Yohanes 13 - ALA WENE HIVIS DIRUP WATUGWA

Yesus en At ane welagwi menda inisok horinipigi wene

¹ O hup heveret Isogo Ombok Vasika vage isaruguluk ogagusigik, At Yesus o wen vaga yoma hekbaluk, Asin adema laup vage horok ari wandiga ilup welagagi. At aburi inim o wen vaga nagu lagagwa ako, endawi hunik oginipu lagagirik, yogak mondok endawi hunik wisane oginivisiga inilup arupwak yiluk, ogagagi.

² At Yesus ane welagwi menda inim erom nunggusim, Sile en ap Yudas Ikariot, Simon abut ako, vage endawima nonggagagirik, Yesus warupwak yiluk yugeraup yiluk, endawima mabagagi.

³ At Yesus ako Asin en yi menda ndi menda ovok erogo vagago dogopwak yiluk, wogogogi ako ilup welagagi. Eke, Ala werekma en wagagi eyami vaga Ala adema laup ako inim, ilup welagagi.

⁴ Ilup werekma, erom nunggusim andenam en mendek iri lagagirik, sogwesum nggolalogo baluk, handuk eyave vaga veralhedagagi.

⁵ Verabaluk, is sogolowak ombok vaga nudik ako sogolowak maduk vaga ndilogo wombabagya lagagirik, At ane welagwi menda inisok horinipu, eke handuk eyave vaga veralek ako is owangga do yupwak yiluk horinipu, oginivit lagagi.

⁶ Anderogo oginivit, Simon Peterus adema ari lagya lagagimu, Peterus en, “Nasin. Hat an nisok hotneraup yiluk, ogasiga? Meyan!”

⁷ Yugugu lagagimu, At Yesus en, “Avyak wai. An yogak ogasiga yi, hat dibaligadek ovara, hivis andi, hilup arisogon.”

⁸ Yugugu lagagimu, at Peterus en, “Haren an nisok hotneraup mondok dek.” Yugugu lagagimu, At Yesus en, “An hisok hokherayogonbuk halok andi, An ninim hunik dogop mondok dek.”

⁹ Yugugu lagagimu, at Simon Peterus en iri dugwit, “Andi halok, Nasin. Nisok adigat hotnerabuk. Ata, ninggis inim, nunggul inim hotneran, Nasin.”

¹⁰ Yugugu lagagimu, At Yesus en, “Ap ambi saen nggamo warek agarik halok, at eyave ovok erogo horek werekma, ambi inim nggamo wakbabuk. Ata, isok adigat hurup andi sek. Hit yi, ovok horek agipik ovara, ap ambiat andi, horekdek agarik,” yiluk, yugeragagi.

¹¹ At warupwak yiluk yugerayogon ako ilup dugwit, “Hit ambi andi horekdek agarik,” yiluk, yugeragagi.

¹² At Yesus inisok hotbisiluk, At asum nggolalek ako yikhidigya lagagirik, avoloma hora yiluk, it yugirigya dugwit, “An okhinipis yi, hit dibelagwi a, dek a?

¹³ Hiren, ‘Nenasin Ngguru wai!’ yuknisagwi ako andi, An henasin Ngguru atma, segat yuknisagwi.

¹⁴ Henasin An mamulheraliga en hit hinisok hothinipis halok, hit ogo anderogoat hit-kit hinisok horinipu dogop segat.

¹⁵ An okhinivisiga yi, wakhegek hit wane-wane ogagu dogovovok yiluk, okhinipis.

¹⁶ Asin sovalek hegek, ayeloman siyalek agarikbuk. Eke, at yonggo lakbisaliga menda sovalek hegek, at yonggo lakba wandiga siyalek agarikbuk aro, yiluk, mondok avyarat yukheraliga.

¹⁷ An wene yukheraliga yi ako hinilup akluk ogagu dogosogom halok, henendawi adenggen wisane hugu dogogup.”

¹⁸ “Anen wene andi hit ovok erogo henake yukheraligadek. Hit Anen denogo bigigis andi, An nilup. An nilup ovara, Ala wene yi ako, ‘At ninim erom naliga ako enat narup embetas o,’ yiluk, Ala wene dirup warek ako atma des yupwak yiluk, agarik atma, atma des yisogon.”

¹⁹ “Wene yi atma des iri halok, hiren, ‘At eyave itok mondok agarik menda higyo,’ yiluk, henendawi novaga vanggabaluk, avyarat nombarovovok yiluk, atma des yegetek hegek, yogak yukheraliga.

