Wahyu 3 - ALA WENE HIVIS DIRUP WATUGWA

Yesus aburi o Saridis homarisagwi ako yugeragagi wene

¹ Yuknugu lagarik, ambi yuknugu dugwit, “At malaikat An naburi o Saridis homarisagwi malenombogo agarik akoen aburi yugerapwak yiluk, dirup warogo lakbanogen, yukhisogon.” “An dadiwap 7 ninggimu vagago dugwit, Ala Averiniki ogasiga menda andogon adem 7 ako vagago agirik yi akoen, it An aburi o Saridis menda wene yi yugeraliga: Hit An naburi o Saridis ogarit lendagwi ako An nilup. Avakwa en henavok yugu dugwit, ‘Ap iniluk dugwit enanye vaga nelagwi hak, it Yesus aburi gereja andi vaga homarisagwi ako mondok enanye-at agarwik inigup o,’ yiluk, yagalagwi ovara, hit anderogo ogasagwidek andi An nilup. Hit andi, An namusek lagu dugwit, mondok henanyedek henendawi nggorak ovagak segerogo ogasagwidek weyak ogasagwi andi, An nilup.

² Hit ogarit lendagwi ako An Nasin Ala en, ‘Segat ogasagwi,’ henombasigadek atma, hit mondok henanyedek hambup ovagak okhinivisiga ako hodorogo iniluk akluk, Ala wene ambukumat musek lagu hinigis ako iya erogo musek lagu dogovovok yiluk, henanye okhedomanes.

³ It endak Sek Wene An navok ako mamulhirugusigik, henaruk hobaluk wagagup ako henape wenggeles. Henape wenggebaluk, henomaduk mbobagu dogomundik, wene hunggugup akoat des erogo vagago dogovovok yiluk yukheraliga. Eke, hiren henanye erogo hiniluk okhedegetek halok andi, ap onggop wagiluk wandiga hak, An hinunggut hinigik, supuk erogo hit Saridis menda anggin henovaga bigigagiluk henadema wasogon.

⁴ Anderogo ovara, hit Saridis menda nin ambukumat henasum mudis okhedegetek sek adigat ogarit nelagwi atma, ‘Hit sek aro,’ yiluk, henasum mudu eyave yirik ninim nagu dogosogom.

⁵ Eke, hit sanien An nane hekbagetek mondok henendawi wadokdek vagago dugwit, des erogo musek lagu hiniselok, An wagya dogomindik, avakwa mondok-mondok iniluk dogop ininis mbuku vaga dirup warek agarik ako, An horisogonbuk. It anderogoat enasum mondok mudu yikbugu dogomindik, An Nasin inim, At ayonggo malaikat inim, inivaga, ‘It ap yi, An naori aro,’ yiluk, yugerayogon.

⁶ Henaruk werek a dek a? Henaruk werek halok, Ala Averiniki en An naburi yi awi ndi awi homarisagwi yugeraliga ako andi, des erogoat hunggu dogones. Wene yi yigi ako ovok erogo at malaikat An naburi o Saridis homarisagwi malenombogo agarik akoen aburi yugerapwak yiluk, dirup warogo lakbain,” yiluk, yuknigas.

Yesus aburi o Viladelipia homarisagwi ako yugeragagi wene

⁷ Yuknugu lagarik, wene ambi yuknugu dugwit, “At malaikat An naburi o Viladelipia homarisagwi malenombogo agarik akoen aburi yugerapwak yiluk, dirup warogo lakbanogen, yukhisogon.” “An huluk yagaligadek avyarat adigat yagaliga Ala ake nadik denek agirik akoen, Daut agunsi ako vagago dugwit, sup hurutu neyalok avakwa en larup meyan, eke, latya neyalok avakwa en hururup meyan, An nadigat vagago agirik yi akoen, it An naburi o Viladelipia menda wene yi yugeraliga:

⁸ Hit An naburi o Viladelipia ogarit lendagwi ako An nilup. Hit An ninis weyak erogo bagetek, sek erogo vagago dugwit, henanye horogat agarik ako vaga An nane musek lendagwi. Anderogo atma, hit ambi ogagu dogopwak yiluk, sup hurogo bigigis ako, avakwa en larogo bigigaup mondok dek.

⁹ It ap Sile ogasiga wane-wane ogagu dogoguluk, homasagwi ako, it Yakuri menda dek hegek un huluk, ‘Nit Yakuri menda aro,’ yiluk, yagalagwi ako, An sovalogo bugu neyasogom. Iren, hit henadema ‘Ala avyarat endawi hunik okhinipu higyo,’ yiluk, hit An naburi o Viladelipia menda henavema seve yi warupwak yiluk, okbugu neyasogom.

¹⁰ Eke, ‘Hit henendawi wadokdek horaik dugwit ogagu dogones,’ yiluk, yukheragagis ako, hobaluk des erogoat ogasagwi atma, hivis yi avakwa ndi avakwa wen vaga agarwik ovok erogo enavut mbaligen yiluk, anggin-mbanggin enovaga bisa warup ako vaga, hit An naburi andi, henovaga arugwi en yiluk, Anen hinim dogosogon.

