Wahyu 8 - ALA WENE HIVIS DIRUP WATUGWA

Heda hivis marek 7 ako visinggu hagagi wene

¹ Ndomba Eyak akoen heda hivis marek 7 ako visinggu lagama, setengah jam ovagak agya dugwit, mbogot vaga andoma enane ogo dek, inisogane ogo dek, mbauk erogo ogagya higi.

² Higya lagarik, it malaikat eneyave 7 Ala avema mendek agarwik ako ane ombok ogasiga trompet 7 wogirigya higi.

³ Higya neyagek, malaikat adik ambi sogolowak mbusi emas vaga ogarek inggimu wolok, Ala ake warogo hali hunisagwima mendek yi wagya higi. Mendek yi wagya lagama, amben eyave segedok menda wisane wogugu higi. Wogugu lagama, Ala ake hali hunisagwima mbusi emas vaga ogarek Ala wene yugeraligama avema akoma, amben eyave segedok menda ako inim, it Ala aburi ake denek samban vaga enane yugugwis ako inim, Ala ake bagya higi.

⁴ At malaikat en Ala ake anderogo bagya hegek, amben eyave sek menda hali ninggyama yuvuk inim, Ala aburi samban vaga enane yugugwis inim, inggimu en Ala adema inggya higi.

⁵ Ako ogagya hegek, at malaikat akoen amben eyave sek menda sogolowak vaga nudik welaga ako, hali hunisigama akoma en halinggen wigya lagarik, sogolowak ako vaga mabaluk, wen vaga yamburi wagya higi. Wen vaga yamburi wagya lagama, o unggulane iris, o digavok yovalevet higya, ogagya hegek, o wadok ogagya higi.

Ane ombok ogasiga trompet ako 4 enane endak ogagu sogogi wene

⁶ Anderogo ogagya higya lagirik, it malaikat eneyave 7 enadik-enadik ane ombok ogasiga menda trompet wogeraga vagago ako, ane ogaruguluk, dikduk ogagu sigis.

⁷ Ane ombok ogasiga trompet vagago ako, ambi endak trompet ane ogagya lagama, musu hol es salju inim, hali inim, amuya inim, nanggibuk-hanggibuk erogo baluk, o wen vaga wombali wagya higi. Wombali wagya lagama, wen inim, yo inim, nin agako higirogo mberen hekbaluk, nin ambi higirek hali ninggya dugwit, yoangga-hedangga swi ogo ovok erogo nenggek lagya higi.

⁸ Malaikat ambi ane ombok ogasiga trompet ako, ane ogagya lagama, okbaluk, enaswe ambien trompet ane ogagya hegek, ndom ombok ambi hali wuluk yagan is ombok yanggadek laut ako vaga beyak ha wambigya higi. Beyak ha wambigya lagama, is ombok yanggadek nin agako higirogo mberen hekbagya dugwit, nin ambi higirek ako amuya ogarogo bagya higi.

⁹ Ogarogo bagarikmu, yi menda ndi menda iluk menda is elola agarik ako nin mberen higirogo hekbagya dugwit, nin agako higirek ako hambit lagwi, eke, yi mburis ndi mburis is agakoma nagwis ako nin mberen higirogo hekbagya dugwit, nin agako higirek ako windilek-hedalek oklarit lagya higi.

¹⁰ Malaikat mberen ane ombok ogasiga trompet ako, ane ogagu lagaoma, okbaluk, at ambien trompet ane ogagya hegek, dadiwap ombok ambi hali wuluk yagaliga ako ovagak mbogot vaga en wuluk yagan wambu wagya higi. Wambu wagya lagarik, is landigama inim, iliris wulu wandigama inim, ovok erogo nin mberen andi ako higirogo hekbagya dugwit, nin agako higirek ako eda erogo balin lagya higi.

¹¹ Dadiwap ako andi, inis Eda atma, is nin agako higirek ako eda ogarogo balin lagarikmu, avakwa nunggu lagarwik, eneve wisane hambit lagu sigis.

¹² Malaikat henggam ane ombok ogasiga trompet ako, ane ogagu lagaoma, at ambien trompet ane ogagya hegek, mo il awiya inim, saut awiya inim, dadiwap awiya inim, venak agako higirek ako, abya dek ogarogo bagya higi. Abya dek ogarogo bagya lagama, o dingga ako awiya maduk agya, eke, o hup halok, o mondok hwis iris, ogagya dogopwak yiluk, mo il awiya inim, saut awiya inim, dadiwap awiya inim, nin mberen higirogo hekbagya dugwit, nin agako higirek ako, awiya dek agya higi.

¹³ Anderogo agya ako higya neyagek, swa erambongga mbogot ilim aroma en wigak-wigak yagan wagya dugwit, ane ombok vaga iri higi. Iri dugwit, “Malaikat eneyave 7 ako, it eneyave 4 ane ombok ogasiga trompet ane vage ogagao ovara, eneyave henggam andi, ane ogaruguluk, mondok dikduk ogasagwi. Ogasagwi atma, it avakwa ovok erogo wen vaga agarwik andi, ayai, enabwa, enabwa o,” yiluk, ane ombok vaga yagan lagya naruk hunggis.