Yakobus 2 - ALA WENE HIVIS DIRUP WATUGWA

Hit ap enelose vaga adigat dibisabuk wene

¹ Nowa-nasin. Hit henendawi Nenowa Inis Ombok Yesus Keretus mondok siyalek agarik ako ovaga vanggabaluk, avyarat ombakluk, ogarit lagu dugwit, avakwa enelose vaga dibisiluk, ambi sek umbutwi, eke ambi henanggon umbutwi, ogagu dogobuk.

² Ap ambi mbusi emas amumulip cincin ambelat enggen ovagak inim, yum mondok sek inim, yikbaluk, hit samban ogasagwima nunggu wagya, eke ap ambi inggidek yum weyak yirik nunggu wagya, ogaguselok,

³ ap ambi yum eve sek yirik ako agayuk wukbaluk, yugu dugwit, “Nasin o, mbanggu sekma yenam hora yima,” yugugwis, eke ap inggidek ako agayuk wutitek dugwit, “Un andenam mendek dogwen,” ata, “Nggulumu wema andenam hora yilak,” yugugwis, ogagu hiniselok,

⁴ hit henendawi en ap ambi weyak, ap ambi sek, umbutu dugwit, yagalagwi akora? Eke, enelose vaga dibisiluk, okbiselagwi atma, ap wene owak dilisigama en ogasagwi ako hak, ogagu dugwit, weyagat oginivisagwi akora?

⁵ Nowa-nasin, hit an nendawi hunik ako, wene yi des erogo henaruk hunggu dogwes. It avakwa en, “Ap yi, ininggidek,” umbutusigik, Ala en miginipigi ako andi, it Yesus avyarat ombasagwi ako vaga Ala en it ininggis werek enombasiga. Eke, At Ala en iri dugwit, “It avakwa enendawi hunik okbanungguselok, navema bisayogon,” yiluk, nggatuk erogo yagagi ako, Ala avema bisaligama mavorangge hak andok okbisagiluk, miginipigi.

⁶ Ala en irat miginipigi hegek, hiren ap ininggidek halok, mbidarogo biselagwi. Mbidarogo bugu hinigik, sani en hit weyak okhinipu dugwit, likhenombolok wene owak dilisagwima bigiga lendagwi? Andi, it ap ininggis werek en okhinivisagwi ako dek?

⁷ Eke, it ininggis werek menda en Yesus inis siyalek agarik wokheragagi ako, wiyiknom-weyaknom okbelagwi!

⁸ Ala wene dirup warek wane-wane ogagu dugwit: “Hit heneyave henendawi hunik okhedelagwi ako hak, it hinim agipik ako anderogoat henendawi hunik oginipu dogwes o,” yiluk, Nenowa Inis Ombok en wene adem ombok yukneragagi ako ogagu hiniselok andi, segat ogasagwi ovara,

⁹ avakwa enelose vaga dibisiluk, okbiselagwi halok andi, weyak ogasagwi aro. Andi ogasagwi vaga wene adem ombok sovalogo belagwi atma, Ala en, “Hit weyak ogasagwi o,” yiluk, yukherayogon.

¹⁰ Hit Ala wene yukneragagi ako ovok erogo ogagu dugwit ovara, wene ambiat ogagetek hiniselok, wene andi ovok erogo ogagetek atma, weyagat ogasagwi.

¹¹ At Ala en iri dugwit: “Ap ogwa hegek ogarup moga o,” iri dugwit, “Ap warup moga o,” inim yagagirikmu, hit ambi hwa ogagetek dugwit, ap watu hiniselok andi, Ala wene ako sovalogo belagwi atma, weyak ogasagwi andi aro.

¹² It avakwa, “Ala wene visilogo bininaliga wene ako andi vaga nenowak dilisogon o,” yiluk, enendawi wenggenggu dugwit, enane yugwi, ogarit lagwi, ogasagwi ako hak, hit ogo, ogagu dogwes.

¹³ Hit avakwa henaigwak aberen sek okbigitek hiniselok, Ala enat henowak dinggu dugwit, aigwak aberen sek okbigigayogonbuk. Eke, avakwa henaigwak aberen sek okbugu hiniselok andi, henowak dilup ako, henalon degat dogosogom o.

