Yakobus 1 - ALA WENE HIVIS DIRUP WATUGWA

¹ Hit Yakup aburi enombawi wigalek hininis unggul 12 menda, yi awi ndi awi sak yagan lagagup ako, an Yakobus en Nenasin Ala inim, Nenowa Yesus Keretus Inis Ombok inim, iperen enayeloman dugwit, “Wa,” yukheraliga o.

Avyarat ombasagwi inim, enendawi werek inim, yugeragagi wene

² Nowa-nasin. Anggin-mbanggin adik-adik menda henovaga agya halok, henendawi mondok adenggen umbutu dogwes.

³ Hit avyarat umbutu hiniselok, henavut mbalisiga atma, anggin-mbanggin henovaga agya hegek, henendawi horaik dugwit, “Nenendawi wadokdek dogopwak yiluk, okninipu higi,” yiluk, adenggen umbutu dogwes.

⁴ Anggin-mbanggin henovaga agya hegek, hit henendawi wadokdek horaik dugwit ogagu dogosogom halok, hit henendawi hoda okhinipu, eke mondok sek okhinipu, henendawi werek okhinipu, ogagya dogosogon o.

⁵ Ogagya dogosogon ovara, hiren ogarup ambi hinunggut halok andi, Ala yugeres. Yugugu hiniselok, At Ala endawi sagain vaga yi ap ndi ap ovok erogo nggilup-nggilup erogo wogeraliga akoen ogarupwak yiluk, hinilup okhinivisogon o.

⁶ Hit Ala yugugu dugwit, henendawi yunggup yegetek mondok avyarat umbutu dugwit, yugugu dogwes. Ap ambi endawi yunggup yegek ogagya dugwit, Ala yugugu halok andi, o havut wagya dugwit is mogoliluk ogasiga andi wane-wane, ap ako endawi anderogoat agarik.

^7-8 Ap andi endawi mberen dugwit, yi ogarup ndi ogarup endawi wenggelit landigama, endawi seyalek dogosogonbuk. Ap andi endawi mberen dugwit Ala yugisiga atma, “Woknirisogonbuk higi,” yiluk, imbita dogopwak.

Ininggidek, ininggis werek wene

⁹ Hit naswei Ala aburi hininggidek menda, hininis sovalek agipik ako, hininis Ala ivaga siyalek agarik atma, henendawi sovalek dugwit, adenggen umbutu dogwes.

¹⁰ Eke, hit nin hininggis werek menda, hininis siyalek agipik ako, Ala ivaga hininis sovalek hinisaliga atma, “Yoangga-hedangga dek asiga andi hak, nininis anderogoat dek arisogon atma, sek aro,” yiluk, henendawi sovalek dugwit, adenggen umbutu dogwes.

¹¹ Andi, mo daga wagya dugwit, mo idup en yoangga-hedangga dis iri dugwit, mbuk agya lagarik mbililis erogo wambigya dugwit, elose weyak asiga hak, it ap ininggis werek okhedaguluk ogarit laguselok, eneyave anderogoat dek arusogom o.

Nenendawi avut mbanggu ogagya halok, ogagu dogop wene

¹² Hit avakwa henavut mbanggu hegek wadokdek agipik halok, ‘An segat agirik’ umbutu dogwes. Hit avakwa henavut mbanggu hegek, wadokdek agipik ako sek ogagu hiniselok, nggenak iris mendago nggudit-nggudit mahkota yikbiselagwi ako hak, Ala en “Hit avakwa henendawi hunik okbanilagwi ako, Anen hiniluk mondok-mondok dogop menda wokherayogon o,” yiluk, avok yagagi akoat wokherayogon.

¹³ At Ala en, “An weyak ambi ogarisogon,” ombasigadek, eke avakwa weyak ogarupwak yiluk, enendawima mabisaligadek atma, ap ambi weyak ogarup endawima nunggwigya halok, “Yi andi Ala en nendawima mabaliga ai,” yiluk, yubuk.

