Wahyu 2 - ALA WENE HIVIS DIRUP WATUGWA

Ala aburi o Evesus homarisagwi ako yugeragagi wene

¹ Yuknugu lagarik, werekma, At Yesus dadiwap 7 inggis amotkan vagago agarik akoen ambi inim yuknigas. Yuknugu dugwit, “An wene ambi yukhisogon. Yukhugu neyalok, at malaikat An naburi o Evesus homarisagwi malenombogo agarik akoen aburi yugerapwak yiluk, dirup warogo lakbanogen, yukhisogon.” “An ninggis amotkan dadiwap 7 vagago dugwit, hali yevedogo bagek mbusi emas vaga ogarek 7 anggelekma landiga An akoen, it An naburi o Evesus menda wene yi yugeraliga:

² Hit An naburi o Evesus ogarit lendagwi ako An nilup. Hit An namusek wagu dugwit, henanyedek okhinipu hegek hekbagetek mondok hunik adigat ogarit lagwi, it ap weyak menda nit nenanggelekma yoma dogop mondok dek o, yiluk, henanggon umbutwi, ogarit lendagwi ako andi, An nilup aro. Eke, it ap nin lakbigik menda dek ovara, wagu lagarwik, ‘Ala en lakbinini waga o,’ yiluk, yukhiruguselok, hiren enavut mbabisiluk, ‘Yi enane huluk yagan wagao,’ yiluk, mbobiselagwi ako andi, An nilup.

³ Eke, An ninis adigat yi awi ndi awi wigak yupwak yiluk, ogarit lendagwi andi vaga anggin-mbanggin okbigigik lagusigik, henendawi wadokdek hora yiluk wugu dugwit, sakdida okhinipu hegek mondok hunik adigat ogarit lendagwi ako andi, An nilup.

⁴ Nilup ovara, weyak ambi ogagu hinigis ako andi, yukherayogon. Endak hit hendawi hunik wisane dugwit oknitu lagagup ovara, yogak andi, ninim hunik dek mbobanunggwi hinugu lagirik, yukheraliga.

⁵ Hit endak An ninim hunik dugwit, henendawi adenggen vaga nane musek lagu lagagup ako hekbaluk, yogak mondok adik ogarit lendagwi. Hit adik ogarit lendagwi ako, henasam helok, henomaduk mbobagu dogomundik, yungguliluk heneyami vaga wakluk, endak hit hendawi hunik wisane dugwit oknitu lagagup ako wane-wane ogarit lagu dogones. Hit henasam helok henomaduk mbobagetek hiniselok andi, An wagya dogomindik, hali yevedogo bagek mbusi emas vaga ogarek hit menda ako, avoloma en nggigilogo wibayogon.

⁶ Eke, ambi sek ogagu hinigis ako andi, yi: It ap Nikolaus ane musek nagu dugwit, ogarit lendagwi andi, An nanggon adigat ombasiga ako, hit wane-wane henanggon ombasagwi ako segat.

⁷ Henaruk werek a dek a? Henaruk werek halok, Ala Averiniki en An naburi yi awi ndi awi homasagwi yugeraliga ako, des erogoat hunggu dogones. Eke, hit ap sanien An nane mbobagetek mondok henendawi wadokdek vagago dugwit des erogo musek lagu hiniselok, yo enggen avakwa iniluk oginivisiga menda Ala eyavumu agarik ako, ‘It naup segat,’ yugerayogon. Wene yi yigi ako ovok erogo at malaikat An naburi o Evesus homarisagwi malenombogo agarik akoen aburi yugerapwak yiluk, dirup warogo lakbain,” yiluk, yuknigas.

Yesus aburi o Simirana homarisagwi ako yugeragagi wene

⁸ Anderogo yuknugu lagarik, ambi yuknugu dugwit, “At malaikat An naburi o Simirana homarisagwi malenombogo agarik akoen aburi yugerapwak yiluk, dirup warogo lakbanogen, yukhisogon.” “An endak erogo welagagis, hivis atok vaga mondok dogosogon, eke, hombagagis ovara, niluk agya lagagirik agirik akoen, wene yi it An naburi o Simirana menda yugeraliga:

⁹ Hit An naburi o Simirana ogarit lendagwi ako, An nilup. Hit anggin-mbanggin henovaga agya dugwit, hininggidek asiga ovara, winimen menda vaga hininggis werek ovagak agipik ako An nilup. Eke, it Yakuri dek menda Sile ogasiga wane-wane ogaruguluk homarisagwi ako menda en, un hulugat, ‘Nit Yakuri menda aro,’ yiluk, An naburi o Simirana menda enane wiyiknom-weyaknom erogo bigigelagwi andi, nilup adigat agirik.

