Wahyu 4 - ALA WENE HIVIS DIRUP WATUGWA

Mbogot vaga en Ala inis siyabagu sogogi wene

¹ Anderogo yuknugu lagarik, nabi ambi higya dugwit, o mbogot vaga andoma sup mbanggut ambi hurik higi. Higya neyagek, akoma en ap ambien trompet ane ombok yagaliga ako hak, ane ombok endak yuknugu hunggis ako ambi inim yuknugu dugwit, “Yogak ogarup hegen ako okbaluk, hivis ogarup ako yukhisogonen, dagama,” yiluk, yuknigas.

² Aoat andenam yuknuguma, Ala Averiniki nendawima des iri lagarik, woknombolok bani inggya higi. Bani anggarik werekma, mbogot vaga andoma wene yugeraligama kursi sek vaga, ap ambi horaik higi.

³ O awiya amumulip herek-damok ogasiga hak, ap horaik agarik ako, helep elose mondok sek onggo ombok yaspis inim, sardis inim, ovagak ogarek higi. Eke, At horaik agarikmu yuwaru mondok abinak helep zamrud ovagak yilin-walin erek higi.

⁴ Werekma, it mbogot vaga agarwik enanggok ap ombok-ombok eneyave 24 en, At wene yugeraliga menda ako ilim hegek, it wene yugerelagwima kursi sek ako vaga 24 walinek horaik dugwit, enasum yanggwi ovagak yirik, eke, nggudit-nggudit mbusi emas vaga enunggul vaga yirik, inigis.

⁵ At wene yugeraligama andoma en o digavok yovalevet higya dugwit, unggulane yagan wulu wagya higi. Eke, wene yugeraligama elosema vikit andenam yunda 7 yevedek higi. Yunda 7 yevedek ako andi, Ala Averiniki andogon adem 7 ogasiga akoat.

⁶ Wene yugeraligama kursi sek avema andenam kaca jendela mondok eyave obak inamut ombok yanggadek laut ovagak ovara, elose wukagak mondok awiya ogasiga ovagak higi. Eke, o andenam avakwa en iniselagwidek menda eneyave 4 enavilis enambot enombandu venak-venak andoma inil yago wisane werekma, wene yugeraligama ilim andenam walinek inigis.

⁷ Eneyave ako andi, ambi yangge singga elose ovagak, ambi sapi nggulok elose ovagak, ambi andi, elose avakwa enelose ovagak, eke, ambi andi, swa erambongga amik wigalek ako ovagak, inigis.

⁸ Avakwa en iniselagwidek menda eneyave 4 ako andi, enadik-enadik enamik 6 werek atma, eneyave inim enamik avema andenam inim ovok erogo inil yago inigis. It ako mbup yegetek hutun-howam enane yugu dugwit, “Nenasin Ala hanye Hat hadigat agindik, Hat mondok sek adik denek, endak welagagin, yogak agindik, hivis dogogun, Hat mondok sek adik denek aro,” yiluk, yugigik adigat ogagu sigis.

⁹ Ogagu dugwit, At mondok-mondok iluk itok agarik wene yugeraligama horaik agarik ako, iren “Wa,” yugugu dugwit, inis siyabagwi, hai watwis, ogagu sigis.

^10-11 Ogagusigik, it enanggok ap ombok-ombok eneyave 24 akoen At mondok-mondok iluk itok agarik wene yugeraligama kursi sek vaga horaik agarik ako, avema seve yiluk, inis siyabagu dugwit, “Nenasin Ala wa. Hat hendawi wenggebaluk, ‘Yi menda ndi menda ovok erogo werek ogarisogon o,’ yiluk, ogagagin. Hat hadigat mondok eve ombok agindik atma, yi avakwa ndi avakwa ovok Hat havema seve yiluk, hinis siyabagagwi, hai wakhitwi, ogagu dogopwak,” yiluk, nggudit-nggudit mendarek yirik ako, nggolalogo At avema bawagu sigis.