Yohanes 6 - ALA WENE HIVIS DIRUP WATUGWA

Ap eneyave 5.000 erom wogeragagi wene

¹ Andi okbaluk, hivis At Yesus is yanggadek Galilea inis ambi Tiverias ako, elavikit lagagi.

² Elavikit lagyama, it avakwa wisane At Yesus inilup arup enalon werek menda ogagya dugwit, aup idup sek oginivit lagya inil hugu lagagwarik, Yesus amusek lagagwa.

³ Amusek lagusigik, At Yesus ndom vaga inggya lagagirik, At ane welagwi menda inim andoma-at hora yagagwa.

⁴ (Ndugwis andi vaga it Yakuri en isogo ombok Vasika isarup horok amor ari wagagi.)

⁵ Yesus ako hora yiluk, il yenaga wogupu dugwit, avakwa wisane At adema homari wagwi ako inugu lagagirik, Pilipus yugugu dugwit, “Pilipus wai! Avakwa yi, erom napwak yiluk ambi nggoma huni lamwi?” yugogogi.

⁶ Anderogo yugogogi ako, At Yesus andi ogarup ovok ilup dugwit ovara, Pilipus avut mbaligen yiluk, yugogogi.

⁷ Yugugu lagagimu, at Pilipus en At yugugu dugwit, “It ap enadik-enadik erom ambukumetap napwak yiluk, onggo ombok yoparip denari 200 vaga erom huni laup ovara, it ap wisane atma, ndatak erogo naup meyan ombasiga.”

⁸ Yugugu lagagimu, At Yesus ane waliga menda ambi inis Andereas, Simon Peterus aot akoen Yesus yugugu dugwit,

⁹ “Nasin wai! Avyak maduk ambi roti ninggis ambi dinggilik 5, eke, ikan mariduk mberen, vagago agarik ovara, avakwa wisane atma ndatak naup meyan ombasiga.”

¹⁰ Yugugu lagagimu, At Yesus en, “It avakwa yi, hora yupwak yiluk, yugeranes,” yugeragagi ako yugurugu lagagwama, andoma mbeyambup wisane werekma, ap adigat andi eneyave 5.000 hudi hora yagan lagagwa.

¹¹ Hora yugu lagagwama, At Yesus en roti ako inggimu wigya lagagirik, “Ala wa,” yugugu dugwit, it avakwa hora yagagwa ako menageragagi. Menagirigya lagagirik, ikan anderogoat wogirigya lagagimu, it ovok enagaum erogo nunggugwa.

¹² Menageragagi ako nunggu lagagwarik, enagaum agya lagagimu, Yesus en At ane welagwi menda ako yugirigya dugwit, “Nin higitlaga ako, mbo hugu saoen, ambekma wonggalogo bomanes.”

¹³ Yugirigya lagagimu, it roti jelai 5 ako nunggu dugwit, nin higirogo bagagwa ako wonggalogo mburiyum 12 hudi elagapaga erogo yedogo bagagwa.

¹⁴ Yedogo bagu lagagwama, avakwa akoma en inilup arup enalon werek menda ogagagi ako, inil hugu lagagwarik, yugu dugwit, “At Ala en yugugu hegek yugeraliga menda Navi o wen vaga yoma warup ako, ap yiat waga higyo.”

¹⁵ Yiluk, yugu lagagwama, Yesus en, “It avakwa wagu dogomundik, enasin ninis ombok dogop nanggon imbita neyagek mondok okbanusogom,” yedok inugu lagagirik, at adigat ndom vaga andoma inggigi.

Yesus is iri vaga isok balin lagagi wene

¹⁶ Inggigirikmu, o vage hup arigiluk ogagya lagagimu, Yesus ane welagwi menda inamut yanggadek Galilea omban vaga wambu wagu lagagwarik,

¹⁷ mburis vaga nonggagagwa. Nunggugu lagagwarik, inamut yanggadek vaga o Kapernaum wagusim, hup agagirikmu, Yesus enadema ao ari wagetek hegek,

¹⁸ o havut anye wisane erogo ogagya dugwit, is mogoliluk lagek-wagek yagagi.

¹⁹ Is mogoliluk lagek-wagek iri hegek, is agakoma 5 kilometer ata 6 kilometer ari lagusim, At Yesus is iri vaga isok ya baik nda baik vage enadema horok ari wagya inil hagagwa. Hugu lagagwarik, enalon wisane agagi.

