugup ako weyak ogagu hinigis, yiluk, yukheraliga.”

³⁹ Yugirigya lagagimu, iren, “Nit nenasin andi, Averakam aratma nggarogo yiluk yukneraliga!” Yugugu lagagwama, Yesus en it yugirigya dugwit, “Hit Averakam aburi avyarat duklipmu en, at ogagya lagagi ako hit wane-wane-at ogagu duklip.

⁴⁰ Ala en avyarat wene yuknogogi ako adigat yukheraliga ovara, hit An mondok narup yiluk ogasagwi. At Averakam anderogo mondok ogagya lagagibuk ovara,

⁴¹ hit andi, henadik henasin en ogasiga ako wane-wane-at ogagu hinigis.” Yugirigya lagagimu, iren, “A avyak! Nit ap ugun endago menda agurikbuk. Nenasin ambiat Ala adigat agarik.”

⁴² Yugugu lagagwama, At Yesus en it yugirigya dugwit, “Hit henasin andi Ala avyarat duklip en, An Ala werekma en wambu wagya lagagirik, yoma agirik atma, ninim henendawi hunigat duklip. An napedigot wagetek. Ata, Arenenat lakbani wagagi ovara,

⁴³ An yukheraliga ako andi, nggarogo yiluk dibanenggetek-at agipik? Hit An nane waup mondok meyan atma, dibanenggetek-at agipik.

⁴⁴ Hit yi, henasin at Sile atma, at ogarup ombasiga menda ako adigat, ogarusogom, ombasagwi. At o endak en ogarit wagya hegek, yogak yi hudi avakwa inirisiga menda-at agarik. Avyarat wene Ala avok ako at endawima agarikbuk atma, Ala yagaliga ako at mondok ogagetek-at agarik. At itok huluk molalogo yagaliga menda aratma, huluk wene yagalagwi menda enasin arat dugwit, at endawi en wene ugun-ugun wenggebaluk, huluk molalit landiga menda arat.

⁴⁵ Anderogo atma, avyarat wene Ala avok yukheraliga yi vaga hit avyarat embetetek agipik.

⁴⁶ Hit yi ambien An weyak ogagya neyagep halok, ‘Yi ogagen,’ yiluk, yukneres. Dek. Anen avyarat wene Ala avok ako yukhirigya neyagek, hit nggarogo yiluk, An avyarat nembetetek agipik?

⁴⁷ It Ala aburi halok andi, Ala yagaliga wene ako enaruk hulisagwi ovara, hit Ala aburi dekma, At ane hit hunggitek-at agipik o,” yiluk, yugeragagi.

Averakam eyave dek hegek Yesus endak welagagi wene

⁴⁸ Yugirigya lagagimu, it Yakuri menda en Yesus yugugu dugwit, “‘Hat ap Samaria menda madis hendawima nonggagas,’ yukhugup ako andi, avyarat ai?”

⁴⁹ Yugugu lagagwama, Yesus en it yugirigya dugwit, “Dek. An madis nendawima mondok dek. An Nasin inis siyabaliga ovara, hiren An ninis weyak erogo banunggu hiniselok, yukheraliga.

⁵⁰ Hiren An siyabanovovok yiluk ogasigadek. Ata, At ambien andi, An siyabanigiluk enowak des erogo dilisiga menda agarik.

⁵¹ Ap ambi saen An nane dibaluk, musek lagya halok, at hambisogon mondok dek, yiluk, avyarat yukheraliga.”

⁵² Yugirigya lagagimu, it Yakuri menda en At Yesus yugugu dugwit, “Wene yegen andi vaga madis hendawima dugwit yagaliga avyarat heyagyo. At Averakam inim, it navi-navi inim, hambugu lagagwa ovara, hegek, Haren, ‘Ap ambi saen An nane dibaluk, musek lagya halok, hambisogon mondok dek’ andi, nggarogo yiluk yegen!

⁵³ Hat anderogo yegen andi, nit nenasin Averakam hombagagi ako andi, at maduk. Eke, Hat ombok atma, yiluk yegen yi? It ap navi-navi ako ogo, hombagagwa ovara, Hat sa wane-wane okhidigya dugwit yagaliga?”

⁵⁴ Yugugu lagagwama, At Yesus en, “An siyabatigya neyalok andi, un enam warogo-at siyabetalin landiga. Hit en, Nenasin Ala o, yiluk, yagalagwi ako andi, An Nasin aratma, Aren adigat siyabaniliga.

⁵⁵ Hit At eyave hinunggut ovara, An andi, At eyave nilup aro. At eyave An ninggut yilimu en, hit huluk molalogo yagalagwi hak, An anderogoat huluk molalogo yili. At eyave An nilup andien, At ane An des erogo ogasiga.

⁵⁶ Hit henasin Averakam akoen An ogari warup ako neyaup imbitigirikmu, endawi adenggen wisane imbitigi. An ogari warisogon ako il higya lagagirik, adenggen wisane imbitigi.”

⁵⁷ Yugirigya lagagimu, it Yakuri menda en At yugugu dugwit, “Avyak! Hat endago heyagek tahun 50 ogagetek ovara, at Averakam hil higya lagagindik yegen yi? Meyan.”

⁵⁸ Yugugu lagagwama, At Yesus en, “Averakam endaklagatek hegek, An nitok-at agirik, yiluk, avyarat yukheraliga.”

⁵⁹ Yugeragagi andi vaga it helep dombok erogo Yesus waruguluk ogagagwa ovara, At Yesus ako, Ala awi valekma en hwilaklari lagagi.