Wahyu 20 - ALA WENE HIVIS DIRUP WATUGWA

1.000 tahun vaga ogagu dogop wene

¹ Andi okbaluk, malaikat ambi Hambuluk Lendagwima Nggilin Elola sup hunsi inim, mbusi heda ombok inim, inggimu wolok, mbogot vaga en wambu wagya higi.

² Wambu wagya lagarik, at mbas ombok awigovak ovagak o muk erogo avakwa enambukmu dagasiga menda Sile ako, inis ambi Setan aratma, at sovalogo bagya dugwit vagago mbusi heda ako vaga makbaluk, 1.000 tahun vaga dogopwak yiluk,

³ nggilin elola wombabagya higi. Wombabaluk, at Sile ako yugugu dugwit, “O hivis ndugwis ambiat visilogo hekbagaup ovara, yogak avakwa enambukmu enggetek heyagek 1.000 tahun vaga heda marek yoma-at dogwen,” yiluk, mbo wombabaluk, sup hunsi larogo bagya higi.

⁴ Sup hunsi larogo bagya lagama, wene yugerelagwima kursi sek ndalek higya lagirik, it andi vaga horaik agarwik ako avakwa enowak dinggu dogopwak yiluk, andok okbugu higi. Anderogo higya lagirik, it Ala wene musek lagu dugwit, Yesus wene vagalogo yugeragagi ako avyarat ombakluk, yugeregek lagusigik, enunggul mbalogo bogogwa menda enanggela ako inigis. It andien, “At yangge endak daga wagagi eyave inim, agut wakhegek huvuwak ogarek ako inim, it ininis nit siyabagek ogarusogombuk. Eke, yangge inis ako andi, nit nenembet vaga inim, nininggis vaga inim, andi ogo, ovok erogo dirup warogo baup dek o,” yiluk, yuguselok, enunggul mbalogo bogogwa menda enanggela ako iniluk akluk Keretus inim ininis ombok dugwit, avakwa wene yugurugusigik, 1.000 tahun-at agya higi.

⁵ Enendak iniluk erogo mondok okbisaup ako it aro. Eke, it nin hombagagwa menda ako andi, 1.000 tahun okbaluk, iniluk erogo mondok okbisaup yiluk agarwik inigis.

⁶ It enendak iniluk erogo mondok okbisaup ako, Ala ake denek dugwit, enendawi adenggen ombogat dogosogom. It andi, ndugwis mberen vaga hambusogombuk. It imam-imam ovagak dugwit, Keretus Ala iperen enake ogarit nagwis, eke, Keretus inim ininis ombok dugwit, avakwa wene yugurugwi, ogagusigik, 1.000 tahun-at agya higi.

Sile hali abyama mabaup wene

^7-8 Anderogo higya lagirik, 1.000 tahun okbaluk, Sile heda marek nggilin elola agarik ako heda visilogo ilikba daga wagya higi. Visilogo ilikba wagya lagama, yi avakwa ndi avakwa ininis unggul adik-adik o Nggok inim, o Magok inim, atok-atokma andoma ovok erogo homakbisiluk, enambukmu inggya dugwit, ndup ogarup ane huluk molalogo enendawima malit lagya higi. It avakwa ndup ogarup yiluk homarisagwi andi, it avakwa eneyave is yinggi leyalek ovagak eve wisane anderogoat homagu sigis.

⁹ Inugu lagirik, o huris hovak ombok erogo bagagirikmu andoma at Sile en avakwa is yinggi leyalek ovagak eneyave wisane anderogoat homakbugu higi. Homakbisiluk, iren it avyarat umbutugwa Ala aburi ako inim, o kota Ala endawi enabwa ombasigama ako inim, sup larogo iniruguluk, avilis ambot walinggu sigis. Walinggao ovara, hali abya mbogot vaga en wuluk yagan wambu wagya dugwit, avakwa ako ovok erogo hali abya en nenggek lagya dugwit ovok degerogo bigik lagya higi.

¹⁰ Eke, at avakwa enambukmu dagasiga menda Sile ako, vagarogo hali abya wuluk-herek adigat yagaligama at yangge aninis werek endak daga waga inim, at aswe hivis daga waga huluk wene yagan lagya lagagi ako inim, iperen werekma akoma mabagya higi. Mabagya lagama, hup-dingga hali edup en mondok-mondok yagan yagavek-nggodek yugu sigis.

O hivis vaga enowak dilup wene

¹¹ Anderogo inugu lagirik, Ala wene yugeraligama kursi sek ombok yanggwi mudu ovagak ako vaga At eyave horaik higi. Horaik hegek, wen-mbogot At elokwema eve degat agya lagama, andi okbaluk, hivis avoloma ambi ari wagya hegetek, mondok-mondok degat agya higi.

¹² Dek agya lagama, avakwa hombagagwa menda ininis werek inim, ininis dek inim, wene yugeraligama adema mendek inigis. Andoma inigik, mbuku nin adik-adik mbiganggu dugwit, mbuku ambi avakwa mondok-mondok iniluk okbisaup ininis dirup warek menda mbiganggu higi. Mbiganggu lagarik, avakwa hombagagwa ako hambegetek iniluk dugwit enandogon ogagu lagagwa mbuku vaga dirup warek ako bikhegek enowak dilogo onggo wane-wane okbugu higi.

¹³ Anderogoat, it is en sovalinipigi is yanggadek laut endawima agarwik ako yegedogo wulu wagwi, eke it hombagagwa hambuluk lendagwima agarwik ako inim, wulu wagwi, ogagu lagaoma Ala en it ao hambegetek iniluk dugwit enandogon ogagu lagagwa ako enowak dilogo onggo wane-wane okbugu higi.

^14-15 Andi ogagya lagarik, it nin iniluk okbisaup mbuku ako vaga ininis warek dek halok, hali abyama akoma mabugu dugwit, hambisagwi adem inim, Hambuluk Lendagwima inim, ovok erogo vagarogo hali abya wuluk-herek adigat yagaligama akoma mabugu sigis. “Ndugwis mberen hambup,” yiluk, dirup warek ako andi, ambi, un iniluk dukluk, hambisagwi, eke, ambi, hivis hali abyama mondok-mondok mabisayogon ako, andi aro.