²⁰ Hit ambien it An lakbisa wandiga menda ako wogonupu hiniselok, Anat woknembelagwi. Eke, An woknumbutu hiniselok, At lakbani wagagi akoat welagwi, yiluk, mondok avyarat yukheraliga o,” yiluk, yugeragagi.

Yudas ogarup yugeragagi wene

²¹ Yesus en wene anderogo yugirigya lagagirik, At endawi anggin ndun yi nunggwigya lagagimu, wene sigamat yugirigya dugwit, “Hit ambien An narupwak yiluk yugeragwi, yiluk, mondok avyarat yukheraliga.”

²² Yugirigya lagagimu, saen ogarup ova, yukneraliga yiluk, inil vuvu yagagwa.

²³ Inil vuvu yugu dugwit, ap At ane waliga menda ambi Yesus endawi hunik welagagi ako Yesus iperen horaik herarek werekma,

²⁴ at Simon Peterus en, “Sa halok yagaliga, yuguru,” yiluk, inggis sik-sik vaga mbauk erogo yugogogi.

²⁵ Yugugu lagagimu, At ane waliga menda ambi akoen Yesus alilimu ambi inim hondo yilagya lagagirik, yugugu dugwit, “Nasin! Andi sava yegen?”

²⁶ Yugugu lagagimu, At Yesus en, “An roti amburup longgabaluk wogugu neyalok, at ako andiat ombarop,” yiluk yugugu lagagirik, roti amburup vaga longgalogo Simon Ikariot abut Yudas akoat wogogogi.

²⁷ Wogogogi ako, wigya hegek, Sile Yudas endawima nunggwigya lagagimu, At Yesus en, “Yudas wai! Hat ogarup embeten ako hodorogo ogaru,” yiluk, yugogogi.

²⁸ Yugugu lagagimu, it horaik erom nunggwi ako ovok erogo, “Andi nggarogo yiluk yugisiga?” umbutu dugwit, it dibagetek-at welagagwa.

²⁹ Ap Yudas enayoparip yidik ako at bendahara werekma, it ninen umbutu dugwit, “At Yesus en isogo isarup yi menda ndi menda ambi inim huni lapwak yiluk, yugisiga a, ata ap ininggidek halok, nin wogeraup yiluk, yugisiga a?” umbutugwa.

³⁰ Umbutusim, at Yudas ako roti wigya lagagirik, mbikirat winggigi. O ovok hup agagi hegek winggigi.

At Yesus en wene swi menda yugeragagi wene

³¹ At Yudas wunggu hegek, At Yesus en it nin ako yugirigya dugwit, “Avyak! Yogak Ala en An Ap-At Endaklagagis ako siyabanisogon. Eke, An ogagi ako vaga Ala ogo siyabayogon.

³² An ogarisogon vaga Ala siyabagya neyalok, At Ala ogarisogon vaga An ogo, siyabanisogon. Eke, mbikirat siyabanisogon atma yiluk, yagaliga.”

³³ “Ai, naburi! An ambukumat hinim dogomindik, layogon atma, hit belalnetek lasogom ovara, it ap Yakuri menda yugirigya dugwit, ‘An lapim andoma hit laup meyan o,’ yiluk, yugeragagis ako wane-wane, hit yogak ogo anderogoat yukheraliga.”

³⁴ “Wene yerogo ogarup, nderogo ogarup, swi menda yukheraliga ako yi, nendawi-hendawi hunik ogagu dogop andiat. An andi hit nendawi hunik okhinivisiga wane-wane, hiren ogo nendawi-hendawi hunik ogagu dogones.

³⁵ Hit nendawi-hendawi hunik ogasagwi vaga avakwa ovok erogo hit An nane welagwi menda avyarat inilup arusogom,” yiluk, yugeragagi.

Yesus en Peterus ogarisogon menda yugogogi wene

³⁶ Yugirigya lagagimu, at Simon Peterus en, “Hat nggoma laup yiluk yegen o, Nasin?” Yugugu lagagimu, At Yesus en, “An lapim andoma hat yogak niperen laup meyan ovara, hivis andi, namusek lagun.”

³⁷ Yugugu lagagimu, At Peterus en, “Ai, Nasin. An yogak niperen laup dek nano yiluk yuknigin? An Hat hake hambup sek ombasiga atma.”

³⁸ Yugugu lagagimu, At Yesus en, “Avyak! Hat avyarat An nake hambup sek ombasiga yi? Ayam ane ao yegetek hegek, hat hane henggam vaga, ‘Yesus andi, an ninggut,’ yisogon, yiluk, mondok avyarat yukhisiga,” yugogogi.