Yakobus 5 - ALA WENE HIVIS DIRUP WATUGWA

Ininggis werek menda hurimbis yugeragagi wene

¹ Hit ap hininggis werek yi, henaruk hunggu dogwes. Hit iduven yagan wakhidugu dogop vage vanggo yi wandiga atma, yup-na yugu dogwes.

² Henangge iya ako weyak lagya, henasum sek ako, hudu-hudup en elo mbanggya,

³ henayoparip mbusi emas inim, perak inim, vage isip bali landiga. Henayoparip isip bagas andi vaga, henanggidik en, hwilakbetaluk welagagup ako, sigam arisogon. Eke, isip baliga hak, hit henagap anderogoat, hali en nenggek layogon. O hivis oklarup ako vage vanggo yi wandigama, yi menda ndi menda henendawi hunik wonggalogo betugu lagagupikmu, henanggadi en henayup yakhidugu dogosogom.

⁴ Wi! Iren hit heneyavup okbigigelagwi ako, onggo wane-wane wogirugu lagetekma, winimuk yukherelagwi. It nin heneyavumu en enggen mbalogo wolok wokhera wendagwi ako, inim onggo sek erogo wogeregetekma, winimuk yukherelagwi andi, At Anye Adigat Agarik Nenasin Ala ako, vage aruk hulisiga.

⁵ Hit wen vaga menda henangge-henangge vaga sek adigat dogop umbutu dugwit, henendawi hogop menda adigat amusek nagu lagagup ako. Wam amok werek agya halok, naguluk wasagwi ako hak, hit hininggis werek okhedelagwima, onggo hinirisogon.

⁶ It avakwa enendawi sek akoen wene onggo yukheregetek inigik, hiren henane hulugat enovaga bisiluk, initu lagagup.

Anggin enovaga agya hegek, enendawi horaik dugwit, samban ogagu dogop wene

⁷ Anderogo atma, nowa-nasin, Nenowa Inis Ombok warisogon atma, henendawi hora yiluk dogwes. Ap ambien erom awi yakbagya lagarik, musu higya, hivi higya, ogagya dugwit, lengge yupwak yiluk endawi hora yiluk, sok haliga ako dibas.

⁸ Andi wane-wane, hit ogo henendawi horaik dogwes. Nenasin warup ako vage vanggo yi wagarikmu, henendawi wadokdek okbetaluk dogwes.

⁹ Nowa-nasin o. Ala en weyak onggo henovaga okbigiga wagya haoen, henane mbaket yugu dugwit ap ambi en ambi avok mbanggik ogagu dogobuk. Hinilup dogop! Nenowak dilisogon ako andi, vage warigiluk sup mbanggutmu mendek agarik!

¹⁰ Nowa-nasin. It ap o endak erogo Ala en yugirigya hegek wene yugurugu lagagwa navi-navi ako, wiyiknom-weyaknom okbugusigik, enendawi horaik wadokdek dugwit yugurugu lagagwa ako hak, hit il wakhegek ogagu dogwes.

¹¹ It anggin enovaga agya hegek, enendawi horaik iniselok, Ala adenggen enovaga bugu lagagi ako ninilup. Ap Ayup inim anggin ovaga agya hegek, endawi horaik wadokdek welagagi ako andi, ovok henaruk hunggugup. Ala en avakwa ovok enabwa en sek okbisaliga atma, ap Ayup ogo anggin ovaga agya hegek endawi hora yiluk mondok wigya lagagimu, Ala en atok vaga okbagagi ako andi, hinilup aro.

¹² Anderogo atma, nowa-nasin, an wene eve iya ambi yukherayogon o. Ala inis ugun yup andi moga. Mbogot inis inim, wen inis inim, yi menda ndi menda inis ovok erogo inis vaga “Yukheraliga o,” yiluk, hanum mbalogo yugeraup andi moga. Hit weyak yagalagwi vaga, Ala en weyak onggo henovaga bugugu haoen, “E o,” imbita halok andi, “E o,” at yup. Eke, “Dek o,” imbita halok andi, “Dek o,” yup.

¹³ Ap ambi henanggelekma en anggin-mbanggin ovaga agya halok, samban ogagya dogopwak. Eke, ap ambi endawi adenggen imbita halok, ndawi vaga Ala inis siyabagya dogopwak.

¹⁴ Eke, ap ambi aup idup warek halok, ap Ala aburi vagenombogo agarwik menda enayonggo yugeraup. Enayonggo yugurugu dogomundik, waguselok, ap aup warek ako amburup ovaga ndibaluk, Ala inis vaga ake samban ogagu dogopwak.

¹⁵ Eke, it enendawi Ala avyarat umbutu dugwit samban ogaguselok, Nenasin en ap aup warek ako legego sek okbayogon. At weyak ogagya halok, weyak ako dek okbayogon o.

¹⁶ Anderogo halok, hit weyak ogasagwi ako, at ambien at ambi adema aruk holek hegek vaganggwis, at ambien at ambi ake samban ogagya, ogagu dogomwi vaga, aup idup okhinipu halok, sek okhinipu dogosogon. Ap ambi endawi mot mondok sek Ala inim hunik dugwit samban ogagya halok, Ala anye mondok iya atma, atma ogarisogon o.

¹⁷ At ap Elia andi, avakwa nit ndatak-at welagagi. Aren “Musu wambu warubuk,” yiluk, ane avyarat des erogo samban ogagagirikmu, musu wen vaga wambu wagetek hegek, tiga tahun okbaluk, saut enam hudi welagagi.

¹⁸ Andi okbaluk, hivis samban ogagya lagagimu, musu ombok erogo wambu wagya dugwit, yo-heda awi ako mondok iluk agya dugwit, enggen yogogi.

¹⁹ Nowa-nasin. Ap ambi henanggelekma Ala wene wokbaluk, hivis “Nanggon,” yiluk, endawi nomaliluk lagya halok, hit ambien ap ako endawi yonggonogo wolok wagu hiniselok,

²⁰ Ala en iri dugwit, “Ap andi weyak ogasiga ako hekbaluk, an nane wapwak yiluk, endawi yonggonogo wolok wagen vaga, ap andi hambuluk lendagwima lagya lagama wolok wagen, at weyak menda degerogo agap wendarupwak yiluk, ogagen atma, segat ogagen o,” yiluk, wa yukherayogon.