¹⁰ At Sile en hit henavut mbaligiluk, avakwa enendawi nomalhinipu lagagimu, hit nin heda marogo mabiselagwima mabugugwis, eke nogo 10 vaga anggin-mbanggin okbigigasogom ovara, henalon habuk. Anggin-mbanggin anderogo okbugugusigik, hiren ‘Hambilaup sek aro,’ yiluk, An nane mondok vagago dogosogom halok, mondok-mondok hiniluk dogop menda nggudit-nggudit mendarek hak onggo yikbigigayogon o.

¹¹ Henaruk werek a dek a? Henaruk werek halok, Ala Averiniki en An naburi yi awi ndi awi homasagwi yugeraliga ako, des erogoat hunggu dogones. Eke, hit ap sanien anggin-mbanggin ako menda henovaga agya hegek ovara, An nane mbobagetek mondok henendawi wadokdek vagago dugwit des erogo musek lagu hiniselok, ndugwis mberen vaga hambusogombuk. Wene yi yigi ako ovok erogo at malaikat An naburi o Simirana homarisagwi malenombogo agarik akoen aburi yugerapwak yiluk, dirup warogo lakbain,” yiluk, yuknigas.

Yesus aburi o Veragamus homarisagwi ako yugeragagi wene

¹² Yuknugu lagarik, ambi yuknugu dugwit, “At malaikat An naburi o Veragamus homarisagwi malenombogo agarik akoen aburi yugerapwak yiluk, dirup warogo lakbanogen, yukhisogon.” “An nambusinggarep erasul ovagak venak-venak ovat marek vagago agirik akoen, it An naburi o Veragamus menda wene yi yugeraliga:

¹³ Hit at Sile anye werek dugwit o vagago agarikmu agipik andi An nilup. Sile vagago agarikmu akoma agipik ovara hegek, An nane wogogup ako mondok vagago agipik. Eke, An nabut ambi nane des erogo wokbaluk hutun-howam yugeregek lagya lagagi inis Andipas ako, watugwa. Hit henanggelekma Sile agarikmu henawi kota andoma-at watugwa. Watu lagagwama, hit henendawi avyarat ombakluk, An nane wogogup ako, ‘Musek laup nenanggon o,’ yiluk, yup ovara, dek. ‘Nit Nenowa Keretus atma, At ane wigyo akoat mondok vagago dogosogom o,’ yiluk, yugu hinigis.

¹⁴ Anderogoat yugu hinigis ovara, wene ambi yipi-nipi ogagu hinigis ako andi, yukheraliga. O endak erogo at Mbileam en it avakwa Iserali menda Ala wene mbobaluk madis anggom warek nunggwi, eke, akwa ugun-ugun oginivit lagwi, ogagu dogopwak yiluk, at Mbileam en ap Mbalak mamulogogi. Mamulugu lagagimu, ap Mbalak en Iserali menda mamuleragagi. Wene ako, hit An naburi o Veragamus agipik henanggelekma it ambetap hinim homarisagwi ninen wene ako menda musek lendagwi.

¹⁵ Anderogo ndatak, hit nin ogo at Nikolaus ane musek lendagwi.

¹⁶ Anderogo ogagu hinigirikmu, henasam helok, hit weyak ogasagwi ako mbobagu dogones. Mbobagetek hiniselok andi, An vage wagya dogomindik, mbusinggarep erasul An nelagapma agarik yi ako vaga hiniri warisogon.

¹⁷ Henaruk werek a dek a? Henaruk werek halok, Ala Averiniki en An naburi yi awi ndi awi homasagwi yugeraliga ako, des erogoat hunggu dogones. Hit ap sanien An nane mbobagetek mondok henendawi wadokdek vagago dugwit des erogo musek lagu hiniselok, An onggo mberen wokherayogon. Ambi andi, erom mbogot vaga menda inis mana hwilago agarik ako wokherayogon. Ambi andi, hininis swi salogo helep mudu yanggwi hak ako vaga dirup warogo wokherayogon. Hininis warek ako andi, it nin andi inilup arusogombuk, ovara, it ininis warek wogerayogon ako adigat inilup arusogom. Wene yi yigi ako ovok erogo at malaikat Ala aburi o Veragamus homarisagwi malenombogo agarik akoen aburi yugerapwak yiluk dirup warogo lakbain.”

