Yohanes 7 - ALA WENE HIVIS DIRUP WATUGWA

Yesus aori en At yugogogwa wene

¹ Anderogo yugirigya lagagirik, it Yakuri menda en Yesus mondok warup ogagu lagagwama, “O Yudea yoma ogarit nagu dogop nanggon,” yiluk, o Galilea andoma ogarit nagu dogogiluk, lagagi.

² Lagya lagagirik, werekma, it Yakuri enawiravo valit wagagwa enape wenggelogo isogo isarup horok amor ari wagagi.

^3-4 Horok amor ari wagya lagagimu, At Yesus aori ambetaga endago menda en At yugugu dugwit, “Ap ambi at eyave inilup arupwak yiluk, ogasiga ako andi, mbauk ogasigadek. Ata, at inis werek arupwak yiluk, o ombokma ogasiga. Anderogo atma, Hat ogasiga menda ako it Hat hane welagwi menda en ogagya inil heyapwak yiluk, o yi hekbaluk, o Yudea ombokma ogarilak. Hat ogasiga menda ako ogagya heyalok, it avakwa ovok erogo inil heyapwak yiluk ombokma-at ogarit lagya dogwen o,” yiluk, yugogogwa.

⁵ Anderogo yugogogwa ako andi, At aori ako ogo enendawi Yesus ovaga vanggabaluk, avyarat embetetek dugwit yugogogwa.

⁶ Yugugu lagagwama, Yesus en it yugirigya dugwit, “Hit ogarup andi, ndugurek-ndagarek ugun ogarup sek adigat ovara, An ogarup yiluk wenggelek agirik ako andi, ao ari wagetek.

⁷ It avakwa en hit enanggon henombarusogombuk ovara, An andi, it avakwa ogasagwi andi, ‘Hit weyak ogasagwi,’ yiluk, vagalogo yugeraligama, enanggon adigat nombasagwi.

⁸ An ogarup ako ao ari wagetek atma, isogo isagusim andoma yogak An layogonbuk. Hit henadigat elales,” yiluk, yugeragagi.

⁹ Anderogo yugirigya lagagirik, At o Galilea andoma-at mbup yagagi.

Yesus en Yerusalem lagya lagagirik wene mamuleragagi wene

¹⁰ At Yesus o Galilea andoma mbup yagagi ovara, andi okbaluk, At aori ako isogo isagusim lagu lagagwama, At ogo, sup ombok vaga lagetek hwilak-hwilak-at lagagi.

¹¹ Lagya lagagirik, werekma, it Yakuri enasini ap ombok-ombok menda en isogo isagusim Yesus haoen yiluk, inil belanggu dugwit, “At eyave yoma agarik a, dek a?” yiluk, yugeregek belanggugwa.

¹² Isogo isagusim it avakwa wisane wagagwa akoen madingguruk wene vaga Yesus avok wisane yugu dugwit, ninen, “At ap sek aro,” yugwi, eke, ninen, “Dek. Aren avakwa nomalinivisiga menda aro,” yugwi, ogagu lagagwa.

¹³ Ogagu lagagwa ovara, it avakwa akoen enasini ap ombok Yakuri menda enadema Yesus avok sigam erogo yugeregetek. Ata, enalon en, un madingguruk wene vaga Yesus avok yugu lagagwa.

¹⁴ Isogo agako isagusim Yesus ako Ala awi valekma mbumbumu nunggwigya lagagirik, wene mamuleragagi.

¹⁵ Mamulirigya hegek, it ap Yakuri en, “Wi!” yiluk, vok yugu dugwit, “Ap yi, sekolah ogagetek ovara, yi wene ndi wene adem nggarogonggan ilup agya lagagirik, ogasiga ombasagwi?”

¹⁶ Yugu lagagwama, At Yesus en, “An wene mamulheraliga ako andi, An ombasiga menda mamulheraligadek. Ata, At lakbani wagagi akoen yuknugu hegek, mamulheraliga.

¹⁷ Ap saen Ala ogarup ombasiga ako, ogarup imbita halok, An wene mamulheraliga ako andi, Ala en yuknugu hegek, mamulheraliga a, ata An nadik ombasiga menda mamulheraliga a, ako andi, inilup arusogom.

¹⁸ Ap ambien at adik ombasiga menda vaga wene yugeraliga ako andi, at inis ombok arupwak yiluk yagaliga. Ovara, At lakba wagagi inis ombok arupwak yiluk, wene yugeraliga halok andi, At huluk wene molalit landigadek avyarat des erogo adigat yagaliga atma, weyak endawima agarik mondok dek aro.

¹⁹ Ala wene at Musa en dirup warogo wokheragagi ako dek a? Dirup warogo wokheragagi ovara, wene eyave ako hit ovok erogo ogagetek. Ogagetek dugwit, nggarogo yiluk An narup yiluk ogasagwi?”

