Yakobus 3 - ALA WENE HIVIS DIRUP WATUGWA

Nenane vaga weyak ogasagwi wene

¹ Nowa-nasin. Ala en nenowak dinggu dugwit, anggin ombok erogo nit avakwa mamulerelagwi menda ako nenovaga bininayogon ninilup atma, hit wisane, “An ngguru dogosogon o,” umbutu dogobuk.

² Nit ovok erogo yi weyak ndi weyak ogasagwi menda aro. Nit mondok sek adigat duklurik en, nit nenane yagalagwi atok vaga weyak agya duklipuk. Nit nenane yagalagwi atok vaga weyak agya duklipuk en, neneyave nininggis-ninisok vaga weyak ogarup okninivisiga ako ovok erogo sovalogo bagu duklu.

³ Anderogo hak, wam kuda wolok lagu dugwit, yo bogalek elagapma baluk, atok venak-venak vaga mbunggwi yidibaluk, nit laup umbuturikmu akoma wolok lendagwi.

⁴ Eke wakhegek ambi yi: mburis kapal layar ako mondok ombok atma, o havut anye ombok erogo iri dugwit, wolok landiga ovara, kapal wolok naliga menda kapten akoen, “Andoma laup,” imbita dugwit, abi amot arupwak yiluk, yo mondok maduk elakamu sivinik agarik ako vaga nomalogo wolok landiga.

⁵ Andi hak, nenabya aro. Nininggis ninisok ombok hegek, nenabya maduk akoen yagalagwi vaga ndugwi wene ombok wigya landiga. Hali enggen maduk en, yonggap ombok hali naliga ako, henendawi dibas.

⁶ Nenabya andi hali abya aro. Yi weyak ndi weyak inis unggul ovok erogo adem andi, nenabya aro. Nenabya andi neneyave atok hunik atma, neneyave ovok erogo weyak okbininaliga. Hali abya wuluk-herek yagaligama en hali enggen wolok nenabya vaga yevedogo ba wendagwi vaga, nit avakwa wen vaga menda ogasagwi ovok erogo ogarit lagu dugwit, weyak adigat ogarit lagu dogopwak yiluk, nenovaga yevedogo bininaliga adem andi, nenabya-at.

⁷ Swa-bagas, ndimbu-nggusa, mindom-mbas, duk-ikan, yi menda ndi menda ogagagi ako, ovok erogo vagago inil yonggoninivisagwi atma, yonggoninivup sek ovara,

⁸ nenabya andi, il yonggonup andi meyan. Nenabya andi mondok weyak, avakwa iniruguluk nenelagapma heda nalis oangga yanggadek agarik hak atma, sovalogo baup mondok meyan.

⁹ Nenabya venak vaga Nenasin Ala inis siyabagwi, eke venak vaga avakwa Ala elose wane-wane ogarogo bogogi hegek, vudilogo bugwis, ogasagwi.

¹⁰ Nenelagap sup mbanggut ambi en wulu wagya dugwit, Ala inis siyabagwi, andien, vudilogo bugwis, ogasagwima anderogo ogarup mondok moga o, nowa-nasin.

¹¹ Is liris andi elola ambiat, ambi sek menda wulu wagya, eke ambi eda menda wulu wagya, ogasigadek!

¹² Eke, nggaris en saup yugu, sawe en nggaris yugu, ogarup sek embetep? Eke, is eda menda en, is sek menda wulu warup, sek embetep? Anderogo mondok ogasigadek, nowa-nasin.

Mbogot vaga agarik akoen nenendawi werek okbininaliga wene

¹³ Hit ap ambi henanggelekma endawi werek dugwit, yi wene ndi wene vage yedok haliga halok, ap andi endawi werek helagwima, endawi sovalek dugwit sek ogarit lagya hinil havovok yiluk, ogarit lagya dogopwak.

¹⁴ Anderogo ovara, hit henaninis umbutu dugwit, henendawi lakot dugwit yagan nagwis, “An ombasiga adigat ogarup,” umbutu dugwit, yagan nagwis, ogasagwi atma, henendawi wogobetaup andi moga o. Avyarat wene hegek, avut dagalisagwi atma, huluk wene molalogo yagan nelagwi.

^15-16 Hit henaswe ambi aninis okbagu dugwit, henendawi lakot yagan nagwis, “An ombasiga adigat ogarup,” umbutu dugwit, ogarit nagwis, ogagu hiniselok, mondok nadok-hadok agya dugwit, yi weyak ndi weyak ovok erogo agya helagwi ako andi, At endawi werek mbogot vaga agarik Ala akoen henendawima okbugu hegek ogasagwidek. Ata, at Sile en it avakwa wen vaga menda enendawima okbugu hegek, henendawi ninggya halok, eyave-at ogagu hinisaliga.

¹⁷ Eke, At endawi werek mbogot vaga agarik akoen hologo bininaliga ako andi, adem ombok andi, nit nenendawi weyak agetek mondok sek adigat dogop. Aswe ambetaga andi, avakwa sek ugun dambulik dogopwak yiluk, moga yugurugwi, nenendawi sagain vaga yugurugwi, yukniruguselok, “E o,” yiluk, ogarit lagwi, nenaigwak aberen avakwa sek okbugwis, yo enggen eyave yiklandiga ako hak, nit anderogoat sek ogarit lagwi, ap ambi sek okbagwi, ap ambi weyak okbagwi, ogagetek wane-wane okbugwis, nenendawi lakot dugwit yugeregetek, nenendawi sagain vaga adigat yugurugwi, ogagu dogopwak yiluk, okbininaliga.

¹⁸ It avakwa enendawi ambiat dambubiselagwi akoen enendawi ambiat dambulik dogopwak yiluk okbigik nagu dugwit, enggen yupwak yiluk awi angge yasagwi ako hak, avakwa sek adigat ogagu dogopwak yiluk, enendawima mabigik nelagwi o.