Yesus aburi o Siyatira homarisagwi ako yugeragagi wene

¹⁸ Yuknugu lagarik, ambi yuknugu dugwit, “At malaikat An naburi o Siyatira homarisagwi malenombogo agarik akoen aburi yugerapwak yiluk, dirup warogo lakbanogen, yukhisogon.” “An Ala Abut, nil hali abya wuluk-herek yagaliga hak dugwit, An nisok andi, mbusi tembaga amumulip wisane ogasiga akoen, it An naburi o Siyatira menda wene yi yugeraliga:

¹⁹ Hit An naburi o Siyatira ogarit lendagwi ako An nilup. Hit avakwa henendawi hunik oginipwis, avyarat numbutu dugwit henendawi novaga vanggabanunggwi, henaswemuni yonggar-inigik nagwis, anggin-mbanggin okbigigusigik, henendawi wadokdek dugwit wugwi, ogarit lendagwi ako ovok nilup. Eke, endak horok madugat ogagu lagagup ovara, yogak andi ombok erogo ogarit lendagwi ako, nilup-at ovara,

²⁰ maduk ambi yipi-nipi ogagu hinigirikmu, yukheraliga. Hwa Isebel akoen ane huluk iri dugwit, ‘An navi, Ala Averiniki en yuknugu hegek Ala wene yukheraliga menda aro,’ yiluk, yukheraliga ovara, hit mberigitek, ‘Sek aro,’ yiluk hekbagu hinigirikmu, mondok An nanggon oknitya halok yukheraliga. Hwa akoen An nayelomani eneyave wisane nomaliniviluk lagya dugwit, akwa ugun-ugun oginivit lagwi, eke, madis anggom warek nunggwi, ogarit lagu dogopwak yiluk, mamuleraliga ako An mondok nanggon.

²¹ At hwa andi, asam helok, omaduk mbobapwak yiluk, abyam sok higi ovara, aren imbita dugwit ‘It ninen an okneraup, ombasiga ako hekbaup nanggon,’ yiluk, ogarit landiga.

²² Ogarit lagyama, edup en yagavek-nggodek iri dogopwak yiluk, An anggin ombok ovaga bayogon. Okbagya dugwit, it nin hwa andi inim weyak ogarit lendagwi ako ogo, enasam helok enomaduk mbobagetek iniselok, it anderogoat anggin mondok durogo enovaga horakbugu neyasogom.

²³ Hwa andi, eyagi at ane welagwi menda ako it ovok erogo enarit lagya neyasogom. Enarit lagya neyalok, it An naburi yi awi ndi awi homasagwi menda ako ovok erogo, ‘Nit nenendawi ombasagwi inim, nenendawi hobaluk ogarit lendagwi inim, ovok erogo dibininiluk onggo wane-wane wokneraliga Yesus andi, Arat higyo,’ yiluk, An neyave inilup arusogom.

²⁴ Eke, hit nin o Siyatira agipik ako, hwa ako ane inim, Sile ogasiga mbauk hwilago yagalagwi wene inim, hit musek lagatek hekbagagup andi, An wene ambi yi yukheraliga: ‘Anen anggin ambi henovaga bigigaup embetetek ovara,

²⁵ An warugwis andi vaga hit An nane avyarat ombakluk wogogup ako mondok wadokdek vagago dogones,’ yiluk, yukheraliga.

^26-27 Hit ap sanien An nane mbobagetek henendawi mondok wadokdek vagago dugwit, An ogarup ombasiga ako ogarit lagusigik, o hivis ari wagya halok, An yerogo okbisayogon: An Nasin en avakwa ininis unggul adik-adik menda navema bisiluk An Enasin dogogiluk, mondok okbaninggigi ako ndatak, Anen ogo, it anderogo okbisayogon. It anderogoat, yi avakwa ndi avakwa enavema bisiluk, it enasini dogopwak yiluk, mondok okbisayogon. O muk erogo Ala en Yesus avok iri dugwit: ‘Mbusi manggen bogalek inggimu dugwit, ane anye vaga wene yugirigya, Eke, yi menda ndi menda wen nggabok vaga ogarek ako, lekhelok savubagusim yuvulik-nggelalek yagaliga hak, ogarogo bugu, ogarisogon o,’ yiluk, yagagi ako wane-wane An okbaninggigi, eke it anderogoat, yi avakwa ndi avakwa enavema bisiluk, enane enanye vaga yugurugu dogosogom.

²⁸ Eke, it Ala wene mondok wadokdek vagago werekma, An wagya dogomindik, o yanggo yigiluk ogagya hegek dadiwap ambiat amumulip ogasiga ako wogera wasogon.

²⁹ Henaruk werek a dek a? Henaruk werek halok, Ala Averiniki en An naburi yi awi ndi awi homasagwi yugeraliga ako andi, des erogoat hunggu dogones. Wene yi yigi ako ovok erogo at malaikat An naburi o Siyatira homarisagwi malenombogo agarik akoen aburi yugerapwak yiluk dirup warogo lakbain.”