Wahyu 16 - ALA WENE HIVIS DIRUP WATUGWA

Ala aninis sogolowak vaga nudik hagagi wene

¹ Andi ogagya ako higya lagirik, Ala awi valekma en ane ombok ambi it malaikat eneyave 7 ako yugirigya dugwit, “Ala aninis sogolowak 7 vaga nudik andi, wolok, avakwa wen vaga agarwik akheramu, enovaga ndilogo wombabisa wambilales,” yiluk, yugirigya ako naruk hunggis.

² Yugirigya lagama, at malaikat ambien Ala aninis sogolowak vaga nudik ako, wolok wen vaga ndilogo wombabagya higi. Ndilogo wombabagya lagama, it avakwa yangge inis enembet vaga dirup warek ako inim, at agut wakhegek inis siyabelagwi ako inim, ovok erogo himbis ombok edup en enovaga ndan iri lagama, avakwa en agoda wisane yugu sigis.

³ Malaikat en Ala aninis sogolowak vaga nudik ako ndilogo wombabagya lagama, aswe ambien sogolowak vaga nudik ako is ombok laut yanggadekma ndilogo wombabagya higi. Ndilogo wombabagya lagama, is ako ap nggorak enamuya ovagak agya dugwit, is endawima yi menda ndi menda iniluk agarwik ovok erogo hambit lagu sigis.

⁴ Malaikat mberen akoen Ala aninis sogolowak vaga nudik ako, mondok ndilogo wombabagu lagaoma, aswe ambien sogolowak vaga nudik ako wolok is landigama inim, iliris wulu wandigama inim, ndilogo wombabagya higi. Ndilogo wombabagya lagama, is andi ovok erogo muya ovagak agya lagama,

⁵ at malaikat is vagago agarik akoen iri dugwit: “Endak welagagin, yogak agindik, Hat Nasin Ala Hadik Denek Sek Adigat dugwit, mondok heyave atma nggedok ogasiga atma, it weyak ogagao enowak ndilogo onggo haninis enovaga bisaliga yi andi, segat ogagya heyagi o.

⁶ It Hat Ala haburi hake denek inim, navi-navi inim, enamuya wilogo initugwa ako, onggo avakwa enamuya yi, is ovagak nunggu dogopwak yiluk, okbigin atma, segat ogagen o,” yiluk, iri higi.

⁷ Iri lagama, Ala ake warogo hali hunisagwima akomaen ane iri dugwit: “Wene andi, avyarat yagas. Hanye Wisane Adigat Agindik Nenasin Ala Harat. Avakwa ogasagwi enowak dinggu dugwit, onggo mondok wane-wane atma nggedok adigat okbisaliga atma, avyarat yagas o,” yiluk, iris naruk hunggis.

⁸ Malaikat eneyave 3 akoen Ala aninis sogolowak vaga nudik ako ndilogo wombabagu lagaoma, ambien sogolowak vaga nudik ako mo il vaga ndibagas. Ndilogo bagya lagama, mo ako edup wisane agya dugwit, mo edup en avakwa yagal inivit lagya dogopwak yiluk, anye okbagya higi.

⁹ Okbagya lagama, avakwa yagal inivit lagya halok, iren yugu dugwit, “Edup-mbedup yerogo okbininaliga atma, nenomaduk mbobaluk, Ala inis siyabagu dogosogom o,” yiluk, yup sek ovara, hegek, enasam hegetek, enomaduk enendawi hunik okbetaluk dugwit, at edup-mbedup okbisaliga vagago agarik Ala ako inis wiyiknom-weyaknom erogo bagu sigis.

^10-11 Eke, it malaikat eneyave 4 akoen Ala aninis sogolowak vaga nudik ako avakwa enovaga ndilogo wombabagu lagaoma, aswe ambien sogolowak vaga nudik ako yangge do ovagak ako wene yugeraligama akoma ndilogo wombabagya higi. Ndilogo wombabagya ako higya lagirik, nil neyagek, yangge ako avema bisaligama andoma o hwis iri lagama, at avema dugwit, ane welagwi menda ako, aup edup ombok enovaga agya, womak edup ombok enovaga ndan iris, oginipas. Oginipas ako, edup en enaik enabya yaun hivitu dugwit, “Nenomaduk mbobasogom o,” yiluk, mbobaup sek ovara, hegek, enomaduk enendawi hunik okbetaluk dugwit, Ala mbogot vaga agarik ako inis wiyiknom-weyaknom erogo bagu sigis.

