Yohanes 1 - ALA WENE HIVIS DIRUP WATUGWA

Eve Wene andi, Ap-at agagi wene

¹ O muk endak erogo wen-mbogot ogagetek hegek At Eve Wene akoat welagagi. Eve Wene ako andi, Ala inimat welagagi. Eke, Eve Wene andi, eyave Ala-at welagagi.

² At ako o muk endak erogo wen-mbogot ogagetek hegek Ala inimat welagagi.

³ Ala en yi menda ndi menda ovok erogo ogagagi andi, At Eve Wene enat ogagagi. Yi menda ndi menda ogagagi ako, ambiat ogo At Eve Wene en ambi ogagetek andi mondok dek o. Ovok erogo Aren adigat ogagagi.

⁴ Iniluk oginivisiga menda adem Eve Wene Arat welagagi. Eke, iniluk oginivisiga menda adem akoen avakwa enendawima awiya okbisaliga.

⁵ Awiya akoen o hwiserekma awiya ogasiga. Eke, o hwiserek akoen o awiya ako o hwis erogo bagetek-at agarik.

^6-7 Avakwa enendawima awiya oginivisiga menda ako, ap ilup menda ambien vagalogo yugirigya dogopwak yiluk, Ala en ap ambi inis Yohanes lakba wagagi. At Yohanes yugirigya vaga yi avakwa ndi avakwa ovok erogo enendawi awiya ako ovaga vanggabaluk, avyarat ombarupwak yiluk, vagalogo yugeragiluk wagagi.

⁸ Avakwa enendawima awiya oginivisiga menda ako andi, at Yohanes dek. At dek ovara, At awiya oginivisiga menda ako avok adigat vagalogo yugirigya dogogiluk wagagi.

⁹ Awiya eyave itok agarik menda o wen vaga yoma nunggu wigya dogomindik, yi ap ndi ap enendawima awiya oginipu dogop ako Arat wambu wagagi.

¹⁰ At o wen vaga yoma wambu wagya lagagirik, welagagi. O wen-mbogot yi, Arat ogagagi ovara, it avakwa wen vaga yoma agarwik ako At yedok hegetek-at welagagwa.

¹¹ At amwa awerek-at wambu wagagi ovara, it ap At owa-asin akoen At eyave wegetek-at welagagwa.

¹² At eyave wegetek-at welagagwa ovara, it nin enendawi At ovaga vanggabaluk, avyarat umbutu lagagwarik, wagagwa. It nin enendawi At ovaga vanggabaluk, avyarat umbutu lagagwa ako At Eve Wene akoen yugirigya dugwit, “Hit Ala aburi-at dogogup o,” yiluk, it ovok erogo At Ala aburi okbigigi.

¹³ It avakwa Ala aburi okbigigi ako, avakwa enaburi endaginivisagwi hak endaginipitek. Eke, avakwa wen vaga menda en, “An nabut endarisogon,” umbutu dugwit, endaginivisagwi hak endaginipitek. Ata, Ala enat endaginipigi.

¹⁴ At Eve Wene ako, Ap-At agya lagagirik, ninimat welagagi. Ninim dugwit, At mondok siyalek-at hagagup. At Ala Abut adik ambengga atma, Asin en siyabagya hagagup. Eke At ninim dugwit, endawi hunik en okbininggu, wene mondok des erogo yuknirigya, ombok erogoat ogagya hagagup.

¹⁵ At Yohanes en ane ombok vaga At Ala Abut ako avok vagalogo yugirigya lagagi. Vagalogo yugirigya dugwit, “‘Ap ambi nambetaga warisogon o,’ yiluk, yukhirigya lagagis ako, At yi aro. At yi an nambetaga waga ovara, an endaklagatek neyagek, At endak erogo welagagi atma, an andi maduk. Eke, At mondok ombok aro,” yiluk, vagalogo yugirigya lagagi.

¹⁶ Nit ovok erogo At Ala mondok nenabwa imbita dugwit endawi hunik en okbininggik, okbininggik adigat ogasiga.

¹⁷ Ala en wene “Yerogo ogarup, nderogo ogarup,” Musa yugugu halok, Musa en yukneragagi ovara, Ala endawi hunik en okbininaliga ako, At Yesus Keretus vaga enat, okbininaliga. Eke, avyarat wene des erogo vagalogo yukneraliga andi ogo, At Yesus Keretus enat yukneraliga.

¹⁸ Avakwa en andi, Ala mondok inil helagudek ovara, Ala Abut adik ambengga ako, At eve Ala-at, Asin inim mondok hunik dugwit, Ala avok vagalogo yukneragagi.

