Wahyu 19 - ALA WENE HIVIS DIRUP WATUGWA

Ala inis siyabagu sogogi wene

¹ Andi hunggu lagirik, werekma, o mbogot vaga andoma avakwa wisane homago enane ombok vaga yagalagwi hak yugu dugwit: “Nenasin Ala wa! Hat hadik hanye wisane, nenagap wendarisiga, hinis mondok siyalek, agindik atma, ai Ala wa, haleluya!

² Hwa yanenggek mondok iya erogo ogarit laga akoen, ‘Okneramanes o,’ iri halok, yi ap ndi ap ovok erogo weyak ogari nonggegek ogasagwi ako vaga o wen vaga andoma weyak ogarogo bagya lagagi ako onggo hwa ako ovaga horakbagya, eke, hwa akoen Hat hayelomani initigi ako, onggo arat watya, ogagindikmu, Hat avakwa des erogo enowak dinggu dugwit atma nggedok ogasiga atma, hwa ako owak dilogo weyak ogagya laga onggo okbagindikmu, Wa!” yiluk,

³ yugu sigis. Yugu lagarwik, ambi yugu dugwit: “O kota ombok hwa yanenggek ovagak ako, hali ninggya dugwit, ndugurek-ndagarek yuvuk hunigat ovaga yaruk inggya dogosogon o,” yiluk, ambi inim, “Ai Ala wa, haleluya,” yugu sigis.

⁴ Yugu lagaoma, it mbogot vaga agarwik enanggok ap ombok-ombok eneyave 24 inim, avakwa en iniselagwidek menda eneyave 4 ako inim, At wene yugeraligama kursi sek vaga horaik agarik Ala ako avema seve yiluk, inis siyabagu dugwit, “Nenasin wa,” yiluk, “Haleluya, Amin,” yugwi ako naruk hunggis.

Ndomba Eyak ogwa dambubugu dugwit, ogarup wene

⁵ Yugwi hunggu lagirik, werekma, wene yugeraligama en ane ambi iri dugwit: “Hit Ala ayelomani en At Ala henalon ombasagwi menda hininis werek inim, hininis dek inim, ovok erogo Nenasin Ala adigat inis siyabagu dogones o,” yiluk, iri higi.

⁶ Iri lagama, avakwa wisane ombok homago enane ambi vaga-at yugu dugwit, is satut ombok ane yagaliga hak, eke unggulane sukup yagaliga hak, yugu dugwit: “At Anye Adigat Agarik Nenasin Ala ako, avakwa sek inim, weyak inim, ovok erogo avema bisiluk, Enasin Inis Ombok agarik Aratma, ‘Haleluya,’ yiluk, inis siyabasogom o.

^7-8 At Ndomba Eyak ako ogwa hedaup amor ari wagya lagama, ogwa ako angge-angge dikduk erogo okhedelok wagyama, asum adup ambi mondok eve sek mudu abinak swa yanggwi hak yikhedapwak yiluk, wogoguma, nenadenggen en hai watu dugwit, Ala inis siyabagu dogosogom o,” yiluk, enane yugu sigis. Eke, asum eyave adup ako andi, it Ala aburi ake denek en weyak ogagetek sek adigat ogasagwi ako ndatak-at higi.

⁹ Higyaim, malaikat akoen an yuknugu dugwit, “Wene yi dirup waru: Ndomba Eyak ogwa hidigya dugwit, agasogo isago inim napwak yiluk, it enayonggo yugerasogom andi adigat inim nasogom atma, enendawi adenggen umbutu dogosogom,” yuknugu lagarik, ambi inim yuknugu dugwit, “Wene andi, Ala en avyarat yagas,” yiluk, yuknigas.

¹⁰ Yuknugu lagama, an Yohanes en malaikat ako avema seve yiluk, inis siyabagiluk ogagyaim, aren yuknugu dugwit, “Moga! An siyabanubuk! An inim, hat inim, hat haswei wene Yesus en yugirigya lagagi ako vagago agarwik inim, nit ovok ndatak Ala ayelomani agurik. Ala Averiniki en nenendawima yuknirigya hegek yugurugu dugwit, wene Yesus en yagagi ako yugeralagwi. Anderogo atma, Ala avema seve yiluk, At adigat inis siyabagya dogwen,” yiluk, yuknugu higi.