¹² It malaikat eneyave 5 akoen Ala aninis sogolowak vaga nudik ako sogolowak enadik-enadik ndilogo wombabagu lagaoma, aswe ambien sogolowak vaga nudik ako is ombok inis Evarat vaga ndilogo wombabagya higi. Ndilogo wombabagya lagama, is ako betlaga. Is betlaga andi vaga it ap ininis ombok mo il wulu wandigama en warupwak yiluk, enarup yagago bugu higi.

¹³ Higya lagirik, nil neyagek, duk ovagak madis agoda werek eneyave henggam wulu wagu sigis. Duk ovagak ambi andi, mbas ombok awigovak ovagak ako elagapma en wulu wagya, duk ovagak ambi, yangge do ovagak aninis werek ima en wulu waga ako elagapma en wulu wagya, eke, duk ovagak ambi andi yangge do ovagak hivis wen elola andenam en daga waga ako huluk wene molalogo yugeraliga menda ako elagapma en wulu wagya, ogagu sigis.

¹⁴ It duk ovagak enelagapma en wulu wagao ako andi, madis Sile aori atma, avakwa enamusek warupwak yiluk, nggarogo ogarubuk menda ogarit lagu sigis. Eke, it yi ap ndi ap ininis ombok o wen vaga agarwik ovok erogo At Ala ako inim ndup sumburuguluk homari warupwak yiluk, it duk ovagak ako andi yonggo lagu sigis. Homari wagu dogomindik, At Anye Adigat Agarik Ala avakwa enowak ndilogo okbisaup hudi ako vaga, ndup sumburuguluk ogagu sigis.

¹⁵ Andi higya lagirik, Nenasin en yuknugu dugwit, “Dibas! An ap onggop waliga ovagak mbikit supuk erogo warisogon atma, avakwa ombokma en henagap mbedan nagu hiniselok, henanggadi agu hinisaoen, henova hwalogo dogones. Henasum mondok nggetalogo yikbetaluk, An nabyam werekma, An wagya neyalok, henendawi adenggen okhinipu hagup o,” yiluk, yuknugu higi.

¹⁶ Eke, it madis duk ovagak akoen ap wen vaga ininis ombok ovok erogo o inis Iberani enane vaga Haramagedon akoma-at homakbisa wagu sigis.

¹⁷ Malaikat eneyave 6 akoen Ala aninis sogolowak vaga nudik ako mondok ndilogo wombabagu lagaoma, ambien sogolowak vaga nudik ako o ilim horok hena vaga yenam ndilogo wombabagya higi. Ndilogo wombabagya lagama, Ala wene yugeraligama Ala awi valekma en ane ombok ambi iri dugwit, “Ovok at weralogo ogagi,” yiluk, iri higi.

¹⁸ Iri lagama, o digavok mondok hunik-hunik ogagya, o unggulane sukup iris, o wadok mondok ombok ogagya, higi. O wadok andi, muk avakwa ogagagi hudien, waga-waga, yogak yi hudi mondok anderogo ambi ogasigadek ovara, o wadok mondok ombok wisane ogarit wagya dugwit, wen mondok avut ende-vanden ogagya higi.

¹⁹ Anderogo ogagya ako higya lagirik, werekma, o kota ombok ako wen mondok nggagalagya dugwit, henggam etap higitlagya, eke, yi awi ndi awi wen vaga kota-kota ako ovok erogo mondok ilumukmut erogo dek okbagya, ogagya higi. Ogagya hegek, At Ala en, “O kota ombok Babel ako andi, at weyak ogasiga onggo anggur agas nudik hak An naninis nudik ako, yogak at ovaga ndilogo baliga,” yiluk, ndilogo wombabagya higi.

²⁰ Ndilogo wombabagya hegek, is enggema wen hudi mbalekma inim, ndom-ndom inim, ovok erogo dek agya higi.

²¹ Dek agya hegek, o musu hol es salju ombok-ombok adigat anggin wakhigya dugwit, 40 kilogram hak mbogot vaga en avakwa enovaga wombabalin adigat wagya lagama, mondok iya erogo hambit lagu sigis. Hambit lagu dugwit, “Musu hol es salju vaga ninirisiga yi, Ala nenanggon o,” yiluk, Ala inis wiyiknom-weyaknom erogo bagu sigis.