²⁰ Enalon agya lagagimu, Yesus en it yugirigya dugwit, “Naswei! An neyave-at wandiga atma, henalon habuk.”

²¹ Yugirigya lagagimu, “Mburis vaga nunggu warup ova ale,” umbutusigik, is yanggadek omban vaga it laup umbutugwarikmu akoma wane-wane-at ari wagagwa.

Avakwa wisane erogo Yesus belalit lagagwa wene

²² Hutun o yanggo iri lagagimu, it avakwa wisane inamut yanggadek elavikit ao welagagwa akoen hup mburis ambiat werekma inil hagagwa, eke, Yesus ane welagwi menda ako it enadigat mburis vaga lagusigik, Yesus inim lagetek inigu lagagwarik, is omban vaga andenam-at welagagwa.

²³ Andenam ao werekma, mburis nin vaga avakwa o Tiverias en wagu dugwit, Nenowa Inis Ombok Yesus en Nenasin Ala, “Wa,” yiluk, avakwa roti wogeragagi nunggugwarikmu akoma-at wagu sogogwa.

²⁴ Inigu lagagwarik, biginugugwa menda Yesus inim, At ane welagwi menda inim, eneyave dek iniselok, mburis akoma vaga nunggugu lagagwarik, Yesus belalit o Kapernaum wagagwa.

“Erom iniluk oginivisiga menda An aro,” yugeragagi wene

²⁵ Wagu lagagwarik, it avakwa wisane akoen Yesus inamut yanggadek elavikit o Kapernaum werekma havetugwa. Havetu lagagwarik, At yugugu dugwit, “Ngguru wai! Hat yoma mera wagen?”

²⁶ Yugugu lagagwama, At Yesus en yugirigya dugwit, “Hinilup arup henalon werek menda ogagya neyagep ako vaga belalnetek wagetek. Ata, hit erom henagaum erogo nenggep ako vaga belalnetek wagep higi, yiluk, mondok avyarat yukheraliga.

²⁷ Erom vidis dek arup menda ako adigat yavup ogagu dogobuk. Ata, An Ap-At Endaklagagis akoen erom mondok-mondok dogop menda wokheraliga ako hedaguluk eyavup adigat ogagu dogones. An andi menda-at wokhirigya dogogiluk, Nasin Ala en denogo mondok okbaninggigirikmu agirik.”

²⁸ Yugirigya lagagimu, iren At yugugu dugwit, “Ala en ogarup ombasiga ako ogaruguluk, nit nggarogo ogagu dogok?”

²⁹ Yugugu lagagwama, At Yesus en, “Ala en hit ogarup ombasiga ako andi, eyave yi: Ala en An lakbani wagagi henendawi novaga vanggabaluk, avyarat nombarup ako aro.”

³⁰ Yugirigya lagagimu, iren At yugugu dugwit, “Hat ninilup arup nenalon werek menda ambi ogagya heyalok, nit Hat hovaga vanggabaluk, avyarat hombarusogom. Atma, nit ninilup arup nenalon werek menda ambi ngga ogagya heyamwi? Eke, Hat ogasiga ako menda ambi ngga ogasogon?

³¹ Ala wene vaga dirup warek ambi, ‘Erom napwak yiluk, mbogot vaga en wogera wagagi o,’ yiluk, dirup warek ako wane-wane, nit nenombawi o harumu werekma, Musa en erom mbogot vaga menda inis mana wogera wagya lagagimu, nunggu lagagwa ako aro.”

³² Yugugu lagagwama, Yesus en it yugirigya dugwit, “Erom mbogot vaga menda wokhirigya lagagi ako andi, Musa en wokhirigya lagetek. Ata, An Nasin enat eve erom mbogot vaga menda-at wokheraliga.

³³ Erom Ala en wokheraliga ako andi, mbogot vaga en wambu wagya lagagirik, avakwa wen vaga menda agarwik iniluk oginivisiga ako aro, yiluk, mondok avyarat yukheraliga.”

³⁴ Yugirigya lagagimu, iren, “Ai, Nenasin. Erom andi menda ndugurek-ndagarek woknirigya dogwen o.”

³⁵ Yugugu lagagwama, Yesus en, “Eve erom iniluk oginivisiga menda adem andi, An aro. Hit ambi An nadema wagu hiniselok, erom uvup okhinivisogon mondok dek. Eke, hit henendawi An novaga vanggabaluk, avyarat numbutu hiniselok, hivis ogo is uvup okhinivisogon mondok dek.

