Wahyu 15 - ALA WENE HIVIS DIRUP WATUGWA

Atok vaga edup-mbedup okbugu hagagi wene

¹ Andi okbaluk, hivis mbogot vaga andoma ninilup arup enalon werek menda mondok eve iya erogo ogagya higi. Ogagya dugwit, malaikat eneyave 7 en atok vaga avakwa edup-mbedup oginivupwak yiluk, adwanggak adem 7 vagago inigis. It malaikat 7 yien avakwa edup-mbedup oginivupwak yiluk, adwanggak adem 7 enovaga bisayogon ako, atok vaga okbisaup menda. Atok vaga okbisiluk, andien, Ala aninis ombasiga ako atok weralogo degat arisogon, higi.

² Higya lagirik, inamut ombok yanggadek laut ovagak ovara, elose wukagak ovagak, herek damok ogagya dugwit anggelekma en hali abya wunggu higi. Higya lagirik, werekma, avakwa inamut ombok yanggadek ako omban vaga mendek inigis. It avakwa akoen yangge endak daga waga ako inim, agut wakhegek huvuwak ogarek ako inim, ininis siyabagetek. Eke, at inis anomor ininggis enembet vaga dirup warup ako wegetek dugwit, Ala inis adigat siyabagao akoen, inamut ombok yanggadek ako omban vaga mendek inigis. Nggindar ombok Ala en wogeraga ininggimu vagago dugwit, nggindar ako ane ogagwi,

³ ndawi watwis, ogagu sigis. Ndawi watu dugwit, ndawi Ndomba Eyak akoen yagagi inim, ndawi Ala ayeloman Musa en yagagi inim, watu sigis. Ndawi watao ako andi eyave yerogo: “Nenasin Ala hanye adigat agindik, Hat ogasiga ako andi, mondok eve iya erogo ogasiga, nggarogo ogarubuk menda ogasiga, yi avakwa ndi avakwa Enasin Hinis Ombok dugwit, mondok eyave atma nggedok adigat ogasiga.

⁴ Nenasin o, Hat hadigat sek adik denek atma, avakwa ovok erogo Hat hagayuk wutwis, Hat hinis siyabagagwi, ogarusogom o. Hat mondok atma nggedok adigat ogasiga ako, sigam asiga atma, yi avakwa ndi avakwa ovok erogo havema seve yi wakluk, hinis siyabagagu dogosogom o,” yiluk, ndawi watu sigis.

⁵ Ndawi watwis ako inugu lagirik, Ala ninim agarik ombarupwak yiluk, Ala awiravo valek mbogot vaga agarik ako, sup hurik higi.

⁶ Higya lagirik, akoma en malaikat eneyave 7 akoen avakwa edup-mbedup okbisaup adwanggak adem 7 ako, wolok wulu wagu sigis. It ako sogwesum adup mondok mudu abya amumulip ogarek yirik, eke, mbup nggetalek obak mbusi emas vaga ogarek eneyave vaga yirik inigis.

⁷ Anderogo inugu lagirik, nil neyagek, it avakwa en iniselagwidek menda eneyave 4 ako ambien sogolowak mbusi emas vaga ogarek 7 akoma it malaikat eneyave 7 ako wogirigya higi. Sogolowak 7 ako At Ala iluk mondok itok adigat agarik aninis avakwa enovaga bisapwak yiluk, elagapaga erogo nudik higi.

⁸ Wogirigya lagama, Ala mondok anye wisane atma, eyave awiya wisane ogagya vaga en yuvuk wisane wunggu dugwit, Ala awi valekma akoma hobo iri higi. It malaikat eneyave 7 akoen edup okbisaup adwanggak adem 7 avakwa enovaga bisaup ako, atok weralogo okbigitek inigik, Ala awi valekma o mbogot vaga andoma avakwa nunggup degat agya higi.