Wahyu 18 - ALA WENE HIVIS DIRUP WATUGWA

O kota Babel degerogo bagya hagagi wene

¹ Andi yuknugu lagama, malaikat adik ambi mbogot vaga en wambu wagya higi. At andi, ane anye mondok wisane dugwit, at abinak o wen vaga awiya wisane ogarit wambu wagya higi.

^2-3 Wambu wagya lagarik, ane mondok anye vaga iri dugwit: “O kota ombok Babel ako, dek aga, mondok degat aga o. It o kota Babel agarwik ako andi, hwa yanenggek ovagak atma, hwa akoen endawi ninggya halok, ‘Okneramanes o,’ iri halok, yi ap ndi ap ininis unggul adik-adik ovok erogo, anggur agas nelok, nenek-nenek yagan nelagwi hak, hwa ako ugun-ugun ogari wagwi, yi ap ndi ap enasini ininis ombok o wen vaga agarwik ako, it ovok erogo hwa ako ogari nunggugwi, eke, hwa akoen ap endawi ninggya halok, eyave ogari nonggegek ogasagwi vaga, it avakwa yi awi ndi awi onggo hunisagwi menda andok agarwik ako, ininggis werek okhiduguselok, o Babel ako ovok dek aga atma, yogak Sile aori inim, yi madis ndi madis inim, yi swa ndi swa nelagwidek menda nungguselok enagoda yagalagwi inim, ovok erogo enawi okheda nunggu wagao,” yiluk, ane ombok vaga iris ako naruk hunggis.

^4-5 Hunggu lagirik, werekma, mbogot vaga en ane adik ambi iri dugwit: “Hit An naburi wai. It o kota Babel enomaduk ovaga dambuk mbogot wane-wane ari inggya halok, At Ala ape wenggelek agarik atma, hinim weyak ogarit lagu hiniselok, it weyak onggo enovaga bugu dugwit, hinim henovaga bugugu haoen, o andoma hekbisiluk, hoda wunggu dogones.

⁶ O Babel en hit avakwa okbugugu lagagwa ako, yogak hiren it onggo wane-wane okbugwis, eke, o Babel en An naburi ndugwis ambi vaga weyak okbugu lagagwa ako hak, yogak it ogo mberen vaga anggin enovaga bisilin lagwi, eke, it hinim ogorek dugwit, enaninis is nudik ovagak ndugwis ambi vaga henovaga ndilogo bugugugwa ovara, yogak onggo hit henaninis mberen vaga enovaga ndilogo bugwis, ogagu dogones o.

⁷ At Babel ako andi, hwa yanenggek ako ovagak atma, endawi imbita dugwit, ‘An hwa sogwa en nendawi wakhidigya dugwit, yup yasogonbuk ovara, ap eneyave wisane bikneya waguselok, an hwa ombogat agirik higi, imbita dugwit, nendawi adenggen wisane ombasiga o,’ yiluk, endawi siyabatigya dugwit, inis siyalek iris-ovagangge danggulik adigat agirik ako avoloma adenggen dek agya dogomindik, endawi burup iris, edup en yagavek-nggodek iri dogopwak yiluk, anggin mondok ovaga horakbagu dogones.

⁸ At ogarit landiga awene amburup mbalogo owak dilisogon Nenasin Ala ako andi, anye wisane atma, at wogobetegek landiga onggo ndugwis ambiat anggin ovaga agya dugwit, edup agya, erom uvup agya, endawi wakhidigya, ogagya hegek, eyave hali ninggya dogopwak yiluk halima mabasogom,” yiluk, yuknugu higi.

^9-10 Yuknugu lagarik, werekma, ambi inim yuknugu dugwit, “It ap ininis ombok yi awi ndi awi o wen vaga agarwik menda en hwa ako bikha wagu lagarwik, inim sek erogo dugwit, okbagek adigat ogasagwi akoen, hwa ako hali edup en na iris ako enaruk hobaluk, ‘Nit ogo anderogo okbininggu haoen, nenalon i!’ yiluk, o adumu lirup erogo mendek dugwit, ‘O kota Babel yi, habwa o! hanye wisane welagen ovara, weyak ogagya lagen onggo, mo il ambiat vaga anggin ombok hovaga hora yi waga, habwa o!’ yiluk, o kota hwa yanenggek ako ovagak atma, hali ninggya yuvuk inil hugu dogomundik, enendawi wakhidugu dugwit, ayup yagu dogosogom o,” yiluk, yuknugu higi.

¹¹ Yuknugu lagarik, ambi yuknugu dugwit, “It avakwa yi awi ndi awi onggo hunisagwi menda andok agarwik ako ogo, o kota Babel hwa yanenggek ovagak hali hunggwis ako inil hugu dogomundik, enendawi wakhidugwi, yup yagwi, ogagu dugwit, ‘Ayai, nit nenangge-nenangge ako, sanien onggo hunheda warumwi?

