Yohanes 20 - ALA WENE HIVIS DIRUP WATUGWA

Yesus eyave o wimu dek hagagwa wene

¹ It Yakuri samban okbaluk, nogo yiluk hari minggu vaga hup o yanggok, hwa Maria awi Makdalena menda wimu lagya lagagirik, helep sup larik ako higilek hagagi.

² Higya lagagirik, vupuk Simon Peterus inim, ap Yesus ane waliga menda ambi endawi hunik welagagi ako inim, enadema wagya lagagirik, yugirigya dugwit, “Ap yoma! Nenasin eyave warek wimu en wolok o nggoma balagao nit ninunggut.”

³ Yugirigya lagagimu, at Peterus ap Yesus ane waliga menda ambi ako iperen wunggu lagagwarik, wimu bikhelaguluk,

⁴ iperen vupuk lagu dugwit, At Yesus ane waliga menda ambi akoen Peterus ao hivis okbaluk, at endak wimu akoma ari lagagi.

⁵ Wimu akoma endak ari lagya lagagirik, eyave seve yiluk, il yokhigya lagagirik, yum adup ako adigat nggolalek higya lagagirik, nonggegetek mbup yagagi.

⁶ Mbup iri lagagirik werekma, at ambetaga lagagi Simon Peterus ako, mbikit wimu nunggwigya lagagirik, yum adup nggolalek ako inim,

⁷ eke, yum At Yesus unggumu veralogo bagagwa ako inim, mberen andenam-at hagagi. Yum At unggumu veralogo bagagwa ako yum adup nggolalek ako inim dek, adikmu andenam yunggulogo nduk erogo ndanerek hagagi.

⁸ Eke, higya lagagirik, ao andenam werekma At Yesus ane waliga menda ambi wimu endak lagagi ako ogo, wimu nunggwigya lagagirik, il higya dugwit, avyarat imbitigi.

⁹ Yesus hambuluk lendagwima en, iluk akluk mendek yisogon ako, Ala wene dirup warek welagagi ovara, At ane welagwi menda ako ao dibagetek welagagwa.

¹⁰ Iperen ako inil hugu lagagwarik, enamwa eneyami vaga wagagwa.

Yesus Maria Makdalena adema inuk lagagi wene

¹¹ Enamwa wagusigik, Maria ako wis adema andenam mendek dugwit yup yagya lagagi. Yup yagya dugwit, ut seve erogo, il yokhigya lagagirik,

¹² malaikat menda mberen enasum swa yanggwi mudu ovagak yirik il inigigi. Malaikat mberen ako, Yesus eyave warek bagagwarikmu akoma ambi unggul vikit, eke, ambi isok vikit, andenam horaik inigigi.

¹³ Inugu lagagimu, it malaikat akoen Maria yugugu dugwit, “Hat hwa yi. Nano yiluk yup adigat yasiga?” Yugugu lagagwama, at Maria en, “Dek. It avakwa en an Nasin wolok lagao. Eke, At eyave ogo o nggoma belagao ako an ninggut atma, yup yasiga.”

¹⁴ Yugirigya lagagirik, elose ambukmu endenogo yokhigya lagagirik, At Yesus andenam mendek hagagi ovara, “Yi Yesus-at,” embetetek.

¹⁵ Embetetek werekma, Yesus en at yugugu dugwit, “Hwa yi wai. Hat nggarogo yiluk yup adigat yasiga? Sa belalisiga?” Yugugu lagagimu, at Maria akoen, “Ap yi, yavup yago malogo agarik akoat,” imbita dugwit, “Ai, Nasin. At eyave Harat wolok lagen halok, nggenam belagen yukniru, an welayogon en.”

¹⁶ Yugugu lagagimu, At Yesus en, “Maria wai!” Yugugu lagagimu, at elose endenogo bikhigya lagagirik, Iberani enane vaga, “Raboni,” yugogogi. (“Raboni” yugogogi ako andi, nit nenane vaga “Nasin Ngguru,” yiluk, yugogogi.)

¹⁷ Yugugu lagagimu, At Yesus en, “An Nasin adema ao enggetek atma, vaknerabuk. An naswemuni akoma wene yi yugerelak: ‘An Nasin Ala inim, hit Henasin Ala inim, At adema dagasiga,’ yagas o, yiluk, An naswemuni inilup erogo yugerelak.”

