Wahyu 5 - ALA WENE HIVIS DIRUP WATUGWA

Ndomba Eyak en mbuku virik-verek ogarek ako wigya hagagi wene

¹ Andi ogagwi inugu lagirik, ambi higya dugwit, mbuku virik-verek ogarek ambi adup venak-venak dirup warekma, At wene yugeraligama kursi sek vaga horaik agarik ako inggis amotkan vagago higi. Eke, mbuku virik-verek vaga dirup warek ako, inil haguven yiluk, lilin amburup ako vaga ambi heda mabagek ambi heda mabagek, ogarit heda 7 vaga marek higi.

² Higya neyagek, malaikat anye werek ambien ane ombok iri dugwit, “Mbuku virik-verek warek yi, ap ambi saen heda visilogo bikhaup ndak?”

³ Iri lagama, mbogot vaga inim, wen vaga inim, wen avema inim, avakwa wisane-at agarwik ovara, it ambien heda visilogo bikha warup ndak degat higyo.

⁴ Ap ambi en visilogo bikhaup ndak dek atma, visilogo bikha wagetek-at welagarwikmu, “Nit ap ovok erogo weyak ogasagwi menda atma, nit visilogo bikhaup meyanat higyo,” yiluk, nendawi mondok wakhidigya dugwit, yup yagi.

⁵ Yup ao yagya lagima, mbogot vaga agarwik enanggok ap ombok-ombok ako ambien an yuknugu dugwit, “Yup yarubuk. Yo ambi aruknuk dagasiga andi hak, inis unggul Yakura en Daut ombao yangge singga ovagak endaklagagi ako, ayegen anye agagirikmu, Aren mbuku virik-verek heda 7 marek ako, visilogo bikhaup ndak atma, bikha wagya hayogon.”

⁶ Yuknugu lagama, enanggok ap ombok-ombok 24 ako inim, avakwa en iniselagwidek menda eneyave 4 ako inim, wene yugeraligama andenam walinek inigik, Ndomba Eyak ambi eyave warek ovagak, it enanggelekma mendek higi. Wam Ndomba Eyak ako andi, aruk adema aik 7, eke, il 7, yago higi. Aruk adema aik 7 inim, il 7 inim, ako andi, Ala Averiniki andogon adem 7 ogasiga ako o wen vaga yi awi ndi awi lakbisaliga akoat.

⁷ Andien, an Yohanes en nil higya dugwit, Ndomba Eyak ako wagya lagarik, wene yugeraligama kursi sek vaga horaik mbuku inggis amotkan vagago agarik ako inggimu wigya higi.

⁸ Wigya lagama, it avakwa en iniselagwidek menda eneyave 4 ako inim, mbogot vaga agarwik enanggok ap ombok-ombok eneyave 24 ako inim, Ndomba Eyak ako avema seve yagao. Seve yiluk, it enanggok ap ombok-ombok akoen nggindar inim, sogolowak mbusi emas vaga mendarek amben eyave sek menda nudik ako inim, enadik-enadik vagago dugwit, ndawi vaga yugugu sigis. Amben eyave sek menda sogolowak mbusi emas vaga nudik ako andi, it Ala aburi At ake denek samban ogasagwi enane nudik higi.

⁹ It avakwa en iniselagwidek menda eneyave 4 ako inim, mbogot vaga agarwik enanggok ap ombok-ombok eneyave 24 ako inim, ndawi swi menda watao. Ndawi swi menda watu dugwit, ndawi eyave watao yerogo: “It avakwa ininis unggul adik-adik inim, enane adik-adik inim, enagamut adik-adik inim, enanggelekma en ambitap nggigilogo Ala aburi arupwak yiluk, Hat hatu lagagwama, hamuya vaga enonggo bagagin ako vaga mbuku virik-verek heda marek ako, Haren wigya dogomindik visilup sek aro.

¹⁰ It avakwa ininis unggul adik-adik enanggelekma en hat hamuya vaga enonggo bagagin ako, Nenasin Ala avema bisiluk, imam hak At ake ogagu dogopwak yiluk denogo mondok okbigigindikmu, ininis ombok dugwit, avakwa wen vaga yagamu agarwik ako enavema bisiluk, ‘Yi ogares, ndi ogares,’ yugurugu dogosogom o,” yiluk, ndawi swi menda watao ako naruk hunggis.

¹¹ Ndawi watwis ako inugu dugwit, it malaikat eneyave wisane nit nininggis dinggilup ogo mondok meyan andi ndatak inigis. It malaikat akoen, wene yugeraligama kursi sek ako inim, it avakwa en iniselagwidek menda eneyave ako inim, it mbogot vaga agarwik enanggok ap ombok-ombok ako inim, ilim inigik, malaikat akoen walinogo enane ombok homago ndawi watao. Ndawi eyave watao andi yerogo:

¹² “Ndomba Eyak watugwa ako, yi avakwa ndi avakwa avema seve yi nunggugwi, ‘At inggis mondok werek, yi wene ndi wene ovok ilup, At adik mondok anye aro,’ yiluk, agayuk wutwis, inis siyabagwi, hai watwis, ogagu dogop sek aro,” yiluk, ndawi watao.

¹³ Anderogo hak, it mbogot vaga agarwik inim, wen vaga agarwik inim, wen avema agarwik inim, is ombok yanggadek laut endawima nelagwi inim, Ala en ogagagi yi menda ndi menda yi avakwa ndi avakwa ovok erogo enane ombok vaga ndawi watao. Ndawi eyave watao ako andi yerogo: “At wene yukneraligama horaik agarik ako inim, At Ndomba Eyak ako inim, Iperen enanye mondok werek atma, enavema seve yiluk, hai watwis, enagayuk wutwis, ininis siyabugwis, mondok-mondok ogagu dogosogom o,” yiluk, ndawi watao.

¹⁴ Ndawi watusigik, it iniselagwidek menda eneyave 4 akoen, “Avyarat yagao o,” yiluk, “Amin,” yugwi, eke, it enanggok ap ombok-ombok 24 akoen enavema seve yiluk, ininis siyabugwis, ogagu sigis.