³⁶ Hit An neyagu lagep ovara, henendawi novaga vanggabaluk, avyarat nembetetek-at agipik o, yiluk, wene yukhirigi ako.

³⁷ It An Nasin en woknisiga ako ovok erogo An nadoma warusogom. Eke, it avakwa An nadoma wendagwi ako andi, ‘An mondok nanggon o,’ yiluk, mbobisayogon mondok dek o.

³⁸ An nadik nendawi wenggebaluk ogagya dogogiluk, mbogot vaga en wambu wagetek. Ata, At lakbani wagagi ogarup ombasiga ako adigat ogarigiluk wagagis.

³⁹ Eke, At lakbani wagagi An ogarup ombasiga ako andi, eyave yi: Ala en it avakwa ovok erogo An woknisiga ako ambiat ogo yelemele okbisayogonbuk. Ata, o hivis oklarugwi andi vaga it ovok iniluk erogo mondok okbisayogon ombasiga ako aro.

⁴⁰ An Nasin en ogarup ombasiga ako andi, Ala Abut An hinil dibaniluk, henendawi novaga vanggabaluk, avyarat numbutu hiniselok, mondok-mondok hiniluk dogop ombasiga andi aro. Eke, o hivis oklarugwi andi vaga Anen hiniluk erogo mondok okbigigayogon o,” yiluk, yugeragagi.

⁴¹ Eke, At Yesus en, “Erom mbogot vaga menda wambu wagagis An aro,” yugeragagi ako vaga it ap Yakuri menda en naburuk-haburuk yugu dugwit,

⁴² “Ap yoma wai! Ap yi, Yusup abut inis Yesus asin-isa ninilup ako enat yagaliga yi hegep? ‘An mbogot vaga en wambu wagagis o,’ yukneraliga yi, nggarogo yiluk, yukneraliga ombasagwi?”

⁴³ Yugu lagagwama, At Yesus en, “Naburuk-haburuk yugu dugwit, dibanenggetek dogobuk.

⁴⁴ An Nasin lakbani wagagi akoen henendawi wegetek halok andi, An nadoma ari warup mondok dek o. Eke, nadoma ari warup henendawi wokhinipu halok, o hivis oklarugwi andi vaga hiniluk erogo mondok okbigigayogon.

⁴⁵ It ap navi-navi en Ala wene dirup watu dugwit, ‘Ala en yi avakwa ndi avakwa ovok erogo wene mamulirigya dogosogon o,’ yiluk, dirup watugwa. Dirup watugwa atma, An Nasin en wene mamuleraliga ako yi avakwa ndi avakwa enaruk hobaluk, welagwi ako andi, An nadoma wendagwi andiat.

⁴⁶ Wene yukheraliga yi ako andi, it ap en Nenasin Ala eyave inil hagagwarikmu yiluk yukheraligadek. Ata, An Ala werekma en wagagis nadigat nil hagagis.

⁴⁷ Hit henendawi novaga vanggabaluk, avyarat numbutu hiniselok andi, mondok-mondok hiniluk-at dogogup o, yiluk, avyarat yukheraliga,” yugeragagi.

⁴⁸ Yugirigya lagagirik, Yesus en ambi inim yugirigya dugwit, “Erom hiniluk okhinivisiga menda andi, An aro.

⁴⁹ Hit henombawi harumu dugwit, erom inis mana ako nunggu lagagwa ovara, hegek, hambit lagu lagagwa.

⁵⁰ Anderogo ovara, erom mbogot vaga en wambu wandiga yi ako nunggu hiniselok andi, hambusogombuk.

⁵¹ Erom hiniluk okhinivisiga menda mbogot vaga en wambu wagagis An neyave yi aro. Hit ambi saen erom yi ako nunggu hiniselok, mondok-mondok hiniluk-at dogosogon. Hit avakwa wen vaga menda hiniluk okhinivupwak yiluk, erom hit henake bayogon ako andi, An neyave aro,” yiluk, yugeragagi.

⁵² Anderogo yugirigya lagagimu, it ap Yakuri menda ir-it wene watu dugwit, “Ap yoma wai! Ap yi, At inyu nit nggarogo napwak yiluk woknerayogon yagaliga ombasagwi?”

