Wahyu 17 - ALA WENE HIVIS DIRUP WATUGWA

Hwa yanenggek en ogagya hagagi wene

^1-2 Andi okbaluk, it malaikat eneyave 7 Ala aninis nudik 7 vagago welagao ako, aswe ambi an nadema wagya higi. Wagya lagarik, yuknugu dugwit, “It avakwa o kota Babel is venak-venak huri wasigama o ugun valek ako andi, hwa yanenggek ovagak agarik. Eke, yi ap ndi ap ininis ombok en hwa yanenggek ako weyak okba wendagwi. Yi avakwa ndi avakwa wen vaga agarwik ovok erogo anggur agas nelok nenek yagan nelagwi hak, hwa ako bikha nungguguluk, nidi-hidi yagalagwi atma, At Ala en hwa ako weyak onggo ovaga horakbayogon ako hil hanok en, oma,” yiluk, yuknugu higi.

³ Higya lagirik, werekma, Ala Averiniki nendawima des iri lagama, malaikat en woknombolok harumu avakwa dekma andoma banilaga. Banilagya lagarik werekma, yangge do ovagak aninis werek is laut elola en daga waga ako, iris saup mudu ovagak, unggul 7, aruk adema aik 10 agarik ako, ambot vaga hwa ambi horaik higi. Ala wiyiknom-weyaknom erogo bagu dugwit, yagalagwi ako menda wisane yangge eyave ako vaga dirup warek higi.

⁴ Eke, hwa ako arogwesum mudu elokwe ndimbup-ndimbup agare ovagak inim, saup mudu ovagak inim, mondok eyave sek adigat yirik, eke, mbusi emas inim, helep enggen onggo ombok elose sek menda permata inim, mutiara inim, ogarek ako vaga ovok erogo ovaga dikduk ogagya higi. At weyak okhedegek landiga menda inim, “Ap en okneramanik,” ombasiga menda inim, ovok erogo sogolowak mbusi emas ogarek vaga is nudik hak hwa ako inggimu vagago higi.

⁵ Eke, hwa ako embet vaga wene adem hwilago menda ambi dirup warek yerogo higi: “Avakwa wen vaga menda weyak mbobo ugup hegek ugun ogarit lendagwi ako inim, it akwa yanenggek menda inim, ako inisa o kota ombok Babel andi, an aro,” yiluk, embet vaga dirup warek anderogo higi.

⁶ At hwa akoen, it Ala aburi ake denek inim, it Yesus ogagya lagagi wene mbobagetek mondok musek lendagwi inim, eneyave initu lagarik, enamuya anggur agas ovagak nelok, nenek ogagya higi. Higya lagirik, an Yohanes en “Wi!” nalon oknetas.

⁷ “Wi!” nalon imbita lagima, at malaikat woknombolok laga akoen, an yuknugu dugwit, “Hat nggarogo yiluk vok yagaliga? At hwa ako inim, at yangge do hak aninis werek unggul 7, eke, aik 10 ako ambot vaga hwa ako hora yiluk, wolok lagya hegen ako inim, iperen ogasagwi enawene mbauk hwilago agarik ako adem vagalogo yukhisogon.”

⁸ “Yangge do ovagak aninis werek hegen ako andi, endak welagagi ovara, dek agya lagarik, hivis, hambuluk lendagwima nggilin elola en daga warisogon. Daga warisogon ako, Ala en elokwe degerogo bagya hayogon. Eke, wen-mbogot ogagagi hudien mbuku mondok-mondok iniluk okbisaup ako it avakwa ininis mbuku ako vaga Ala en dirup watitek, o wen vaga ao hambegetek iniluk agarwik akoen, yangge do ovagak ako sigam ari wagya inil hugu dogomundik, it ogo, ‘Wi!’ yiluk ombarusogom. Andi, at yangge do ovagak ako endak welagagi ovara, dek agagi umbutugwa ovara sigam ari wagya inil hugu dogomundik, it ‘Wi!’ yiluk, ombarusogom.”

