Wahyu 21 - ALA WENE HIVIS DIRUP WATUGWA

Mbogot swi, wen swi ogarek hagagi wene

¹ Anderogo ogagya higya lagirik, werekma, wen-mbogot endak agarik ako inim, is ombok yanggadek laut ako inim, dek agya hegek, avoloma wen-mbogot swi ogarek ari wagya higi.

² Higya lagirik, hwa ambi agun hedagiluk, angge-angge dikduk erogo hedelok wandiga hak, o kota mondok adik denek Yerusalem swi ogarek ako, Ala werekma mbogot vaga en wambu wagya higi.

³ Wambu wagya lagarik, wene yugeraligama andoma en ane ombok ambi iri dugwit, “Ala avakwa dogopim akoma enanggelekma dogogiluk, eyave wambu wandiga yi, hinil hanes. At eyave ako aburi inim dugwit, iren, ‘Hat Nenasin Ala aro,’ yiluk, yugugwis, eke, Aren, ‘Hit An naburi aro,’ yiluk, yugirigya, ogagu dogosogom o.

⁴ Mbogot-wen endak ogarek ako vaga dugwit, enendawi anggin hugu lagagwa ako, dek agarikmu, swi ogarek ako vaga Enasin Ala inim dugwit, yup ninil owangga degerogo bisamindikmu, hambugwi, dewene yugwi, enendawi wakhidugwi, edup hugwi, ogagu dogosogom mondok dek,” yiluk, iris naruk hunggis.

⁵ Iris naruk hunggu lagarik, werekma, At wene yugeraligama kursi sek vaga horaik agarik akoen an yuknugu dugwit, “Anen, yi menda ndi menda ovok erogo swi ogarogo baliga yi, hinil hanes!” yiluk, iri lagarik, ambi yuknugu dugwit, “An wene avyarat atma nggedok yagaliga atma, wene yi dirup waru,” yiluk, yuknigas.

⁶ Yuknugu lagarik, ambi inim yuknugu dugwit, “O endak erogo welagagis adem Alpa inim, eke, hivis atok vaga mondok dogop Omega inim, andi An nadik atma, yukhigis ako andi, vage ogagyama yiluk yukhisiga. “It avakwa is uvup oginipu halok, Anen is iniluk ogonivisiga menda liris wulu wandigama en onggodek unat nodogo wogirigya dogosogon.

⁷ It An nane mbobagetek enendawi wadokdek vagago dugwit, des erogo musek laguselok, mavorangge wogerelagwi hak, okbisaup wene haruk hunggin ako oginipu dogomindik, An Enasin Ala-at agya, eke, it An naburi-at agwi, ogagu dogosogom.

⁸ Eke, it Ala wene musek laup enalon ombasagwi inim, avyarat ombarup enanggon ombasagwi inim, weyak mbobo ugup hegek ugun ogarit lendagwi inim, avakwa enasagwi inim, avakwa ugun oginivisagwi inim, mum vaga inirisagwi inim, ovat vaga inirisagwi inim, huvuwak ininis siyabelagwi inim, enane huluk yagalagwi inim, it ovok erogo it dogopim vipuk erogo bagagirikmu hali abya wuluk-herek adigat ogasigama akoma mabisayogon. Ndugwis mberen hambup ako andi, ambi, un iniluk dukluk, hambisagwi, eke, ambi, hivis hali abyama mondok-mondok mabisayogon ako, andi aro,” yiluk, yuknugu higi.

O Yerusalem swi ogarek hagagi wene

⁹ Yuknugu lagama, malaikat eneyave 7 akoen avakwa edup-mbedup okbisaup adwanggak adem 7 sogolowak vaga nudik vagago welagao ako, ambien nadema wagya lagarik, yuknugu dugwit, “Ndomba Eyak ogwa hedaup hwavyak ako, hil hanok yiluk, oma.”

¹⁰ Yuknugu lagarik, Ala Averiniki nendawima des iri lagama, neyave woknombolok ndom ombok adup vaga bani inggya lagarik, o kota mondok adik denek Yerusalem swi ogarek ako Ala werekma mbogot vaga en wambu wandiga, “Andi hil hanen,” yiluk, yuknigas.

¹¹ Yuknugu lagama, helep onggo ombok wukagak ovagak inis yaspis ako menda amumulip wane-wane, elose wukagak mondok awiya ogasiga ovagak, o kota swi ogarek amumulip ogasiga andi, Ala siyalek dugwit, awiya adigat agarik higi.

¹² Eke, o kota leget eyave wogo andi, mondok iya adup erogo valek, sup mbanggut mbalek 12 hudi, eke, sup mbanggut leget mbalek andok andi, malaikat eneyave 12-at inigis. Eke, sup mbanggut eyave vaga avakwa Iserali ininis unggul 12 menda ako ininis dirup warek inigis.