At Ima Wombabisaliga menda Yohanes en, “An Keretus dek o,” yiluk, yugirigya lagagi wene

¹⁹ At Yohanes en wene Ala en avakwa enagap wendarupwak yiluk ap ambi denogo lakba warisogon ako avok iri lagagi. Irisim, it ap Yakuri enasini en Yohanes hemekhapwak yiluk, ap imam-imam inim, ap Lewi menda inim, o Yerusalem en Yohanes adema lakbisa wagagwa. Lakbisa wagagwa ako, irenen, “Hat ap sa?” Yohanes hemekhapwak yiluk, lakbisa wagagwa.

²⁰ Lakbisa wagagwa ako Yohanes adema wagu lagagwarik, “Hat ap sa o?” yugugu lagagwama, Yohanes en mbikit yugirigya dugwit, “Dek. At Mesias avakwa enagap wendarupwak yiluk Ala en lakba warisogon yagagi ako, an dek,” sigam vagalogo yugeragagi.

²¹ Yugirigya lagagimu, it akoen at Yohanes yugugu dugwit, “Andi halok hat andi sa? Hat ap Elia ako ai?” Yugugu lagagwama, at Yohanes en, “Ap Elia ako andi ogo, an dek.” Yugirigya lagagimu, iren, “Andi halok, ap Navi Ala en yugugu hegek yugeragiluk lakba warisogon yagagi ako, harat ai?” Yugugu lagagwama, aren iri dugwit, “Andi ogo, an dek.”

²² Yugirigya lagagimu, iren at yugugu dugwit, “Andi halok, hat andi sa? It lakbinini wagao ako wene wolok yugeralapim yukneran! Hat hadigat havok andi, nggarogo yugeraliga? Yukneran.”

²³ Yugugu lagagwama, at Yohanes en, “Ap navi Yesaya en o endak iri dugwit: ‘Ap ambi harumu avakwa dekma yanggup yugirigya dugwit, “At Nenasin Ala warup sup amorerogo yagu dogones o,”’ yagagi, endak Ala wene dirup warek ako andi, an aro,” yiluk, yugeragagi.

²⁴ At hemiduguluk lakbisa wagagwa ako andi, ap Varisi menda inimat lakbisa wagagwa.

²⁵ It lakbisa wagagwa Varisi menda akoen Yohanes yugugu dugwit, “Haren iri dugwit, ‘Avakwa enagap wendarupwak yiluk Ala en lakba warisogon andi, an dek. Ap Elia ako ogo an dek. Eke, ap Navi Ala en yugugu hegek yugeragiluk lakba warisogon yagagi ako ogo, an degat,’ yegen ovara, nggarogo yiluk avakwa ima wombabisilin naliga?”

²⁶ Yugugu lagagwama, at Yohanes en, “Dek o. An avakwa ima wombabisaliga ovara, ap ambi hit dibagetek hinigik, wambu wagagi henanggelekma agarik o.

²⁷ At ako andi, nambetaga wasogon ovara, At ap ombok atma, anen At aropato yirik ako ogo an nggolalup meyan,” yiluk, yugeragagi.

²⁸ Wene yugeragagi ako, at Yohanes avakwa ima wombabisaligama is Yorodan elavikit o Betania akoma dugwit, yugeragagi.

“ Ndomba eyak Ala en lakba wagagi yi hanes,” yugeragagi wene

²⁹ Nogo yiluk, hutun Yesus ako, at Yohanes adema wagya il hagagi. Il higya lagagirik, it avakwa yugirigya dugwit, “Avakwa wen vaga yoma agarwik enomaduk degerogo bisagiluk Ndomba Eyak Ala en lakba wagagi ako wandiga yi hinil hanes.

³⁰ Ap ambi an nambetaga wasogon ako an ao endaklagatek neyagek, At endak welagagi atma, an andi horok maduk. Eke, ‘At mondok ombok aro,’ yiluk yukheraliga ako eyave yi aro.

³¹ An ogo At dibagetek-at welagi ovara, it avakwa Iserali menda en At inilup arupwak yiluk, an ima wombabisilin wagi ako,” yiluk, yugeragagi.

³² Yugirigya lagagirik, at Yohanes vagalogo yugirigya dugwit, “Ala Averiniki swa suwa ovagak mbogot vaga en wigak-wigak yagan wambu wagya lagagirik, Yesus ovaga horaik agarik nil higi.

³³ Anenen At dibagetek-at welagi. Dibagetek-at welagi ovara, an avakwa ima wombabisaup yiluk, lakbani wagagi Ala akoen, ‘Ala Averiniki At ambi ovaga hora yi wambu wagya dogomindik dogosogon hil hayogon ako andi, Araro. At ako andi, Ala Averiniki avakwa enovaga wombabisa warisogon ako aro,’ yuknogogi.

³⁴ Yuknogogi ako, an At nil higya lagirik, ‘Yi Ala Abut aro,’ yiluk, vagalogo yukheraliga o,” yiluk, yugeragagi.

