Wahyu 22 - ALA WENE HIVIS DIRUP WATUGWA

Is iniluk oginivisiga lagya hagagi wene

¹ Anderogo higya lagirik werekma, malaikat akoen, an yuknugu dugwit, “Is avakwa iniluk oginivisiga menda il mudis ovok apik sigam yi, hil yokhanen. Is andi, Ndomba Eyak Ala iperen wene yugerelagwima avema en, hudu-hudup wulu wagya dugwit,

² o kota sup seyavup agakorup wandiga andi, hil yokhanen,” yiluk, yuknigas. Yuknugu lagama, bikhigyama, is ombok wandiga ako omban yivikit-elavikit yo avakwa iniluk ogonivisiga menda awi yagoma, saut ambi vaga enggen yugu, saut ambi vaga enggen yugu, anderogoat ogarit tahun ambi vaga enggen adigat yugu hegek, saut 12 hudi agya higi. Eke, yo ako angga andi, yi avakwa ndi avakwa edup oginipu haoen yiluk, sek okbugu dogopwak yiluk ake-at agarik higi.

³ Yi menda ndi menda Ala en vudilogo bagagirikmu weyak agagi ako ovok erogo sek okbagarikmu, o ako andi, sek adigat higi. Eke, At Ala inim, Ndomba Eyak inim, iperen wene yugerelagwima kursi sek o ilim andenam werekma, At ayelomani ovok erogo At avema seve yiluk dugwit, At ake adigat ogagu sigis.

⁴ At Ala ake adigat ogagu dugwit, elose inil hugusigik, At inis enembet vaga dirup warek higi.

⁵ Andoma o hup asigadek, o dingga adigat hegek, At Ala abinak At ayelomani enovaga bugu dogosogom atma, it nagu dugwit, “O awiya arupwak yiluk, mo il wulu wagya, eke, hali yevetwis, ogarupwak ai,” embetetek-at inigis. Eke, it ap ininis ombok pemerintah ovagak dugwit, mondok-mondok avakwa wene yugurugu dogosogom.

Yesus warup wene

⁶ Andien, at wene yuknugu akoen ambi inim yuknugu dugwit, “Wene yi, avyarat atma asogon, yiluk, yukhisiga. Nenasin Inis Ombok Ala en it ap navi-navi ako Averiniki vaga yugeraliga. At akoen, an malaikat yien, vage mbikit ogarup wene ako, At ayelomani yugeragiluk lakbani wagarikmu, wagi,” yuknugu higi.

⁷ Yesus en iri dugwit, “Dibas! An vage mbikit warisogon. Eke, hivis ogarup wene hat Yohanes en dirup watin yi ako, it avakwa dibaluk, musek laguselok, enendawi adenggen adigat hugu dogosogom o,” yiluk, yuknugu higi.

⁸ Wene yagan wagao naruk hunggu, oklarit wagao nil higya, oklaga ako andi, an Yohanes enat higi. An naruk hunggu, nil higya, ogagya lagirik, at hivis ogarup wene yuknigas malaikat ako inis siyabagiluk, avema seve iri lagima,

⁹ aren an yuknugu dugwit, “Anderogo ogarubuk. It haswei navi-navi inim, it wene dirup watin yi dibaluk musek lendagwi ako inim, hat inim, an hit ndatak Ala ayeloman atma, Ala adigat inis siyabagya dogwen,” yiluk, yuknigas.

¹⁰ Yuknugu lagarik, “Hivis ogarup wene yukhugu neyagek dirup watin ako, ogarup vage horok ari wagarikmu, wene andi, hwilakbaluk dogop moga. Ata, yi ap ndi ap yugeregek nagu dogwen.

¹¹ Yugeregek lagya heyagek ovara, it weyak ogagu dogop ombasagwi halok, weyagat okhidugu dogopwak. It ogarup dek menda hegek ugun-ugun ogarit lagu dogop ombasagwi halok, it andi ogo, ugun-ugunat ogarit lagu dogopwak. Eke, it nin weyak ogagetek sek adigat ogagu dogop ombasagwi halok, sek adigat ogarit lagu dogopwak. It nin Ala ake sek adik denek dogop ombasagwi halok, Ala ake adik denek-at, dogopwak o,” yiluk, yuknugu higi.