⁵³ Yugu lagagwama, At Yesus en it yugirigya dugwit, “An Ap-At Endaklagagis neyave inim, namuya inim, nenggetek hiniselok, hiniluk mondok dogogupuk, yiluk, eve mondok avyarat yukheraliga.

⁵⁴ Hit ambi saen An neyave inim, namuya inim, nunggu hiniselok andi, mondok-mondok hiniluk-at dogogup. Eke, o hivis oklarugwi andi vaga hiniluk erogo mondok okbigigagwis.

⁵⁵ An neyave ako andi, eve eromat. Eke, namuya ako andi, eve amburup-at.

⁵⁶ Hit ambien An neyave inim, namuya inim, nunggu hiniselok andi, hiren An ninim hunik, eke, Anen hit ninim hunigat dogosogom.

⁵⁷ At mondok iluk agarik Nasin akoen lakbani wagya lagagirik, At okbaniliga vaga An niluk agirik ako ndatak, hit ambien An neyave nunggu hiniselok andi, An okbigigaliga vaga hiniluk-at dogogup o.

⁵⁸ Erom mbogot vaga en wambu wagagis yi, erom inis mana henombawi nunggu lagagwarik, hambit lagu lagagwa ako hak dek. Ata, erom yi, hit ambi saen nunggu hiniselok, mondok-mondok hiniluk-at dogogup o,” yiluk, yugeragagi.

⁵⁹ Wene yugeragagi ako andi, o Kapernaum it Yakuri samban ogasagwima dugwit, yugeragagi.

Mondok-mondok iniluk oginipu dogop wene

⁶⁰ Yugeragagi it At ane welagwi menda nin wisane hunggu lagagwarik, “Wene yi anggin wisane atma, sanien waup embetep?” yiluk, yagagwa.

⁶¹ At Yesus wene andi yugeragagi vaga naburuk-haburuk yugu dugwit enanggon umbutwi ako yedok inugu lagagirik, it yugirigya dugwit, “Wene yukhirigi ako vaga, ‘Nenanggon o,’ yiluk, hekbanup umbutu dugwit yagalagwi?

⁶² An Ap-At Endaklagagis welagagirikmu neyami vaga inggya hinil neyagu dogomundik, hit henendawi nggarogo nombarugup.

⁶³ At Ala Averiniki en avakwa iniluk oginivisiga menda aro. It avakwa wen vaga menda enadik enanye vaga ambi okhedaup meyan aro. At Ala Averiniki en wene An yukheraliga ako vaga hiniluk okhinivisiga menda ovara,

⁶⁴ hit nin andi, henendawi novaga vanggabaluk, avyarat nembetetek higi,” yiluk, yugeragagi. (Yugeragagi ako andi, it ap enendawi At ovaga vanggabaluk, avyarat embetetek menda inim, eke, At Yesus warupwak yiluk, wogerayogon ako inim, o endak Yesus ilup atma, anderogoat yugeragagi.)

⁶⁵ Yugirigya lagagirik, ambi inim yugirigya dugwit, “An Nasin en henendawi wegetek halok, An nadoma warup mondok dek o, yiluk, yukhirigi ako adem andi halok yukhirigi,” yugeragagi.

⁶⁶ Wene andi yugirigya lagagimu, it At ane welagwi menda nin wisane Yesus ambi inim sek erogo nagu lagetek, hekbaluk wunggugwa.

⁶⁷ Wunggu lagagwama, Yesus en At ane welagwi menda 12 ako yugirigya dugwit, “Hit ogo An hekbaniluk wulup ombasagwi a, dek a?”

⁶⁸ Yugirigya lagagimu at Peterus en, “Ai, Nasin! Nit Hat hekbagaluk sa adema laup yiluk yukneraliga? Mondok-mondok niniluk okbininaup wene Harenat yukneraliga.

⁶⁹ Nit nenendawi hovaga vanggabaluk, avyarat umbutu lagurik, At ap ambi mondok sek adik denek menda Ala en lakba wagagi ako, Harat heyalagwi.”

⁷⁰ Yugugu lagagimu, At Yesus en, “Anen hit ap 12 menda mikhinipigis akora? Ap 12 menda mikhinipigis ovara, hit henanggelekma ap ambi Sile abut-at higi o,” yiluk, yugeragagi.

⁷¹ (Yugeragagi ako andi, ap Yudas, Simon Ikariot abut ako, at it ap 12 menda-at ovara, hivis Yesus warupwak yiluk wogerayogon aratma yiluk yugeragagi.)