Yohanes 2 - ALA WENE HIVIS DIRUP WATUGWA

O Hana ap ogwa hondabugusim Yesus en inilup arup enalon werek menda ogagagi wene

¹ Nogo mberen yikbaluk, hutun o Galilea o asoragoma ambi inis Hana hwa agun hondabugusim, Yesus isa andoma inim welagagi.

² Eke, Yesus At ane welagwi menda inim hwa agun hondabugusim akoma warupwak yiluk, enayonggo bagu lagagwama, wagagwa.

³ Wagu lagagwarik werekma, anggur agas ako dek agya lagagimu, Yesus isa en At Yesus yugugu dugwit, “Anggur agas ako ovok dek aga o, neyak.”

⁴ Yugugu lagagimu, At Yesus en, “Hinya. An ogarup ao ari wagetek hegek nano yiluk an ogarup yiluk yuknisiga?”

⁵ Yugugu lagagimu, At isa en ap isogo andok ayelomani yugirigya dugwit, “Aren ambi ‘Yerogo ogarup o,’ yukhirigya halok, andiat ogarop,” yiluk, yugeragagi.

⁶ Horok andenam is owak helep menda 6 hudi ndanerek welagagi. Is owak andi ombok-ombok 100 liter hak adik-adik nutu lagagwa. Eke, is owak andi menda, it ap Yakuri menda en wene hobalek ogagu dugwit, adat vaga yi menda ndi menda hutik yup yiluk ogagu lagagwa.

⁷ At Yesus en ap isogo andok ayelomani ako yugirigya dugwit, “Is owak andoma is elagapaga erogo nodes,” yugirigya lagagimu, elagapaga erogo nutugwa.

⁸ Nutu lagagwama, Yesus en it ap ako yugirigya dugwit, “Yogak, ovok atma, is nin nodogo ap isogo andok andi, wogirilales.” Yugirigya lagagimu, nodogo wogori lagagwa.

⁹ Wogori lagu lagagwama, ap isogo andok akoen is nudik ako ai a, dek a, yiluk, wakhigya dugwit, anggur agas eyave ai hagagi. Ai higya lagagirik, ayelomani ako andenam en nutugwa inilup inigik ovara, at isogo andok andi inggut atma ap hwa hidigya ako yanggup yugogogi. Yanggup yugugu lagagirik wagya lagagimu, yugugu dugwit,

¹⁰ “Avyak! It ninen anggur agas ai weyak menda endak man erogo wogirugu lagarwik, wisane erogo nungguselok, andi okbaluk, hivis amburup aidek weyak menda wogerelagwi. Anderogo ovara, hat andi, anggur agas ai weyak menda hivis wokneraup yiluk, vagago welagen heyagi o,” yiluk, yugogogi.

¹¹ At Yesus en inilup arup enalon werek menda endak ogagagi ako andi, o Galilea asoragoma Hana akoma dugwit, ogagagi andiat. Andi vaga At siyalek agarik ako sigam ogagagi atma, At ane welagwi menda ako enendawi At ovaga vanggabaluk, avyarat umbutugwa.

¹² Andi okbaluk, At Yesus ako At isa inim, aori inim, At ane welagwi menda inim, o Kapernaum lagu lagagwarik, andoma dugwit, ndugwis maren vaga welagagwa.

Yesus en Ala awi valekma avakwa hait inipigi wene

¹³ Akoma werekma, it ap Yakuri Isogo Ombok Vasika Isarup vage horok ari wagya lagagimu, At Yesus o Yerusalem wambu wagagi.

¹⁴ Wambu wagya lagagirik, Ala awi valekma mbumbumu nungguluk, it avakwa en sapi inim, ndomba inim, swa suwa inim, onggo hunggwis, eke, it nin yoparip onggo-onggo ogasagwi ako ogasagwima andenam yoparip onggo-onggo ogagwi, ogagwi il inigigi.

¹⁵ Ogagwi il inugu lagagirik, heda mburin verabagya lagagirik, inggimu dugwit nabirok vaga inatya, ndomba sapi ovok erogo Ala awi valekma en haryogo wibugu, ogagagi. Eke, it ap yoparip onggo-onggo ogasagwi ako enameja ndalek ako avut dagalogo nggibagya, enayoparip ako legogo wema wombabisilin lagya, ogagagi.

¹⁶ Ogagya lagagirik, it swa suwa onggo hunggwis ako yugirigya dugwit, “Swa yi ovok erogo wogonombolok elales. Hit an Nasin awi valekma yoma, o pasar onggo hunisagwima ovagak ogarogo belagwi atma, mondok moga,” yiluk, yugeragagi.

¹⁷ Yugeragagi ako At Yesus ane welagwi menda akoen, Ala wene endak dirup warek ambi enape wenggenggugwa. Wene endak dirup warek enape wenggenggugwa andi yi: “Nasin Ala wai! Hat hawi valek ako nendawi mondok hunik en, sek dogopwak yiluk nendawi idup wisane oklagi o,” yiluk, Yesus ndatak ogagya halok, enape wenggenggugwa.

¹⁸ At Yesus en Ala awi valekma akoma anderogo ogagya lagagimu, it ap Yakuri enasini en At yugugu dugwit, “Hat yi ogagen ako, Ala en yukhogogi vaga ogagen a, dek a, ninilup aruguluk, nggarogo ogarubuk menda ambi nano ogagya heyamwi?”

¹⁹ Yiluk, enane anye erogo yugugu lagagwama, At Yesus en, “Andi halok, Ala awi valek yi, masalogo bas. Masalogo bagu hiniselok, An ndugwis henggam vaga avoloma valisogon.”

²⁰ Yugirigya lagagimu, it ap Yakuri en, “Aga! Nit Ala awi yi, vanggu ninigik tahun 46 hudi ogagagup ovara, haren, ‘An ndugwis henggam-at avoloma valisogon’ yagaliga yi? Wi!” yiluk, vok yugogogwa.

²¹ Anderogo yugogogwa ovara, Yesus en Ala awi valek yugeragagi ako andi, At eyave-at yiluk yugeragagi.

²² Hivis Ala en Yesus hambuluk lendagwima en iluk erogo mendek okbagya lagagimu, At ane welagwi menda en wene yugeragagi andi, enape wenggenggugwa. Enape wenggenggu lagagwarik, Ala wene dirup warek inim, wene Yesus en yugeragagi ako inim, avyarat umbutugwa.

Avakwa enendawi ombasagwi Yesus ilup agarik wene

²³ At Yesus o Yerusalem isogo Vasika isagusim akoma dugwit, inilup arup enalon werek menda ogarit lagya ako avakwa wisane inil hugu lagagwarik, enendawi At ovaga vanggabaluk, avyarat umbutugwa.

²⁴ It wisane At ovaga vanggabaluk, avyarat umbutugwa ovara, At Yesus andi, yi ap ndi ap ovok enandogon ilup atma, “It avakwa yi, avyarat enendawi novaga vanggabanenggetek higi,” imbitigi.

²⁵ It avakwa enendawi ombasagwi ako andi, Yesus ilup agarik atma, ap ambien at ambi ogagya avok vagalogo At yugurup mondok dek aro.