¹⁴ Nit weyak ogarup nenendawima malisiga andi, ap ambi weyak ogarupwak yiluk, ane agil-amok vaga likhelok landiga ako hak, nit nenendawi enat, weyak ogarup hogop, ‘Ai’ umbutu dugwit ogasagwi o.

¹⁵ Eke, hwa ambi eyak avula akluk, endaklagya lagarik, andien, avyak ako hambisiga hak, nit nenendawi enat, weyak ogarup hogop, umbutu dugwit halok, weyak ako nenendawima ombok agya lagarik, neneyave-at hambup okninivisiga.

¹⁶ Nowa-nasin, hit an nendawi hunik ako, hit henendawi nomalhinipu haoen dibagu dogones.

¹⁷ Nenabwa en sek okbininaliga inim, wokneraup ombasiga ako mondok wane-wane wokneraliga inim, ovok erogo mbogot vaga en woknera wambu wandiga. Yi awi ndi awi ovok erogo awiya ogasiga adem andi, At Nenasin Ala enat, woknera wambu wandiga. At ambi agek ogagya dugwit, ndugwis ambi vaga mo munggum hak agya, ndugwis ambi vaga mo yasiga hak agya, ogasigadek, At mondok-mondok itok awiya adigat agarik.

¹⁸ At Ala en yi menda ndi menda ogagagi ako sovalek hegek, nit At angge enek dogopwak yiluk mikninipu lagagirik, wene avyarat yagagi vaga okbininggigi.

“Henaruk adigat hulisagwi a, ata eyave inim avyarat ogasagwi a?” yugeragagi wene

^19-20 Nowa-nasin, hit an nendawi hunik ako, wene yi des erogo wugu dogwes. Nit eyave sek adigat ogagu dogop Ala en ninimbitigi ako andi, nenaninis vaga ogarup dek atma, hit ovok erogo wene yiluguluk henaruk hunggu dogop sek ovara, yup halok andi, dibaluk yugwi, henaninis yiluguluk winggitek, des erogo ogagwi, ogagu dogwes.

²¹ Andi halok, ogarup dek menda bobo ugup ovagak hegek ugun ogagwi, eke yi weyak ndi weyak ogagwi, ogasagwi ako ovok erogo hekbaluk, henendawi sagain vaga dugwit, nenagap wendarup wene Ala en nenendawima awi yakbininaliga ako, adigat des erogo wugu dogwes.

²² Ala wene henaruk hobaluk ogagetek halok andi, hirat henambukmu dagalhedelagwi atma, henaruk adigat hunggik ogagu dogop andi moga o. Ata, henaruk hobaluk, eyave inimat ogagu dogwes.

²³ Hit Ala wene dibaluk, ogagetek dugwit, un henaruk adigat hulisagwi halok andi, ap ambi wukagak vaga elose bikhaliga ako hak, hirat.

²⁴ Elose bikhigya lagarik, lagya dugwit, “Nelose anderogo higi,” yiluk, ape wengge yagaligadek vage inggut asiga ovara,

²⁵ Wene yerogo ogarup, nderogo ogarup, sek adigat agarik ako vaga visilogo bininaliga wene ako, hit segerogo yenaga wugu dogomundik, hinunggut agetek des erogo wokbaluk, ogagu dogosogom halok, At Ala en henendawi adenggenat okbigigayogon o.

²⁶ Hit ambi en, “An Ala wene dibaluk ogasiga,” yagalagwi ovara, henabya atok vaga ugun yagan nelagwi ako henelagap des erogo wanggo wakhedegetek halok, hit henambukmu dagalhidugu dugwit, “An Ala wene dibaluk, ogasiga,” yagalagwi ako andi, un enam warogo-at ogagu hinigis.

²⁷ Nenasin Ala ivaga At ane dibaluk eyave mondok sek adigat ogagu dogop andi, it avyak hwavyak wenavorangge inim, akwa sogwa inim, enendawi wakhiduguselok, enabwa en yonggar-inipwis, eke it avakwa enendawi weyak en weyak ogarupwak yiluk, henendawima manggu saoen, hwalogo dugwit suam watwis, ogagu dogwes.