¹³ O leget eyave vaga sup mbanggut mo il daga wandigama timur vikit henggam mbalek, eke, mo il huruk yi landigama barat vikit sup mbanggut henggam mbalek, utara vikit sup mbanggut henggam mbalek, selatan vikit andi, sup mbanggut henggam mbalek higi.

¹⁴ O leget eyave valek andi, helep owak bago 12 vaga valek higi. Eke, helep owak bago ako vaga, At Ndomba Eyak aori lakbigik menda 12 ako ininis dirup warek agarik higi.

¹⁵ Eke, at wene yuknigas akoen o kota inim, sup mbanggut leget mbalek ako inim, o leget wogo inim, adup maren hudi agarik yiluk, wanggun yo ilirangge meter mbusi emas vaga inggimu higi.

¹⁶ Nil neyagek, at akoen o kota ako wanggun ilirangge ako vaga wal okhigya dugwit, atok winimen-wenamen inim, venak-venak inim, o owak adup iligik inim, andi 2.200 kilometer wane-wane wakhegek valek higi. O kota leget venak-venak wogo agarik ako andi, venak ambi adup, venak ambi dul, anderogo dek, adup wane-wane-at higi.

¹⁷ At malaikat akoen o kota valek wal okhigya lagarik, andi okbaluk, o leget eve adup iligikan ako adigat wal okhigya lagama, at wanggun ilirangge ako vaga wal okhagas andi, nit avakwa wal okhelagwi ako hak 65 meter-at ogarek higi.

¹⁸ O leget eyave ako andi, helep yaspis ako vaga valek, eke, o kota ako andi, mbusi emas-at menda vaga adigat wukagak mondok awiya ogasiga hak vaga valek higi.

¹⁹ O kota leget ako, yi helep ndi helep eyave sek halok adigat ovaga dikduk ogarek owak bagao higi. Helep owak wenamen ndalek andi, helep yaspis. Helep yaspis ovaga bago ako andi, helep nilam. Helep nilam ovaga bago ako andi, helep mirah. Helep mirah ovaga bago ako andi, helep zamrud.

²⁰ Helep zamrud ovaga bago ako andi, helep unam. Helep unam ovaga bago ako andi, helep sardis. Helep sardis ovaga bago ako andi, helep ratna cempaka. Helep ratna cempaka ovaga bago ako andi, helep beril. Helep beril ovaga bago ako andi, helep krisolit. Helep krisolit ovaga bago ako andi, helep krisopras. Helep krisopras ovaga bago ako andi, helep lazuardi. Helep lazuardi ovaga bago atok vaga ako andi, helep kecubung, helep elose eyave sek vaga adigat dikduk ogarek valek higi.

²¹ Sup mbanggut eyave 12 menda ako andi, helep onggo ombok menda inis mutiara vaga enadik-enadik ogarek higi. Sup mbanggut ambi, helep mutiara ambi ogarek atma, nin ogo, anderogo adigat ogarek higi. Eke, o kota ilim sup yago andi, mbusi emas menda adigat wukagak mondok awiya ogasiga ovagak ndalek higi.

²² At Anye Adigat Agarik Nenasin Ala inim, At Ndomba Eyak inim, Ala awi valek ovagak eneyave enanggelekma inimat werekma, it avakwa Ala ninim agurik ombarupwak yiluk, awi valek ako degat higi.

²³ At Ala mondok siyalek eyave awiya iya erogo ogagya ako vaga o kota andi, awiya ogagya, eke, hali yevedek ovagak andi, Ndomba Eyak en At awiya anderogoat ogagya, ogasagwi atma, it avakwa en, “Mo il inim, saut inim, awiya arupwak ai,” yiluk, embetetek-at inigis.

²⁴ Yi avakwa ndi avakwa ininis unggul adik-adik ovok erogo o awiya andi vaga nagwis, eke, yi ap ndi ap ininis ombok wen vaga agarwik ovok erogo o awiya andi vaga enangge yi menda ndi menda onggo ombok menda hedelok nunggugwi, ogagu sigis.

²⁵ O kota andoma o hup asigadek mondok-mondok dingga adigat agarik atma, sup mondok hurik-at higi.

²⁶ Yi avakwa ndi avakwa ininis unggul adik-adik ovok erogo enangge-enangge wisane werek halok, vok yugeralagwi menda ako hedelok, o kota andoma nunggugu sigis.

²⁷ Nunggugu sigis ovara, it weyak enendawima vagago agarwik, weyak mbobo ugup hegek ugun ogarit nagwis, huluk yugwi, ogasagwi ako halok andi, mondok nunggugu sigibuk. Ata, it avakwa iniluk mondok-mondok okbisaup ininis mbuku vaga dirup warek Ndomba Eyak vagago agarik andi halok, adigat nunggugu sigis.