Ap kuda ambot vaga hora yiluk wagagi wene

¹¹ Yuknugu lagarik, mbogot vaga sup hurik hegek, ap ambi inis Avyarat Adigat Yagaliga, Ala Yugisiga ako Des Erogo Ogasiga ako, kuda mudu swa yanggwi iris ovagak ambot vaga hora yiluk wagya higi. Wagya dugwit, des erogo enowak dinggu dugwit, ndup des erogoat sumburit wagya higi.

¹² At il andi, hali abya ovagak. At unggul vaga nggudit-nggudit mendarek wisane yirik, eke, At inis salek ambi eyave vaga dirup warek agarik ako, avakwa en dombalup meyan At adigat ilup agarik.

¹³ At asum ako vaga avakwa enamuya yanggadek longgabaluk yikhedelok lagya, eke, At inis andi, Ala Wene-at yugu sigis.

¹⁴ Wagya hegek, it yegen werek mbogot vaga agarwik ako ovok erogo enasum adup mondok segedok eyave mudu swa yanggwi ovagak horek menda yirik dugwit, enadik-enadik kuda iniris yanggwi ovagak ambot vaga hora yiluk, inim wagu sigis.

¹⁵ Inim wagu dugwit, At yi avakwa ndi avakwa ininis unggul adik-adik ovok erogo sovalogo bisaigen yiluk, mbusinggarep adup erasul ovat lep erogo mago elagapma sisik erek lagya dugwit, sovalogo bugu higi. Sovalogo bisiluk, mbusi manggen bogalek ambi inggimu dugwit, At ane anye vaga wene yugirigya higi. At Anye Adigat Agarik Ala aninis en avakwa okbisaup ako andi, anggur agas sopalisagwi hak Aratma, At akoen avakwa anderogoat sopabisilin lagya higi.

¹⁶ Eke, At inis salek ambi yerogo: Avakwa enasini ininis ombok inim, ininis werek inim, Ovok Erogo Enasin Inis Ombok Aratma, yiluk, At inis andi, arogwesum vaga inim, aganyenggen vaga inim, dirup warek higi.

^17-18 Higya lagirik, at malaikat ambi mo vaga mendek dugwit, yi swa ndi swa o ilim aroma wigaliluk wendagwi ako ane ombok vaga yugeragagi. Yugirigya dugwit, “It ap ininis ombok inim, ndugandok inim, ap enova anggat inim, kuda inim, it kuda ambot vaga hora yiluk ndup sumburi lendagwi inim, avakwa enayeloman inim, avakwa un agarwik menda inim, ap ininis werek ininis dek inim, yi avakwa ndi avakwa ovok erogo Ala en enarogo bisiluk, ininu navovok yiluk vipuk erogo bagarikmu, nawagu dogones,” yiluk, yugirigya higi.

¹⁹ Yugirigya lagama, yangge do ovagak aninis werek ima en wulu wagagi ako inim, avakwa enasini ap ombok-ombok ininis ombok inim, enaori yegen werek inim, iren At kuda ambot vaga horaik agarik ako aori inim ndup sumburuguluk, homakbaluk inigis.

²⁰ Andi ogagusigik ovara, at yangge do ovagak aninis werek endak daga waga eyave ako vagatao. Eke, at yangge hivis wen elola en daga waga eyave ako inim, vagatao. At yangge hivis daga waga ako andi, nggarogo ogarubuk menda ogarit lagya dugwit, avakwa wisane huluk wene molalogo yugeragagi ako. Aren, avakwa enembet vaga yangge endak daga waga ako inis dirup warek wolok nagu dogopwak yiluk, eke, at agut huvuwak ogarek ako inis siyabapwak yiluk, nggarogo ogarubuk menda ogarit lagya dugwit, huluk wene molalogo yugeragagi ako. Yangge mberen vaginipu lagarwik iniluk ngga-nggan vagago hali abya wuluk-herek adigat ogasigama akoma lakbugu higi.

²¹ Lakbugu lagarik, At kuda ambot vaga horaik mbusinggarep erasul ovagak elagapma sisik erek ako vaga yangge enaori yegen werek nin ako enarogo bigik lagya lagama, yi swa ndi swa ovok wagu lagarwik, avakwa enarek ako ininu-enamok mondok enagaum erogo nunggu sigis.