Yohanes 11 - ALA WENE HIVIS DIRUP WATUGWA

Lasarus hombagagi wene

¹ Ap ambi inis Lasarus, arupwi Maria aot Mareta iperen inim enawi ambekma Betania-at welagagwarikmu, at Lasarus ako aup idup ovaga agagi.

² Hwa Maria ako andi, Nenowa Inis Ombok Yesus isok vaga amburup amben eyave sek menda ndibaluk, iris vaga hotigi ako. At owa Lasarus ako aup idup ovaga agya lagagimu,

³ aori hwiyavivak mberen akoen enane sadi erogo lakbugu dugwit, “Nenasin o. Ap Hat hendawi hunik Lasarus ako aup idup wisane agarik,” yiluk, Yesus yuguri lapwak yiluk, lakbogogwa.

⁴ Lakbogogwa ako lagu lagagwarik, yugugu lagagwama, Yesus aruk hunggu lagagirik, it yugirigya dugwit, “At Lasarus aup idup agarik andi, mondok hambigiluk ogasigadek. Ata, An ambi ogagya neyalok avakwa en Ala siyabagwi, Abut An ogo siyabanunggwi, ogarupwak yiluk, aup idup oklaga,” yiluk, yugeragagi.

⁵ At Yesus en Mareta inim, at owa Maria inim, Lasarus inim, mondok it inim endawi hunigat welagagi.

⁶ Endawi hunigat welagagi ovara, at Lasarus aup idup agagi ako hunggu lagagirik, endawi en ndugwis mberen andoma-at mbup yagagi.

⁷ Andoma ndugwis mberen mbuverek welagagirik, At ane welagwi menda yugirigya dugwit, “Neneyami vaga o Yudea lasogom.”

⁸ Yugirigya lagagimu, iren At yugugu dugwit, “Ngguru wai! It ap Yakuri en, vage helep vaga haruguluk ogagu sugurikmu akoma hegek-at, nggarogo yiluk, Yudea laup adigat yagaliga yi?”

⁹ Yugugu lagagwama, At Yesus en, “O ndugwis ambiat yanggo yagas vaga, mo il daga wagya lagarik, huruk yi lagya hegek mo il 12 jam ari landiga akora? Eke, andi halok, it ap o dingga vaga laguselok, o awiya vaga lendagwi atma, inisok himbit inirisogonbuk.

¹⁰ It ap o hup hwiserek vaga laguselok andi, o awiya dek hwiserek vaga lagusim, inisok himbit initu hegek, nagu dogosogom.”

¹¹ Anderogo yugirigya lagagirik, wene ambi yugirigya dugwit, “Nenaswe Lasarus ako, un nogo yiliga atma, Anen iluk okbelayogon.”

¹² Yugirigya lagagimu, it At ane welagwi menda en, “Nenasin. At un nogo yiliga halok andi, sek arisogon,” yiluk, yugogogwa.

¹³ At Yesus en Lasarus hombagas atma yiluk yugeragagi ovara, iren, “Un nogo yugu halok yagaliga,” umbutu lagagwama,

¹⁴ Yesus en sigam erogo yugirigya dugwit, “Lasarus ovok hombagas.

¹⁵ Eke, hit henendawi novaga vanggabaluk avyarat nombarovovok yiluk, An andoma welagetek yoma welagi ako hit henake-at welagi atma, An segat welagi ombasiga. Yogak andi, at adema lasogom.”

¹⁶ Yugirigya lagagimu, at Tomas inis ambi Embet Labwa salek akoen aswemuni yugirigya dugwit, “Nit At ninim hambugen yiluk, lasogom,” yugeragagi.

“Hombagagwa menda iniluk erogo mondok okbisaliga menda An aro,” yugeragagi wene

¹⁷ Yugirigya lagagimu, Yesus wagya lagagirik, avakwa hambuguselok, wimu bisa lendagwima, at Lasarus akoma hegek, ndugwis 4 agarik aruk hunggigi.

¹⁸ O Betania andi, kota Yerusalem sup horok 3 kilometer wane-wane welagagirikmu,

¹⁹ it Yakuri menda wisane erogo Mareta Maria iperen enowa hombagagi ako, enendawi aik wakbisaup en yiluk, enadema biginisa lagagwa.

²⁰ Biginisa lagu lagagwarik, werekma, at Mareta en Yesus wagya hunggu lagagirik, Maria umwa horaik hegek, at wasim adema winggigi.

²¹ Adema wunggu lagagirik, Yesus yugugu dugwit, “Ai, Nasin! Hat yoma mbikit waklinmu en, an nowa hambilipuk.