¹⁸ Yugugu lagagimu, at Maria awi Makdalena menda en Yesus ane welagwi menda enadema wagya lagagirik, yugirigya dugwit, “Ap yoma! Nenasin iluk agya lagarik, vage mondok yagas nil higi,” yiluk, yugeragagi. Yugirigya lagagirik, Yesus en at yugogogi ako inim mbilinogo yugeragagi.

Yesus en At ane welagwi menda enadema inuk lagagi wene

¹⁹ O hari minggu andi vaga, o hup agagi hegek, At Yesus ane welagwi menda akoen ap ombok-ombok Yakuri menda enalon en umwa sup hunsi lakbaluk welagagwa. Sup hunsi lakbaluk werekma, At Yesus enanggelekma mendek yi nunggwigya lagagirik, yugirigya dugwit, “Naswemuni, henalon habuk, henendawi sek vaga dogones.”

²⁰ Wene anderogo yugirigya lagagirik, At inggis paku warek ako inim, At eyave segowa warek ako inim, enadema inuk eragagi. Inuk irigya lagagimu, At Yesus ane welagwi menda en, “Nenasin ako yiat,” yiluk, yedok hugu lagagwarik, enendawi adenggen wisane umbutugwa.

²¹ Enadenggen wisane umbutusigik, Yesus en ambi inim yugirigya dugwit, “Naswemuni. Henalon habuk, henendawi sek vaga dogones. An Nasin lakbani wagagi ako hak, Anen hit lakbigiliga o,” yiluk, yugeragagi.

²² Yugirigya lagagirik, elagap agarero enovaga vup erogo bugu dugwit, “Averiniki hedomanes,” yugirigya lagagirik,

²³ “Hiren avakwa enomaduk degerogo bugu hiniselok, degat arisogon. Eke, it enomaduk degerogo bigitek hiniselok andi, enomaduk itok hunigat dogosogon,” yiluk, yugeragagi.

Yesus en Tomas adema inuk lagagi wene

²⁴ Wene yugeragagi ako andi, At ane welagwi menda 12 menda ako ambi Tomas inis ambi Embet Labwa salek ako, eyave dek hegek enadema wagagirikmu,

²⁵ At Yesus ane welagwi menda nin akoen Tomas yugugu dugwit, “Nenasin vage ninil higyo,” yiluk, yugogogwa. Yugogogwa ovara, at Tomas en, “Avyak! An At inggis paku warek omap nil hegetek, eke, inggis paku warekma inim, eyave segowa warekma inim, ninggis mabagetek neyagek, an avyarat ombarisogonbuk,” yiluk, yugeragagi.

²⁶ Yugirigya lagagimu, nogo 7 yikbaluk, hutun it ap Yesus ane welagwi menda Tomas inim umwa sup hunsi larik hegek, Yesus enanggelekma mendek yi nunggwigya lagagirik, yugirigya dugwit, “Naswei henalon habuk, henendawi sek vaga dogones,” yiluk, yugeragagi.

²⁷ Yugirigya lagagirik, Tomas ako yugugu dugwit, “Tomas wai. Hinggis An ninggis yi, vaknitya dugwit, omap andi bikhigya, eke, hinggis welalogo neyave segowa warekma mabagya, oknitya dogomindik, hendawi yunggup yegek ogagya dugwit, avyarat embetetek dogobuk. Ata, hendawi novaga vanggabaluk, avyarat nimbita dogwen,” yiluk, yugogogi.

²⁸ Yugugu lagagimu, Tomas en At yugugu dugwit, “Ai! An Nasin Inis Ombok Ala Harat heyagi o.”

²⁹ Yugugu lagagimu, Yesus en at yugugu dugwit, “Tomas wai! Hat hil neyagya lagindik en, hendawi novaga vanggabaluk, avyarat nembeten. Anderogo ovara, it avakwa nin inil neyagetek dugwit, enendawi novaga vanggabaluk, avyarat numbutuselok andi, enendawi adenggen wisane hugu dogosogom,” yiluk, yugogogi.

Mbuku yi nggarogo yiluk dirup watigi wene

³⁰ Yesus en At ane welagwi menda inivaga inilup arup enalon werek menda nin wisane erogo ogagya lagagi ovara, mbuku yi vaga dirup watitek.

³¹ Ogagya lagagi mbuku dirup warek yi ako andi, hirenen Yesus andi, Ala en At Abut denogo mondok okbagagi Keretus-at, hit avyarat ombarovovok yiluk, wene yi dirup watis. Eke, avyarat umbutu dugwit, Yesus okbigigaliga vaga hiniluk mondok dogovovok yiluk, wene yi dirup watis o.