Wahyu 9 - ALA WENE HIVIS DIRUP WATUGWA

Ane ombok ogasiga trompet 5 vaga ogagya dugwit, avakwa mondok anggin okbisaup henggam ako ambi okbugu hagagi wene

¹ Hunggu lagirik, werekma, malaikat eneyave 4 ane ombok ogasiga trompet ako ane ogagu lagaoma, okbaluk, at malaikat ambien trompet ane ogagya hegek, dadiwap ambi mbogot vaga en wen vaga wambu wagya higi. Dadiwap wambu waga ako, hambuluk lendagwima nggilin elola o yagamu andoma sup hurupwak yiluk, hunsi wogugu higi.

² Hunsi wigya lagarik, hambuluk lendagwima nggilin elo ako dadiwap akoen sup huritas. Sup hurutu lagama, helep yugup yuvuk yendok-wandok ogasiga hak, yuvuk wisane nggilin elola en daga wagya dugwit, mo il inim, o ilim yoma inim, hwis erogo bagya higi.

³ Higya neyagek, yuvuk anggelekma en idam wisane erogo wulu wagu lagarwik, hagudi aik hiviriniparikmu edup helagwi hak, idam akoen avakwa aik hivirinivit lagusigik edup en yagan watu dogopwak yiluk, enanye okbugu higi.

⁴ Enanye okbugu lagarik, yugirigya dugwit, “Yoangga-hedangga ovok erogo henaik libilogo nenggek nagu dogop moga. Ata, it avakwa Ala en amburup enembet vaga eralekdek halok adigat henaik hivirinivit nagu dogones.

⁵ Eke, eneyave hambupwak yiluk, hivirinivup andi moga. Ata, un edup en yagan watusigik, saut 5 nggao yupwak yiluk, henaik hivirinivit nagu dogones,” yiluk, yugirigya higi. Yugirigya lagama, hagudi akoen aik hiviriniparikmu edup en yagan warisagwi hak, aik hivirinivit lagusigik, edup en yagavek-kodek yagan lagu sigis.

⁶ O andi vaga it avakwa edup en yagan watu dugwit, “Mbikit hambup ova adik, ai, nano yiluk niluk agirik,” yusogom ovara, hambup ako mondok enadema ari wasogonbuk atma, hambegetek un iniluk adigat dugwit, yagavek-kodek adigat yugu dogosogom.

^7-8 Idam ako andi, enelose ap ndatak ovara, iniris andi, akwa iniris dalwik ovagak, eke, enaik andi, yangge singga aik ako ovagak, inigis. Kuda ambot vaga hora yiluk ndup sumburuguluk, dikduk ogarogo biselagwi hak, it idam eneyave ako andi, anderogoat dikduk ogarogo bugu dugwit, nggudit-nggudit mbusi emas vaga ogarek inim,

⁹ sin mbusi vaga yago inim, yikbugu higi. Eke, ndup sumburuguluk, kuda adonggop vaga yidibaluk, kereta likhelok ndup sumburi nunggugu dugwit, kuda eneyave wisane atma inisogane wisane yagan lagwi enaruk hulisagwi hak, anderogoat idam ako ogo enamik wigak-wigak yagan lagu dugwit, enamik ane ombok yagan lagu sigis.

¹⁰ Enagya andi, hagudi aik ako ovagak atma, aik avakwa hivirinipu halok, edup en yagan watusigik, saut 5 nggao iri higi.

¹¹ Eke, at malaikat hambuluk lendagwima nggilin elola vagago agarik ako andi, it idam enowa inis ombok vagago agarik arat. At inis andi, avakwa Iberani enane vaga, “Abadon,” yagalagwi, eke, Yunani enane vaga, “Apoliyon,” yagalagwi.

¹² “Avakwa mondok anggin okbisaup menda ako, ambi idam en vage ogagya hegen ako ovara, mberen andi ao ogagetek atma, hil dogwen o,” yiluk, yuknugu higi.

Ane ombok ogasiga trompet 6 ako vaga ogagya dugwit, avakwa mondok anggin okbisaup henggam ako ambi inim okbugu hagagi wene

¹³ Yuknugu lagama, nil werekma, malaikat eneyave 5 ane ombok ogasiga trompet ako ane ogagu lagaoma, at ambien trompet ane ogaga. Ogagya lagama, amben eyave sek menda Ala siyabamunda hali hunisagwima mbusi emas vaga ogarek Ala avema agarik ako, atokma aik ombok 4 akomaen ane ambi iri higi.

¹⁴ Iri dugwit, “Malaikat eneyave 4 is ombok Eparat omban vaga heda marek agarwik ako, heda visilogo lakbisin,” yiluk, at malaikat trompet ane ogaga ako yugigas.

¹⁵ Yugugu lagama, it malaikat eneyave 4 akoen tahun andi vaga, saut andi vaga, ndugwis andi vaga, mo il andi vaga, mondok wane-wane ari lagya halok, avakwa nin agako higirogo mberen hekbugu dugwit, nin ambi higirek andi enarit lagu dogopwak yiluk, vipuk ogarogo bogogi akoat enarit lagu dogopwak yiluk, visilogo hekbugu higi.

¹⁶ Anderogo higya lagirik, “It malaikat 4 enaori enayegen werek kuda ambot vaga hora yugu lagarwik, ndup sumburi lagao ako andi, eneyave 200 juta-at,” yiluk, iris naruk hunggis.

¹⁷ Eke, kuda inim, ap eneyave kuda ambot vaga horaik agarwik inim, nabi higya dugwit, inigis ako andi yi o. Enarin yirik ako andi, heda melaka enggen mudu ovagak, mbogot mudis ovagak, eke vule angga mudu ovagak, enarin elose anderogoat higi. Kuda inunggul ako andi, yangge singga unggul ovagak atma, adwanggak edup-mbedup erogo balin lapwak yiluk, enelagapma en hali abya inim, yuvuk inim, helep belerang agap sule sukup yagaliga menda inim, wulu wagya higi.

¹⁸ Enelagapma en wulu waga ako vaga, adwanggak edup-mbedup erogo bisilin lagarikmu, avakwa nin agako higirogo mberen hekbugu dugwit, nin ambi higirek andi aup edup en mondok hambit lagu sigis.

¹⁹ It kuda enelagapma en hali wulu waga ovara, it enagya andi, mbas awigovak unggul ovagak akoen avakwa enarit lagarwikmu, enelagap inim, enagya inim, andi mondok enanye wisane-at inigis.

²⁰ It nin edup en hambegetek hekbigas iniluk agarwik akoen it weyak ogasagwi ako enasam hegetek-at inigis. Iren, “Nit anderogoat hambit lagu ninisaoen, nenomadis ako andi, ininis siyabagwi, madis ininis wogobugwis, ogasagwi ako menda mbobasogom,” yup sek hegek ovara, dek, enasam hegetek ao ogarit lagao. It enomadis andi, yi menda ndi menda inil hugwi, enaruk hunggwis, sup lagwi, ogasagwidek hegek un enam warogo enomadis mbusi emas vaga, mbusi perak ako vaga, mbusi tembaga ako vaga, helep vaga, yo vaga, ogarek atma, mbobaup sek ovara, dek, enasam hegetek ao ogarit lagu sigis.

²¹ Eke, “Avakwa initwis, mum vaga initwis, ovat vaga initwis, avakwa ugun ogonupwis, enonggop wugwi, ogasagwi menda ovok erogo nenasam helok, mbobasogom o,” yiluk, yup sek ovara, mbobagetek enendawi hunik dugwit, okhidugu sigis.