It enendak Yesus ane wagagwa wene

³⁵ Nogo yiluk, hutun Yohanes it at ane welagwi menda mberen inim akoma welagagwa.

³⁶ Inim dugwit, Yesus lagya il higya lagagirik, “Ap yoma wai! Ndomba eyak Ala en lakba waga andi, hinil yokhanes!”

³⁷ Yugeragagi at ane welagwi menda mberen ako enaruk hunggu lagagwarik, Yesus amusek wagagwa.

³⁸ Amusek wagwi ako Yesus elose endenogo biginigu dugwit, “Hit nano belalit wagep?” Yugirigya lagagimu, iren, “Rabi wai! Hat hamwa o nggoma agindik?” yiluk, yugogogwa. (“Rabi wai,” yugogogwa andi, nit nenane vaga, “Ngguru wai,” yiluk yugogogwa.)

³⁹ Yugugu lagagwama, Yesus en, “Bikhelaguluk, omanes,” yugeragagi. Yugirigya lagagimu, inim lagu lagagwarik, o howam-howam mo il jam 4 vage ari lagya lagagimu, At amwa inil hugu lagagwarik, inimat welagagwa.

⁴⁰ Ap mberen Yohanes en yugeragagi ako hobaluk, Yesus musek lagagwa ako ambi andi, inis Andereas. At Andereas ako, Simon Peterus aot akoat.

⁴¹ At Andereas akoen owa Simon Peterus belalit lagya lagagimu mbikit il heyakbagya lagagirik, yugugu dugwit, “Simon wai! Mesias ako vage waga ninil higyo,” yiluk, yugogogi. (Mesias, yugogogi ako andi, nit nenane vaga Ala en denogo mondok okbagagi Keretus aro, yiluk yugogogi.)

⁴² Yugugu lagagirik, Andereas en at Simon ako wolok Yesus adema lagya lagagimu, Yesus il higya lagagirik, at yugugu dugwit, “Yohanes abut hat Simon ovara, hinis Kepas-at yukhugu dogosogom o,” yiluk, yugogogi. (Inis Kepas it Aram enane vaga yugogogi ako andi, it ap Yunani enane vaga, “Peterus o,” yugogogi.)

Yesus en Pilipus Nataniel iperen yanggup yugeragagi wene

⁴³ Nogo yiluk, hutun At Yesus o Galilea laup endawi wenggenggu lagagirik, lagya dugwit, ap Pilipus heyakbagya lagagirik, yugugu dugwit, “Ninim laguluk, oma,” yiluk, yugogogi.

⁴⁴ At Pilipus amwa andi, Andereas, Peterus iperen inim enawi ambekma o kota Mbesaida andoma-at welagagwa.

⁴⁵ “Ninim laguluk, oma,” Pilipus ako yugugu lagagimu, Pilipus en ap Nataniel belalit lagya lagagimu, il heyakbagya lagagirik, yugugu dugwit, “Nataniel wai! ‘At ambi warisogon o,’ yiluk, Musa en Ala wene dirup watya, eke, it ap navi-navi en ogo, dirup watwis, ogagagwa eyave ako, vage waga ninil higyo. At andi, inis Yesus, awi Nasaret menda, Yusup abut araro.”

⁴⁶ Yugugu lagagimu, at Nataniel en, “Avyak! Sek menda ambi o Nasaret andoma en warup atma yiluk yagaliga yi?” Yugugu lagagimu, at Pilipus en, “Anderogo ovara, hat hil bikhanok yiluk oma.”

⁴⁷ Yugugu lagagimu, Yesus en ap Nataniel At adema wagya il higya lagagirik, at avok iri dugwit, “Ap yi avyarat Iserali menda, at ane mberen mondok yagaligadek yi hanes o.”

⁴⁸ Iri lagagimu, at Nataniel en, “Hat nggarogonggan an neyave hilup agen?” Yugugu lagagimu, At Yesus en, “Pilipus ao yanggup yukhigitek hegek, hat o yo widis adema vage nil heyagi.”

⁴⁹ Yugugu lagagimu, at Nataniel en, “Ngguru wai. Ala abut avakwa Iserali Enowa Inis Ombok Harat heyagi o.”

⁵⁰ Yugugu lagagimu, At Yesus en, “‘Hat yo widis adema heyagi o,’ yiluk, yukhigis vaga hendawi novaga vanggabaluk, avyarat nembeten yi? Hat ogagya hegen yi andi, maduk ogagya hegen ovara, hivis andi, ombogat ogagya hayogon.”

⁵¹ Yugugu lagagirik, ambi yugugu dugwit, “Hivis mbogot heyakbaluk, it Ala yonggo lakbisa wendagwi malaikat akoen An Ap-At Endaklagagis novaga wambu wagwi, mbogot vaga unggwi, ogagwi inugu dogogun o, yiluk, avyarat yukhisiga o,” yiluk, yugogogi.