^12-13 Yuknugu lagarik, At Yesus en, “Dibas! O endak erogo welagagis adem Alpa inim, hivis atok vaga mondok dogop Omega inim, andi An nadigat. An nadigatma, An vage mbikit wagya dogomindik, yi ap ndi ap ogagu dogosogom vaga onggo wogeraup imbiti ako enadik-enadik wane-wane wogera warisogon atma, dibagu dogopwak o,” yiluk, yuknugu higi.

¹⁴ Yuknugu lagarik, Yesus en ambi yuknugu dugwit, “It sogwesum mudu hothedelagwi ako, yo iniluk oginivisiga enggen nunggwi, eke, o kota sup hurik adigat agarik yoma nadema nunggu wagwi, ogarup andok okbugu neyalok, enendawi adenggen umbutu dugwit o kota nunggusogom.

¹⁵ It nunggusogom ovara, it yangge ovagak ogasagwi inim, avakwa mumisa inim, avakwa ugun-ugun ogarit lendagwi menda inim, ap enarisagwi menda inim, madis inis adup ogasagwi menda inim, eke, yi ap ndi ap huluk-huluk wene yup hogop umbutu dugwit, huluk-huluk yugeralagwi inim, it andi, o kota andoma nonggegetek leget weram dogosogom.

¹⁶ Yuknugu lagarik, Yesus en ambi yuknugu dugwit, “Hit An naburi yi awi ndi awi homasagwi ako, hivis ogarup wene yi, vagalogo yukhera warupwak yiluk, nayonggo landiga menda malaikat ambi lakba wagi ako andi, An Yesus en aro. Yo aruknuk dagasiga andi hak, inis unggul Daut vaga wigalek ako, An aro. O yanggo yigiluk ogagya hegek dadiwap amumulip ogasiga ako, An aro,” yiluk, yuknigas.

¹⁷ Yuknugu lagama, malaikat akoen ambi yuknugu dugwit, “It avakwa is uvup oginipu halok, is iniluk oginivisiga ako menda onggodek unat nokheda warupwak yiluk, Ala Averiniki inim, Ndomba Eyak ogwa ako inim, iperenen, ‘Omanes o,’ yiluk, vage yugeralagwi. Eke, iperen enane hulisagwi akoen, it ogo ‘Nomanes,’ yiluk, avakwa yugurugu dogopwak,” yiluk, yuknugu higi.

Atok vaga yugugu hagagi wene

¹⁸ An Yohanes en hivis ogarup wene dirup watis yi, hit hivis henaruk hulusogom menda heneyave ovok erogo, wene hurimbis yukheraliga: Wene higya lagirik dirup watis menda yi hegek, saen wene hunogo menda ovaga hondalogo baguselok, Ala en edup-mbedup adwanggak adem 7 higya lagirik dirup watis ako anggin enovaga hondalogo bisayogon.

¹⁹ Eke, At Ala en, “Iniluk oginivisiga menda yo enggen nunggwi, o kota sek adik denekma nunggugwi, ogagu dogop o,” yiluk, yagagi mbuku yi vaga dirup warek agarik. Agarik ovara, hivis ogarup wene yuknugusigik dirup watis yi, avakwa en hobaluk, Ala wene nin andi wugu dugwit ovara, “Nin andi waup nenanggon o,” yiluk, sovalogo mbobaguselok, At Ala en it ap andi ogo, “Yo enggen ako naup dek,” eke, “O kota akoma nunggup dek, hit weramat dogones,” yiluk, yugerayogon.

²⁰ Eke, wene yi ovok erogo sigamat yukneraliga Yesus akoen, “Avyarat! An vage mbikit warisogon,” yiluk, yukneraliga. Anderogo iri lagama, anen, “Nasin Yesus, Hat vage mbikit warisogon andi, segat. Hodorogo omano, Amin!” yigi.

²¹ Nit Nenowa Inis Ombok Yesus akoen hit Ala aburi yi awi ndi awi homarisagwi ako, henabwa en sek okbugugu dugwit, hinimat dogopwak o. Amin.