²² Hambilipuk ovara, yogak ambi nano menda Haren Ala nggino yugugu heyalok, Aren wokhirisogon andi, an nilup aro.”

²³ Yugugu lagagimu, Yesus en at yugugu dugwit, “Hat howa ako iluk agya dogomindik mendek yisogon,” yiluk, yugogogi.

²⁴ Yugugu lagagimu, at Mareta en, “Yu! At o hivis avakwa iniluk erogo mondok okbisaup ako amor ari wagya dugwit iluk akluk mendek yugwi andi an nilup.”

²⁵ Yugugu lagagimu, Yesus en at yugugu dugwit, “Avakwa iniluk erogo mondok okbisaliga menda An atma, avakwa saen enendawi novaga vanggabaluk, avyarat numbutuselok, hambusogom ovara, iluk akluk, mendek yusogom.

²⁶ Eke, avakwa sanien iniluk dugwit, enendawi novaga vanggabaluk, avyarat numbutuselok andi, mondok-mondok hambusogombuk. Wene yi ako avyarat ombasiga a, dek a?”

²⁷ Yugugu lagagimu, at Mareta en, “Yu aga, Nasin. Ala Abut denogo mondok okbagagi Keretus o wen vaga yoma warup ako, Harat hombasiga o,” yiluk, yugogogi.

Yesus yup yagagi wene

²⁸ Anderogo yugugu lagagirik, at Mareta owa Maria ako mbauk erogo yanggup yugiri lagya lagagirik, Maria ako wagya lagagimu, yugugu dugwit, “Maria wai. Nenasin Ngguru adumu akilisim dugwit, yanggup yukhisiga.”

²⁹ Yugugu ako Maria aruk hunggu lagagirik, mbikit mendek iri lagagirik, Yesus adema lagagi.

³⁰ Yesus ako o asoragoma akoma ao nonggegetek Mareta abi manggok lagya lagagirik iperen avuk agu lagagwarik andenam ao werekma adema lagagi.

³¹ Eke, it ap Yakuri menda Maria inim umwa dugwit, enendawi aik wakbagwi akoen Maria mbikit mendek erogo wunggu inil hugu lagagwarik, “at owa huvut okbagarwikmu akoma yup yari landiga ai” yiluk, amusek lagagwa.

³² Amusek lagusim, hwa Maria Yesus adema lagya lagagirik, Yesus avema seve yiluk, “Ai, Nasin! Hat yoma mbikit waklinmu en, an nowa hambilipuk.”

³³ Yugugu lagagimu, Maria inim, it ap Yakuri menda Maria amusek lagagwa ako inim, yup yagwi ako Yesus inugu lagagirik, “Yi oklaga nanggon,” yiluk, endawi enabwa eve iya erogo imbitigi.

³⁴ Endawi enabwa imbita dugwit, “Ap yoma! At eyave nggoma balagep?” Yugirigya lagagimu, “Bikhelaguluk, oma, Nenasin.”

³⁵ Yugugu lagagwama, Yesus yup yagagi.

³⁶ Yup yagya lagagimu, it ap Yakuri menda en, “Avyak yoma wai! At Lasarus endawi hunik wisane atma ayup yasiga yi hinil hanes o,” yagagwa.

³⁷ Yugusigik ovara, it ninen andi, “A! At yi, ap il mbuk sek ogagagi akoen at Lasarus hambigya haoen, iluk hegek, sek ogaklip ovara, ogagabuk andi, nggarogo yiluk!” yagagwa.

Ap Lasarus iluk erogo mondok okbagagi wene

³⁸ Yugu lagagwama, Yesus ambi inim endawi enabwa eve iya erogo imbita dugwit, Lasarus hambigya lagagimu balagagwarikmu akoma-at lagagi. Balagagwa ako, wimu helep sup larik-at werekma,

³⁹ Yesus en, “Helep sup larik andi, legogo belales.” Yugirigya lagagimu, at hombagagi aot Mareta akoen, “Nasin. Hombagas hegek nogo henggam yigarikmu, vage amben aga.”

⁴⁰ Yugugu lagagimu, Yesus en, “Hat hendawi novaga vanggabaluk, avyarat nimbita heyalok, Ala inis mondok siyalek dugwit, ogagya hayogon o, yukhigis akora?”

⁴¹ Yugugu lagagimu, helep legogo lakbagu lagagwama, Yesus ako elokwe mbogot vaga ilik lagya lagagirik, “Nasin. Hat An nane vage hunggin atma wa yukhisiga.

