Yohanes 17 - ALA WENE HIVIS DIRUP WATUGWA

At ane welagwi menda enake samban ogagagi wene

¹ Wene andi yugirigya lagagirik, At Yesus elose mbogot vaga ilik lagya lagagirik, Asin yugugu dugwit, “Ai, Nasin! An okneraup ako vage horok ari waga. An Habut en Hat siyabagaigen yiluk, Habut An endak siyabanin.

² An Habut, yi avakwa ndi avakwa ovok erogo vagenombogo dugwit, avakwa woknigigin ako mondok-mondok iniluk oginivigiluk, mondok okbaninggigin.

³ Iniluk mondok-mondok dogop adem andi, yerogo: Ambi andi, it avakwa en, Hat Ala avyarat hadik agindik handogon inilup agwi, eke, ambi andi, An Yesus Keretus Harenen lakbani wagagin ako An neyave inilup agwi, ogasagwi andi, iniluk mondok dogop adem andiat.

⁴ An ogarup andok okbaninggigin ako, mondok atok weralogo ogagi atma, andi vaga o wen vaga yoma Hat hinis siyabagi.

⁵ Anderogo atma, Nasin! O wen ao ogagetek heyagek, Hat niperen dugwit, siyalek welagagis ako wane-wane yogak Hat agindikmu andoma siyabanin.”

⁶ “It avakwa o wen vaga yoma agarwik nin denogo woknigigin ako, Hat Ala ogasiga inilup arupwak yiluk ovok vagalogo yugeragagis. It avakwa woknigigin ako andi, Hat haburi halok-at woknigigin atma, Hat hane yugeragagis akoat ogasagwi.

⁷ Yogak yi ogagek ndi ogagek ogasiga ako, ovok erogo Haren andok okbaninggigin vaga ogasiga ako it inilup aga.

⁸ Hat wene yuknigigin ako ovok erogo yugirigya lagagimu, wogogwa. Wugu lagagwarik, An Hat werekma en avyarat wagagis inilup agagwa atma, Haren An lakbani wagagin ako it avyarat umbutugwa.”

⁹ “An andi it enake samban ogasiga. It avakwa o wen vaga yoma agarwik ako enake samban ogasigadek. Ata, it Hat woknigigin ako andi, Hat haburi atma, enake samban ogasiga.

¹⁰ An naburi andi, Hat haburi, eke, Hat haburi andi, An naburi aro. It ogasagwi ako vaga An siyabanilagwi.

¹¹ An o wen vaga yoma ambi inim dogosogonbuk. Yogak An hadema wandiga ovara, it haburi yi andi, o yoma-at dogosogom. Ai, Nasin! Hat mondok sek adik denek agindik. Hat ninim nenendawi ambiat agurik. Anderogo wane-wane, it Haren woknigigin ako enendawi ambiat dogopwak yiluk, Hat malenombogo dogwen. Hat hinis ombok dugwit, hanye vaga okbaninggigin ako vaga haburi yi, malenombogo dogwen.

¹² It woknigigin ako An ninim dugwit, Hat hanye okbaninggigin ako vaga malenombogo lagi. Malenombogo neyagek, ambi yelemele yegetek ovara, at ambi yelemele yup yiluk endaklagagi ako andi, Ala wene dirup warek ako atma des yupwak yiluk, yelemele yagas.”

¹³ “Yogak andi, An hadema wandiga. It ap hat woknigigin yi, An nendawi adenggen ombasiga ako ndatak, it enendawi adenggen ombok erogo hapwak yiluk, An o wen vaga yoma ao dugwit, wene yi yukhisiga.

¹⁴ Wene yuknigigin ako An vage yugeragagis. Eke, An it avakwa wen vaga menda dek ako hak, it Hat woknigigin ako ogo, wen vaga menda dek. It wen vaga menda dekma, it wen vaga menda en, Hat woknigigin ako enanggon enombarisagwi.

¹⁵ It ap wen vaga menda yoma enanggelekma en Haren haburi adigat nggigilivinok yiluk, yukhisigadek. Ata, Hat haburi it wema menda enanggelekma inigik, at weyak ogasiga akoen weyak okbisa wagya haoen, des erogo malenombogo dogonyok yiluk, yukhisiga.

¹⁶ An it avakwa wen vaga menda wane-wane dek ako hak, it ogo, wen vaga menda wane-wane dek aro.

¹⁷ Hat hane yagaliga andi, avyarat adigat. Eke, hane avyarat ako vaga, it yi Hat hadik hangge denek dogopwak yiluk, denogo betoman.

¹⁸ Harenen avakwa o wen vaga yoma agarwik enadema lakbani wagagin ako hak, it haburi yi, anderogoat avakwa o wen vaga yoma agarwik enadema lakbigis.

¹⁹ Hat hane avyarat ako vaga, it yi Hat hadik hangge denek dogopwak yiluk, An neyave it enake-at denogo batigi.”

²⁰ “It enadik enake adigat samban ogasigadek. Ata, iren wene An navok yugeramwi vaga hivis enendawi novaga vanggabaluk, avyarat nombarumwi ako inimat enake samban ogasiga.

²¹ It ovok erogo enendawi ambiat dogopwak yiluk, enake samban ogasiga. Ai, Nasin! Harenen An hendawi hunik, eke, Anen Hat nendawi hunik ako hak, it nin ninim enendawi ambiat hunik dogopwak yiluk, enake samban ogasiga. Anderogo werekma, it avakwa o wen vaga yoma agarwik akoen Hat lakbani wagagin avyarat nombarupwak yiluk, it haburi yi, ninim hunik dogoguluk, enake samban ogasiga.

²² Hat niperen nenendawi ambiat agurik ako hak, it anderogoat enendawi ambiat dogopwak yiluk, Haren An siyabaninggigin ako ndatak, Anen it vage siyabigis o.

²³ It hivis avyarat nombarusogom ako, enendawi mondok ambiat dambulik dogopwak yiluk, Anen it inim hunik, eke, Haren An ninim hunik agurik. It enendawi mondok ambiat dambulik dogosogom halok, it o wen vaga yoma agarwik en Hat avyarat An lakbani wagagin inilup arusogom. Eke, Hat hendawi hunik okneraliga hak, it anderogoat hendawi hunik oginipigin ako inim, inilup arusogom.”

²⁴ “Ai, Nasin o! Ai, Nasin o! Wen-mbogot yi ao ogagetek heyagek, hendawi hunik oknitya dugwit, siyabaninggigin welagagis. Anderogo hak, An hadema wagya neyalok siyabanisogon. Anderogo atma, it ap woknigigin yien, neyapwak yiluk, An lapim andoma ninim dogop ai, hogop ombasiga.

²⁵ Ai, Nasin! Hat atma nggedok sek adigat ogasiga. It avakwa o wen vaga yoma agarwik akoen Hat Ala inunggut ovara, An andi, Hat nilup aro. Eke, Haren avyarat lakbani wagagin ako, it ap yi, vage inilup aga.

²⁶ Hat Ala havok ako it ap An nane welagwi menda yi, yugirigya lagi. Eke, ambi inim vagalogo yugirigya dogosogon. Hat An hendawi hunik okneraliga ako hak, it anderogoat nendawi-hendawi hunik ogagwi, eke, An it inim hunik wiligya, ogaruguluk Hat havok ambi inim vagalogo yugirigya dogosogon o,” yiluk, At Yesus en samban ogagagi.