¹¹ An vage mbikit warisogon o. Eke, wagya dogomindik, hit An nane avyarat ombakluk wagagup ako des erogo vagago hiniselok, nggudit-nggudit mendarek ako menda yikbigiga warisogon atma, avakwa en ugun wugu inisaoen, dibaluk, suam watu dogones.

¹² It sanien An nane mbobagetek mondok enendawi wadokdek vagago dugwit, des erogo musek laguselok, An wagya dogomindik, o anye dogopwak yiluk, sirup ilim ngguvulisagwi hak, it avakwa andi, An Nasin Ala awi valekma anderogoat mondok okbisayogon. Okbisiluk, it Ala aburi yedok inisapwak yiluk, An Nasin Ala inis inim, An Nasin Ala awi valek o kota Yerusalem swi menda Nasin Ala mbogot vaga en wombaba wasogon ako inis inim, eke, An ninis swi salek ako inim, enadik-enadik enovaga dirup warogo bisayogon. Bisamindikmu, it hivis andoma en mondok wulusogombuk.

¹³ Henaruk werek a dek a? Henaruk werek halok, Ala Averiniki en An naburi yi awi ndi awi homarisagwi yugeraliga ako andi, des erogoat hunggu dogones. Wene yi yigi ako ovok erogo at malaikat An naburi o Viladelipia homarisagwi malenombogo agarik akoen aburi yugerapwak yiluk, dirup warogo lakbain,” yiluk, yuknigas.

Yesus aburi o Laodikia homarisagwi ako yugeragagi wene

¹⁴ Yuknugu lagarik, ambi yuknugu dugwit, “At malaikat An naburi o Laodikia homarisagwi malenombogo agarik akoen aburi yugerapwak yiluk, dirup warogo lakbanogen, yukhisogon.” “At Ala en wen-mbogot werek ogarup imbita hegek, ogagagis adem An atma, avyarat wene adigat mondok des erogo sigamat yugeraliga An Amin yi akoen, it An naburi o Laodikia menda wene yi yugeraliga:

¹⁵ Hit An naburi o Laodikia ogarit lendagwi ako An nilup. Henendawi hol ogo dek, edup ogo dek, un is saragas nudik ovagak hinigirikmu, henendawi edup dogop ombasagwi halok, edup-at dogop, eke, henendawi hol dogop ombasagwi halok, hol-at dogop, anderogo dogop segat henombasiga.

¹⁶ Anderogo dogop segat henombasiga ovara, henendawi edup ogo dek, hol ogo dek, un is saragas nudik ovagak agipik atma, is adyek halok enelagapma en suvurogo beyakhelagwi andi hak, hit ako An nelagapma en suvurogo beyakhinisaup ombasiga.

¹⁷ Hit ako andi, henendawi weyak, hininggidek, hinil mbuk, henagap mbedan, henanggadi werek, anderogo hinisaliga ovara, dibagetek dugwit, hiren, ‘Nininggis mondok werek, dek ambi dek, nenangge ovok werek,’ yiluk, yagalagwi atma,

¹⁸ hit sek erogo ambi inim ogagu dogovovok yiluk yukheraliga. Hit henagap mbedan nelagwi atma henanggadi agu hinisaoen, henasum mudu yanggwi hak yikhedaguluk An nadema hunhedavovok yiluk, yukheraliga. Hinil mbuk ako sek akluk yi menda ndi menda hinil havovok yiluk, amburup hinimu betaup An nadema hunhedavovok yiluk, yukheraliga. Eke, eyave sek menda vaga hininggis werek arovovok yiluk, An nayoparip mbusi emas eve hali vaga werago ako menda inim An nadema onggo hunhedavovok yiluk, yukheraliga.

¹⁹ It avakwa An nendawi hunik oginivisiga ako andi, enaruk watya, enendawi wenggelupwak yiluk yo yawi inita, ogasigama, enasam helok, enomaduk nggatuk erogo mbobapwak.

²⁰ An sup mbanggutmu mendek dugwit, hit henendawima An sup nggolen-nggolen ogasiga ako dibanes. Ap ambi An nane ako, aruk hobaluk, endawima sup hutu halok, An adema nunggwigya dogomindik, niperen naswe-haswe nenendawi ambiat dambulik dugwit, erom nunggu dogosogom.

²¹ Eke, An Nasin yuknogogi ako hekbagetek atok weralogo baluk, At wene yugeraligama niperen horaik agurik. Anderogo wane-wane, it sanien An nane mbobagetek mondok enendawi wadokdek vagago dugwit, des erogo musek laguselok, it ogo An nane yugeraligama ninim horaik dogoguluk, ‘Nadema omanes,’ yiluk, yugerayogon.

²² Henaruk werek a dek a? Henaruk werek halok, Ala Averiniki en An naburi yi awi ndi awi homarisagwi menda yugeraliga ako andi, des erogoat hunggu dogones. Wene yi yigi ako ovok erogo at malaikat An naburi o Laodikia homarisagwi malenombogo agarik akoen aburi yugerapwak yiluk, dirup warogo lakbain,” yiluk, yuknigas.