Avyarat ombasagwi ovara, eyave inim ogagetek halok, yugeragagi wene

¹⁴ Nowa-nasin o. Hiren, “An nendawi avyarat ombasiga o,” yagalagwi ovara, eyave ogagetek hiniselok, nano ogaruguluk yagalagwi embetep? Ala wene eyave ogagetek dugwit, un avyarat ombasagwi vaga adigat Ala en henagap wendarisogon embetep?

¹⁵ Henarup ambi a, henowa ambi a, asum inim, o hutun-howam nelagwi menda inim, eve dek halok,

¹⁶ hit ambi en, eyave sek dogopwak yiluk, ambi wogigitek dugwit, ane adigat “Ai nowa. Hagarom iya erogo ninggya, hasum sek adigat yikhidigya, hendawi sek vaga elak o,” yiluk, yugugu hiniselok, andi sek embetep? Dek, enam warogo-at yagalagwi.

¹⁷ Anderogo hak, nit nenendawi avyarat ombasagwi ako wane-wane eyave inim ogagetek dugwit, avyarat adigat umbutu niniselok, nit ambi okbininaup dekma, un enam warogo avyarat ombasagwi.

¹⁸ Anderogo ovara, hit ambi en, “Hat avyarat ombasiga ovara, an andi eyave inim ogasiga o,” yiluk, yugu hinigis atma, avyak wai. Hit avyarat ombasagwi ako, eyave inim ogagetek hiniselok, “Yi ap avyarat ombasigadek menda,” henombarusogom ovara, an andi, avyarat imbita dugwit, eyave inimat ogasigama, “Ap yi avyarat ombasiga” nombasagwi, yi helagwi?

¹⁹ Hiren, “Ala andi, adigat agarik avyarat ombasagwi,” yiluk, ombasagwi andi segat ovara, it madis inim wene andi anderogoat avyarat umbutu dugwit, enalon en enowak wuruk-wuruk yagalagwi ovara, hit andi avyarat umbutu dugwit, mbuverek adigat hinisaliga.

²⁰ Nowa-nasin, hit ap wes ovagak yagan nelagwi. Eyave ogagetek hegek, avyarat ombakluk, mbuverek hiniselok andi, “Yi un enam warogo-at avyarat ombasagwi o,” yiluk, embetetek agipik yi?

²¹ Nit nenombao Averakam akoen Ala ake anggom warogo hali hunisagwima, wet ogarogo baluk, at abut Isak Ala ake bagiluk ogagagi ako vaga, At Ala en, “Ap yi endawi segat higi,” yiluk, wogogi.

²² Ala avyarat imbita dugwit, eyave inim ogagya lagagi andi yedok higyo. Eke, eyave-at ogagagi vaga at endawi avyarat imbitigi ako dek agetek, mondok atma-at agagi o.

²³ Anderogo ogagagi vaga, Ala wene dirup warek yi: “Ap Averakam en At Ala ovaga vanggabaluk avyarat imbitigi andi vaga, Ala en ‘Ap yi, endawi sagain mondok segat higi o,’” yiluk, Ala wene dirup warek ako atma des iri lagagimu, At Ala en, “Ap Averakam ako andi, An naswe aro,” yiluk, yagagi.

²⁴ Andi halok, nenendawi avyarat umbutu dugwit ogasagwi ovara, eyave inim ogagetek niniselok, Ala en nenendawi sagain mondok sek nenombasigadek. Ata, avyarat umbutu dugwit, eyave inim ogasagwi vaga, nenendawi sagain mondok sek nenombasiga helagwi o.

²⁵ Andi ogagagi wane-wane hwa yanenggek landiga menda Rahap akoen, it ap Yakuri menda o yokhaguluk wagagwa ako initu saoen yiluk, umwa hwilakbugu lagagirik, sup adik hunogoma lakbogogi ako vaga, At Ala en, “Hwa yi endawi sagain mondok sek o,” yiluk, wogogi.

²⁶ Neneyave yi hegek, nenendawi nggigis erogo wunggu halok, “Ap andi hombagas o,” yagalagwi ako ndatak nenendawi avyarat ombasagwi ovara, Ala wene andi eyave inim ogagetek halok andi, un enam warogo-at avyarat ombasagwi.