⁹ “Wene yukhirisogon yi ako andi, it ap enendawi werek en dibagu dogopwak. Yangge unggul 7 ako andi, ndom 7 atma, hwa andi vaga horaik hegen.

¹⁰ Eke, ndom 7 vaga hwa horaik hegen ako andi, ap ininis ombok eneyave 7 atma, eneyave 5 ako andi, vage enelokwe dek agagwa ovara, ambi ako andi, ao mendek agarik, eke, ambi andi, hivis mendek yisogon. Mendek iri dogomindik, ndugwis ambi dukluk, elokwe degat arisogon.”

¹¹ “Eke, yangge do ovagak aninis werek endak welagagi ovara, dek agagi ako andi, it ap ininis ombok eneyave 7 ako dek aguselok, enavoloma yangge it ako menda atma, ambi inim mendek iri dogomima, Ala en elokwe mondok degerogo bayogon.”

¹² “Eke, aik 10 hegen ako andi, it ap ininis ombok eneyave 10 aro. It ako, avakwa enavema dogopwak yiluk, ao andok okbigitek ovara, at Sile en avakwa it ap 10 ako enavema bisiluk, yangge ako inim un sidogat vagago inigik, mo il ambiat agya helan, andok okbisayogon.”

¹³ “Andok okbugu dogomima, ininis ombok eneyave 10 akoen enendawi ambiat okbaluk, yangge ako yugugu dugwit, ‘Hat nenasin inis ombok dogonyok yiluk, nenaori ninim havema dogosogom o,’ yiluk, yugurusogom.

¹⁴ Yugurugu dogomundik, Ndomba Eyak ako sovalogo baguluk, inim ndup awi wokbaluk sumburit lasogom. Sumburit lasogom ovara, Ndomba Eyak ako At aburi miginipu lagagirik, enayonggo bogogi inim des erogo ogarit lendagwi menda inim wunggu dugwit, yangge aori inim sovalogo bisayogon. Ndomba Eyak ako andi avakwa enasini ininis ombok inim, ininis werek inim, ovok erogo Enasin Inis Ombok Aratma, yangge aori inim sovalogo bisayogon,” yiluk, yuknugu higi.

¹⁵ Yuknugu lagarik, ambi inim yuknugu dugwit, “Is wandiga is venak-venak huri wasigama hwa yanenggek horaik agarik hegen ako andi, yi avakwa ndi avakwa ininis unggul adik-adik inim, enawi adik-adik inim, enagamut adik-adik inim, enane adik-adik inim, is wandiga hegen ako andi, it avakwa andiat inigin o.

¹⁶ Eke, it ap ininis ombok eneyave 10 ako inim, yangge ako inim en, ‘Hwa yanenggek yi, mondok nenanggon o,’ yiluk, hwa angge-angge dikduk ogarek ako nggolalogo hidugu dugwit, un agap mbedan hegek warogo baluk, inyu nin andi nunggwi, eke, nin andi, hali bagwi, ogarusogom o.

¹⁷ Anderogo hegen andi, At Ala en yagagi ako atma arupwak yiluk, Ala en enendawima mabogogi. Ala en enendawima mabogogi ako, it ap ininis ombok eneyave 10 ako, enendawi ambiat okbaluk, aori inim en yangge ako enasin inis ombok dogopwak yiluk, ‘Hat havema dogosogom o,’ yiluk, yugisogom. It yugisogom andi, Ala imbitigi ako adigat ogarit lagu dogopwak yiluk, Ala en enendawima mabogogi,” yiluk, yuknugu higi.

¹⁸ “Eke, hwa hegen ako andi, o kota ombok ako ovagak atma, yi ap ndi ap ininis ombok wen vaga agarwik ako ovok erogo at hwa yanenggek ako avema dugwit, at ane hulisagwi o,” yiluk, yuknugu higi.