Yakobus 4 - ALA WENE HIVIS DIRUP WATUGWA

Ala avema seve yup wene

¹ Hit winimuk yugwi, war-wat yugwi, ogasagwi adem andi nano vaga werek asiga embetep? Henendawi naliga adem ovok erogo henendawima dugwit, “An nendak ogarisogon, hat hendak ogarisogon,” henendawima en nidi-hidi yugu dugwit, ogasagwi akora?

² Yi menda ndi menda waup hogop ombasagwi ovara, waup dek agya halok, ap-at wasagwi. Eke, yi menda ndi menda hogop ombasagwi ovara, wegetek halok andi, winimuk yugwi, war-wat yugwi, ogasagwi. Hit hogop ombasagwi ako, Ala nggino yugitekma, wegetek-at agipik.

³ Eke, hit ninen Ala wokherapwak yiluk, nggino yugisagwi ovara, henendawi hogop ombasagwi ako amusek lagu dugwit, henadik henake degerogo betaguluk, henendawi mondok adik umbutu dugwit yagalagwi atma, wokheraligadek.

⁴ Hwa ambien ap ya hedegek nda hedegek ogarit landiga hak ogasagwi yi, it avakwa wen vaga menda weyak ogasagwi inim, weyak ombasagwi inim, ako hinim henendawi hunik okhidugu hiniselok, Ala hiperen ogot hedelagwi ako hinunggutmu, ogasagwi? Anderogo atma, ap ambi, “It ap wen vaga menda weyak ogasagwi inim, weyak ombasagwi inim, ako ninim hunhedayogon o,” imbita dugwit, ogagya halok, Ala inim ogot hedaliga.

⁵ “Ala en Averiniki nenendawima mabininggigi hegek, nenendawi naliga ako amusek lagu niniselok, Averiniki akoen, ‘Ai,’ yiluk, endawi wakhedaliga o,” yiluk, Ala wene dirup watigi ako andi, un watigi embetep?

⁶ Averiniki endawi anderogoat wakhedaliga ovara, weyak hekbapwak yiluk, Ala endawi hunik en ombogat okbininaliga. Andi, Ala wene dirup warek ambi iri dugwit: “It avakwa enendawi wogobetelagwi halok andi, Ala en it inim ogorek agarik ovara, Enendawi sovalek agarwik halok andi, enabwa en sek okbisaliga o,” yiluk, Ala wene dirup warek agarik o.

⁷ Anderogo atma, Ala avema seve eres. Ala avema seve yiluk, werekma, at Sile madis akoen, weyak okhinivi wagya halok, hinim ndup sumbutu dogwes. Hinim ndup sumbutu dogosogom halok, at hoda wilisogon.

⁸ Hit Ala hinim horok-horok dogosogom halok, At Ala ogo hinimat dogosogon. Hit weyak ogasagwi yi, hininggis hutwis, eke henendawi mberen yi, henendawi ambiat okbaluk, yi weyak ndi weyak hekbagwi, ogagu dogwes.

⁹ Hit weyak ogasagwi ako vaga, henendawi burup yugu dugwit, yup yagu dogwes. Hit enda yagwi, henadenggen yugwi, ogasagwi andi, hekbisiluk, henendawi burup yugu dugwit, de wene yugu dogwes.

¹⁰ Ala avema henendawi seve eres. Seve yugu hiniselok, Aren hit siyabigigayogon o.

Avakwa enavok yup andi moga wene

¹¹ Nowa-nasin o. Henane huluk molalogo navok-havok yup andi moga. Hit ambien henaswei-henarupwi henane huluk molalogo enavok yugwi, enowak dinggwis, ogasagwi andi, “Ala wene adem ombok yukneragagi andi weyak yagagi o,” yiluk, ogagu dugwit, Ala wene owak dilisagwi hak ogasagwima, hit wene hobalek ako menda ogasagwi dek o. Hit Ala wene owak dilisagwi menda-at henombasagwima, anderogo ogarubuk.

¹² Wene yukneragagi nenowak dilisiga ako andi, At Ala adik aro. At adik en nenagap wendatu, degerogo bininggu, ogarup sek ovara, hit Ala ovagak okhidugu dugwit, henaswei-henarupwi enowak diluguluk ogasagwi yi? Mondok moga, nowa-nasin.

Ala en sek imbita halok, ogagu dogop wene

¹³ Avyak! Hit wene mbanggu dugwit, “Yogak a, heveret a, o kota andoma lagu dogomundik, yoparip wonggalhedaguluk, yi menda ndi menda hunit lagu ninigik satu tahun-at ogarusogom o,” yiluk, yagalagwi ako, henendawi dibagu dogwes.

¹⁴ Hit heveret okhinivup ako hinunggut dugwit, yugu hinigis. Niniluk agurik ako andi, isogo agarero ovagak. Isogo agarero dagasiga ako andi, sidok inggya ninil helagwi ovara, dek asiga ako hak, neneyave anderogoat okninivisiga o.

¹⁵ Andi halok, hiren yugu dugwit, “Nenasin en sek imbita halok, neneyave sek dugwit, ‘Yerogo ogarup nderogo ogarup,’” yugu dogop andi sek.

¹⁶ Hivis ogarup hinunggut dugwit, hinilup ovagak okhidugu dugwit wogobetelagwi andi, weyagat ogagu hinigis.

¹⁷ Eke, hit ambi sek ogarup hinilup dugwit ogagetek hiniselok andi, weyak aro.