⁴² Anen ambi nggino yukhugu neyalok, Hat An nane hulisiga ako, An mondok nilup ovara, it avakwa ugun mendek agarwik yi ako, Haren lakbani wagagin avyarat hombarupwak yiluk, yukhisiga.”

⁴³ Yugugu lagagirik, At ane ombok vaga, “Lasarus wai! Wuluma.”

⁴⁴ Yugugu lagagimu, at hombagagi ako inggis-isok kain vaga virik-verek ogarek, elokwe ogo kain vaga ndinggi-vanggis erek hegek wulu wagagi. Wulu wagya lagagimu, At Yesus en it yugirigya dugwit, “Nagu dogopwak yiluk, yum veralek andi, wikhanes,” yiluk, yugeragagi.

Yesus warup umbutugwa wene

⁴⁵ Yugirigya lagagimu, it Yakuri menda wisane Maria adema lagagwa akoen Yesus ogagya inil hugu lagagwarik, enendawi Yesus ovaga vanggabaluk, avyarat umbutugwa.

⁴⁶ Eke, it ninen, Varisi menda enadema lagu lagagwarik, Yesus ogaga ako, mbilinogo yugeragagwa.

⁴⁷ Mbilinogo yugurugu lagagwama, it ap imam-imam enasini inim, it ap Varisi menda inim, iren ap ombok-ombok Yakuri enawene amburup mbalisagwi menda ako homakbugu lagagwarik, yugurugu dugwit, “Ap andi, nggarogo ogarubuk menda wisane-at ogarit landiga atma, niren nggarogo ogaruk?

⁴⁸ At anderogo ogagya dogop meyan. Niren At ogarit lagya dogopwak yiluk hekbagu niniselok, it avakwa ovok erogo enendawi At ovaga vanggabaluk, avyarat umbutu dugwit, amusek nagu dogosogom andi, nenanggon. Amusek nagu dogosogom halok, it ap Oroma menda en wagu dogomundik, nit avakwa neneyave sovabininggu dugwit, Ala awi valek masali wagu saoen, nggarogo ogaruk?” yiluk, yagagwa.

⁴⁹ Yugu lagagwama, tahun andi vaga ap it menda ambi imam-imam enasin inis ombok welagagi inis Kayapas akoen, “Ap yoma wai! Hit mondok hinunggut dugwit, yugu hinisaliga.

⁵⁰ Avakwa nit menda neneyave ovok erogo degerogo bininaup andi dek. Ata, ap ambien avakwa nit menda ovok nenake hambup andi, sek yi helagwi?” yiluk, yugeragagi.

⁵¹ Wene yugeragagi ako andi, at adik endawi wenggebaluk en yugeregetek. Ata, tahun andi vaga it imam-imam enasin inis ombok dugwit, ogasigama, Ala en at okbagya hegek, hivis At Yesus avakwa Iserali menda enake hambup atma yiluk, Ala ane yugeragagi.

⁵² Avakwa Iserali menda enake adigat andi dek. Ata, it ap Ala aburi yi awi ndi awi sak yagagwa menda agarwik ako homakbugu dogomindik enendawi ambiat dambulik dogop enake hambup atma yiluk, yugeragagi.

⁵³ Anderogo yugirigya lagagimu, o andi hudi, it ap ombok-ombok Yakuri menda en Yesus mondok warup yiluk, enendawi ambiat okbaluk wene mbanggu lagagwa.

⁵⁴ Wene anderogoat mbanggugwarikmu, Yesus avakwa Yakuri menda wisane enelokwema ambi inim nagu lagetek. Andoma en o kota ambi inis Everaim harumu horok andoma lagagi. Lagya lagagirik, At ane welagwi menda inim andoma-at welagagwa.

⁵⁵ Werekma, it Yakuri isogo ombok Vasika isarup ako vage horok ari wagagi. Ao isagetek inigik, it avakwa Yakuri menda enandogon Ala sek nenombarupwak yiluk, ininggis-eneyave adat vaga hutu lagagwa ako hak, eneyave hurupwak yiluk, enamwa adik-adik akoma en o Yerusalem wagagwa.

^56-57 Wagu lagagwarik, it ap imam-imam enasini inim, it ap Varisi menda inim, iren, “At eyave nggenam agarik ako dibagu dogomundik, eyave nit vagarugen yiluk, yukneramano,” yiluk, avakwa yugeragagwa. Yugeragagwa andien, it avakwa en Ala awi valek mbumbumu andoma inil yambenggu dugwit, “At Yesus isogo isagusim wasogon a, dek a? Hit nggarogo ombasagwi?” yiluk, ir-it wene mbanggugwa.