²⁰ Yugirigya lagagimu, it avakwa ombok homago akoen, “Dek o. Hat madis hendawima nonggagas yi? Saen Hat harup yukhigarikmu yagaliga?”

²¹ Yugu lagagwama, At Yesus en it yugirigya dugwit, “An un ndugwis ambiat hit Yakuri samban ogasagwi vaga ap sek ogagya neyagu lagipik, hit ovok erogo, ‘Nit samban ogasagwi vaga ogarup moga hegek At yavup ogasiga yi, wi,’ yiluk, vok yagalagwi.

²² Anderogo ovara, hit ogo samban ogasagwi vaga yavup ogasagwi. Andi, hiren Musa wene hobalek ako vaga ogagu dugwit, samban ogasagwi vaga hit henaburi enagamut mbalinivisagwi ako, yavup-at ogasagwi. (Eke, nenaburi enagamut mbalinivisagwi ako andi, Musa en yegetek. Ata, o muk erogo Musa ao endaklagatek hegek nit nenombawi en enaburi enagamut mbalinipu lagagwa.)

²³ Hit ogo, Musa wene yukneragagi ako sovabagu hinisaoen, yiluk, hit samban ogasagwi vaga avivak enagamut mbalinivisagwi. Anderogo ovara, An samban ogasagwi vaga ap ambi eyave sek ogagi hegek nggarogo yiluk An mbetnisagwi?

²⁴ Adem dibagetek dugwit, elose vaga adigat dibaluk, weyak enovaga bisaup moga. Ata, adem dibaluk, ogaga onggo wane-wane-at enovaga bisaup sek o,” yiluk, yugeragagi.

“At Yesus yi, At Ala en denogo lakba warisogon Keretus andi, Arat a, dek a?” yagagwa wene

²⁵ Anderogo yugirigya lagagimu, it ap Yerusalem menda ninen, “At mondok warogo baup yiluk belalisagwi ako, ap yi a, ata ap adik a?

²⁶ At wene ombokma mamuleraliga ovara, anggadi warogo moga yugurup ogo mondok yugisagwidek yi hinil hanes. It ap nenasini ombok akoen, ‘Moga,’ yiluk, yugisagwidek yi, iren Ala en denogo mondok okbagagi Keretus ako, ‘At yi ai?’ avyarat umbutu lagarwik mbuverek agarwik a?

²⁷ Anderogo ovara, At Ala en denogo mondok okbagagi Keretus ako, wagya halok, nggoma en wasogon ako nit ovok ninunggut ovara, ap Yesus yi ako andi, nggoma en wagagi andi, nit ninilup atma, At Keretus dek ai?” yiluk, yagagwa.

²⁸ Yugu lagagwama, At Yesus Ala awi valekma mbumbumu akoma en ane ombok vaga yugirigya dugwit, “An neyave inim, eke, An nggoma en wagagis ako inim, hit hinilup embetep? An nadik nendawi wenggebaluk wagetek. Ata, At avyarat agarik akoen An lakbani wagagi. Eke, At andi hit hinunggut agipik ovara,

²⁹ An ako, At lakbani wagagi werekma en wagagis atma, An andi, At eyave An nilup aro.”

³⁰ Yugeragagi andi vaga At vagaruguluk, ogagagwa ovara, At warup ako ao amor ari wagetekma, ininggis mondok vagatitek.

³¹ Anderogo ogagagwa ovara, hegek, it avakwa wisane enendawi At ovaga vanggabaluk, avyarat umbutugwa. Avyarat umbutu dugwit, “Ap yi, ninilup arup nenalon werek menda wisane erogo ogarit lagya higyo. Eke, At Keretus ako hivis wagya dogomindik, At eve iya erogo ogarit lagya hasogom embetep? Dek o,” yiluk, yagagwa.

Yesus heda marupwak yiluk lakbogogwa wene

³² Avakwa homago akoen madingguruk vaga Yesus avok yugwi ako it Varisi menda hunggu lagagwarik, it inim, it ap imam-imam enasini inim, it enaori Ala awi valekma suam watu lagagwa menda ako Yesus vagarupwak yiluk, lakbogogwa.

³³ Lakbogogwa Yesus adema lagu lagagwama, At Yesus en it yugirigya dugwit, “An sidogat hinim dogosogon. Hinim dogomindik, At lakbani wagagi ako adema layogon.

³⁴ Adema lamindikmu neyagek, hiren An belalnetek lasogom ovara, An lapim andoma hit laup meyan atma, neyagupuk.”