¹² Nenangge mbusi emas inim, mbusi perak inim, helep enggen elose sek onggo ombok menda permata inim, mutiara inim, yum eyave sek adup inim, sogwesum ndimbup-ndimbup agare ovagak inim, saup mudu ovagak inim, yum onggo ombok menda inis sutera inim, yo amben eyave sek menda inim, wam gajah aik vaga ogarek inim, yi menda ndi menda yo eyave sek vaga ogarek inim, mbusi tembaga vaga ogarek inim, mbusi eyave ako vaga ogarek inim, helep pualam vaga ogarek inim,

¹³ kayu manis inim, henda-irica inim, amben eyave sek menda inim, enagamut eyave sek hapwak yiluk, yo mur amburup eralisagwi menda inim, yivi-nggami agamut ako inim, anggur agas inim, saitun amburup inim, erom tepung inim, gandum enggen mbalek inim, wam sapi-ndomba inim, kuda inim, kereta kuda en liriluk lendagwi menda inim, avakwa enayeloman dogopwak yiluk eneyave hunhedelagwi menda inim, onggo hunhedaguluk avakwa vaginipwis inim, yi menda ndi menda wolok waguselok, ayai, sanien hunheda warumwi?’ yiluk, yusogom.”

¹⁴ “Yugu dugwit, ‘Hat hwa yi, yi menda ndi menda eve sek amburup werek menda adigat, “Namwa dogopwak ai,” imbita lagen ovara, yogak hangge dek agindikmu, hivis ambi hil higya dogogun mondok dek o,’ yiluk, yusogom.”

¹⁵ “It avakwa yi awi ndi awi onggo hunisagwi menda andok agarwik ako menda hunggu dugwit, ininggis werek okhidugu lagagwa ako, o kota Babel hwa yanenggek ovagak ako edup en na iris enaruk hobaluk, ‘Nit ogo anderogo okbininggu haoen, nenalon o,’ yiluk, enalon en o adumu lirup erogo mendek dugwit, abwa en ayup yagu dugwit:

¹⁶ ‘Hat heyave o kota ombok Babel agindik yi, habwa o. Hayum mudu elokwe ndimbup-ndimbup agare ovagak inim, saup mudu ovagak inim, yirik dugwit, mbusi emas inim, helep enggen elose sek onggo ombok menda permata inim, mutiara inim, ako vaga hiris hovagangge dikduk okhedelok lagya heyalok,

¹⁷ mo il ambiat vaga hat hangge-hangge iya ako dek agarikmu, habwa o,’ yiluk, yusogom.” “Eke, it mburis ombok wolok lendagwi enasini inim, it mburis elola yidik lendagwi menda inim, lagu dugwit mburis wolok nelagwi menda inim, eke, mburis vaga hunhedegek lendagwi menda inim, ovok erogo o adumu lirup erogo mendek dugwit,

¹⁸ hwa yanenggek ovagak o kota Babel ako hali ninggya dugwit yuvuk inggya inil lakhugu dogomundik, ‘Kota ombok yerogo ambi agarik dek atma, yi oklaga ai,’ yiluk,

¹⁹ enendawi wakhidugu dugwit, wul inunggumu lisilogo betasogom. Lisilogo betugu dugwit, ‘O kota ombok eyave sek adigat agindik yi, habwa. Avakwa ininis unggul adik-adik ovok erogo enangge-enangge yi awi ndi awi en mburis vaga wolok waguselok, hunhidugu dugwit, ininggis werek okbugu lagen ovara, mo il ambiat vaga-at dek agindikmu, habwa o,’ yiluk, abwa en ayup yarusogom,” yiluk, yuknugu higi.

²⁰ Yuknugu lagama, ane ambi iri dugwit: “Hit mbogot vaga agipik menda, henadenggen umbutu dogones! Hit Ala aburi ake denek inim, Sek Wene yugeregek lagu lagagup lakbigigigi inim, navi-navi inim, it o kota Babel yien hit anggin okbugugu lagagwa ako Ala en owak ndilogo onggo okbigas atma, henendawi adenggen umbutu dogones,” yiluk, iris ako naruk hunggis.

²¹ Hunggu lagirik, nil neyagek, malaikat anye werek ambi wagya lagarik, helep ombok legego is laut yanggadekma wombabagya higi. Wombabagya dugwit, “Naninis en helep wombabagi yi wane-wane, o kota ombok Babel anderogoat ogo legego wombabagya neyalok, o nggenam valek welagagi henendawi obak arisogon.

^22-23 Hit o Babel agipik yi, avakwa o yi awi ndi awi onggo hunisagwi menda, ininis dek hegek ovara, ap hit menda andi adigat ininis werek inigis. Eke, henabimoga vaga avakwa ininis unggul adik-adik menda ovok erogo yugeregek lagu dugwit, nomaliniviluk lagu sigis. Anderogo ogagu lagupikmu, nggindar ane ogagwi inim, ndawi viyanggwis inim, ane ombok ogasiga seruling o, trompet o, ogagwi inim, o kota andoma en ane ogarit lagwi hunggu lagep ako ambi inim hulusogombuk. Yo beras yangganggu dugwit ane wulup iris, hwa agasogo isagu dugwit, enadenggen en nane-hane yugwi, ogasagwi ako, o andoma ambi inim enaruk hulusogombuk. Yi ap ndi ap en yi menda ndi menda ogarup ininggis anggat inim, hali abya yevedek inim, o andoma ambi inim inil hasogombuk,” yiluk, iris ako naruk hunggis.

²⁴ It Ala aburi adik denek inim, navi-navi inim, initugwa ako, eke, yi avakwa ndi avakwa wen vaga agarwik initugwa ovok erogo enamuya winggigi onggo it o kota andi vaga agarwik ako, ovok erogo dek okbisayogon.