³⁵ Yugirigya lagagimu, it Yakuri enasini inim wene mbanggu dugwit, “At nggoma layogon ako, nit At belalup meyan yiluk yukneraliga embetep? It Yakuri menda ap Yunani enanggelekma sak yagan lagagwa o weram agarwik ako inisa lagya dogomindik, inim dugwit, it ap Yunani menda mamulirigya dogosogon imbita dugwit, yagaliga embetep?

³⁶ ‘Hit An belalnetek lasogom ovara, An lapim andoma hit laup meyan atma, neyagupuk,’ yiluk, yukneraga ako andi, adem nggarogo yiluk yagas?” yiluk, yagagwa.

Is avakwa iniluk oginivisiga adem wene

³⁷ Andi okbaluk, hivis atok weralogo ogaruguluk isogo ombok adenggen ogagwi vaga At Yesus mendek iri lagagirik, ane ombok vaga yugirigya dugwit, “Ap yoma wai! Hit ambi is uvup halok, An nadema na omanes.

³⁸ Hit henendawi novaga vanggabaluk, avyarat numbutu hiniselok, ‘Is hiniluk okhinivisiga menda ambi henendawima en liris hudu-hudup wunggu dogosogon o,’ yiluk, Ala wene dirup watigi ako wane-wane, henendawima en wunggu dogosogon,” yiluk, yugeragagi.

³⁹ (Wene is hiniluk okhinivisiga menda ambi henendawima en liris hudu-hudup wunggu dogosogon o, yugeragagi ako andi, it avakwa en enendawi Yesus ovaga vanggabaluk, avyarat umbutuselok, Ala Averiniki wogeraup atma yiluk yugeragagi. Ala en Yesus ao siyabagetek halok, At Ala Averiniki hivis wogeraup andi ao wogeregetek atma yiluk, yugeragagi.)

⁴⁰ Wene yugeragagi ako it avakwa enaruk hunggu lagagwarik, it ninen, “Ap Navi Ala en lakba warisogon ako, eyave yi avyarat waga helagwi,” yugwi,

⁴¹ eke, it ninen yugu dugwit, “Dek o! Ala en denogo mondok okbagagi Keretus ako yiat helagwi,” yugwi, ogagusigik, it ninen andi, “At Ala en denogo mondok okbagagi Keretus ako, o Galilea en wasogon embetep? Dek!

⁴² Ala en denogo mondok okbagagi Keretus ako andi, ombao Daut welagagirikmu o Mbelekem-at endaklarisogon o, yiluk, Ala wene dirup watigi akora?” yiluk, yagagwa.

⁴³ Yugu lagagwama, it avakwa en Yesus alelo vaga naburuk-haburuk yugu dugwit ogot hedagagwa.

⁴⁴ Naburuk-haburuk ogot hudugu dugwit, it ninen, “Yesus vagarugen,” umbutugwa ovara, vagatitek-at welagagwa.

It ap imam-imam enasini inim, ap Varisi inim avyarat embetetek wene

⁴⁵ It ap Ala awi valekma suam watu lagagwa menda akoen ap imam-imam enasini inim, it ap Varisi menda inim, werekma, eneyami vaga enadema wagu lagagwama, iren yugurugu dugwit, “Hit nggarogo yiluk, Yesus wolok wagepuk?”

⁴⁶ Yugurugu lagagwama, it ap akoen, “Ayai! Wene At yagaliga andi, avakwa ninen ambi anderogo yugu selagwidek atma, At ap andi iri higyo, wi, yiluk, hekbagyo!”

⁴⁷ Yugu lagagwama, it Varisi menda en, “Aren hit henendawi ogo nomalhinipas ai?

⁴⁸ Henasini ap ombok-ombok inim, nit Varisi menda inim, nenendawi At ovaga vanggabaluk, avyarat umbutwi ambi ninigip yi? Dek aro!

⁴⁹ Wene Musa en dirup watigi ako it avakwa wisane andi, inunggut atma, Ala en vudibigigi agarwik inugup o,” yiluk, yugeragagwa.

⁵⁰ Yugurugu lagagwama, ap it Varisi menda ambi endak Yesus adema lagagi Nikodemus akoen it yugirigya dugwit,

⁵¹ “Ap yoma wai. Nit ogagu dogop wene dirup warek ako ogagu dugwit, ap ambi ogarit lagya lagagi ako, ‘Anderogo yiluk ogagi o,’ yiluk, iris ako nenaruk hobaluk, adem dibagetek dugwit, weyak onggo okbaup andi, sek embetep?”

⁵² Yugirigya lagagimu, iren, “Avyak! Hat ogo, ap Galilea menda atma yiluk hat yagaliga? Ala wene dirup warek yenaga wigya dogwen! Yenaga wigya dogomindik, it navi-navi menda ambi o Galilea en wasogon dirup warek degat hayogon,” yiluk, yugugu lagagwarik,

⁵³ enamwa adik-adik wunggugwa.