Wahyu 13 - ALA WENE HIVIS DIRUP WATUGWA

Yangge do ovagak aninis werek ambi ogagya hagagi wene

¹ Andi ogagya higya lagirik, yangge do hak aninis werek ambi inamut ombok laut yanggadekma en wulu wagya higi. At yangge do hak ako andi, aruk adema aik 10, eke, unggul 7 hudi higi. Aik 10 ako vaga nggudit-nggudit sivovo ovagak mendarek ovok yirik, eke, unggul 7 ako vaga Ala inis wiyiknom-weyaknom erogo bagao menda ovok erogo dirup warek higi.

² Yangge do ovagak aninis werek ima en wulu wagya higi eyave ako andi, yangge harimau ovagak. At isok andi, ombok wam beruang isok ovagak, eke, elagap ako andi, yangge singga elagap banerek ako ovagak higi. At mbas ombok awigovak ovagak akoen, “An nanye vaga ogarit lagya, an wene yugeraligama dugwit, wene yugirigya, ogagya dogonyok yiluk, ovok erogo hat hadigat handok okbagagi o,” yiluk, yugugu higi.

³ Yugugu lagarik, yangge unggul nin ako ao hegek, unggul ambi watu lagama, mondok hambigiluk ogagya higi. Mondok hambigiluk ogaga ovara, sek agya lagarik, it avakwa wen vaga menda ovok erogo, “Wi!” yugu dugwit, at adigat amusek lagu sigis.

⁴ Eke, mbas ombok akoen at yangge do hak ima en wulu waga ako, awene ovok yugigas atma, avakwa en mbas ombok ako at inis siyabagao. Eke, yangge ako ogo inis siyabagu dugwit, “Yangge yi ndatak ambi agarik mondok dek atma, sanien at inim ndup sumburup embetep? Mondok dek aro,” yiluk, at inis siyabagu sigis.

⁵ At yangge aninis werek ima en wulu waga ako siyabatigya dugwit, Ala wiyiknom-weyaknom erogo bagya, eke, avakwa enasin inis ombok dugwit wene yugirigya, ogagya dogopwak yiluk, saut 42 hudi nggao yigiluk, hekbagya higi.

⁶ Ogagya dugwit, yangge akoen At Ala eyave inim, at inis inim, at agarikmu inim, eke, it mbogot vaga agarwik menda inim, it ovok erogo at ane vaga wiyiknom-weyaknom erogo bisilin lagya higi.

⁷ It ap ininis unggul adik-adik inim, enane adik-adik inim, enagamut adik-adik inim, yi avakwa ndi avakwa ovok erogo at yangge akoen enasin inis ombok dugwit avema sovalogo bisapwak yiluk, mondok okbagya higi. Eke, at yangge akoen it Yesus aburi ake denek ako inim ndup sumbutu dugwit, inirit lagya dogopwak yiluk, mondok okbagya higi.

⁸ At Ala en o muk wen-mbogot yi ao bagetek dugwit, “It avakwa mondok-mondok iniluk okbisaup o,” yiluk, ininis Ndomba Eyak watugwa ako ambuku vaga dirup watigi. It avakwa ininis mbuku vaga dirup warekdek halok andi, it ovok erogo at yangge ako inis siyabagu sigis.

^9-10 “It heda maginivup denek halok heda maginipwis, hambupwak yiluk mbusiregowa vaga enarup denek halok, initwis, ogagu dogosogom o, yiluk, yagagi akoat oginivit lasogom atma, oginivit lagusigik, it Ala aburi ake denek akoen, enendawi hora yiluk, enendawi wadokdek dugwit, wugu dogopwak. “Henaruk werek a dek a? Henaruk werek halok, wene andi des erogoat hunggu dogones,” yiluk, yuknugu higi.

Yangge do ovagak adik ambien ogagya hagagi wene

¹¹ Andi okbaluk, hivis yangge do ovagak adik ambi wen elola en daga wagya higi. At yangge ako aruk adema aik andi, mberen ndomba aik ovagak ovara, ane andi, mbas ombok ane ako ovagak iri higi.

¹² Yangge endak inamutmu en daga waga ako awene yugugu lagama, yangge hivis ako wene anye menda yugigas ako wigya lagarik, it avakwa wen vaga agarwik ovok erogo yugeraga. Yugirigya dugwit, “Hiren yangge endak daga waga unggul ambi watu lagaoma, hambigiluk ogaga ovara, sek aga ako adigat inis siyabagu dogones,” yiluk, ane anye erogo yugirigya higi.

¹³ Eke, yangge hivis wen elola en daga waga ako nggarogo ogarubuk menda eve iya erogo ogarit lagya dugwit, avakwa ovok inivaga hali hunik mbogot vaga en wen vaga wombaba wagya higi.

¹⁴ At yangge endak daga waga ane yugigas vaga, yangge hivis akoen nggarogo ogarubuk menda iya erogo ogarit lagya dugwit, avakwa wen vaga agarwik ako Yesus amusek laguven yiluk, enambukmu inggya dugwit ane huluk yugirigya higi. Avakwa wen vaga agarwik ako enambukmu inggya dugwit, “Yangge hak ambi mbusiregowa vaga watao ovara, iluk aga ako, agut wakhegek huvuwak ambi ogarogo baluk, at adigat inis siyabagu dogones,” yiluk, it yugirigya higi.

¹⁵ Yugirigya lagama, yangge endak daga waga agut wakhegek huvuwak ogarek ako ane yupwak yiluk, yangge hivis akoen elagap agarero endawima vup erogo mabaup andok okbagarikmu, elagapma vup erogo mabagya higi. At agarero endawima vup erogo mabagya lagama, agut wakhegek ogarek ako ane werek agya lagarik, it avakwa at inis siyabagetek ako aninis en enarit lagya higi.

¹⁶ At yangge andien it ap ininis werek inim, ininis dek inim, ininggis werek inim, ininggidek inim, un agarwik menda inim, avakwa enayeloman onggo hunik menda inim, ovok erogo inilup agek ambi ininggis amotkan a, enembet vaga a, dirup warogo bogogi. Dirup warogo bugu lagarik, yugirigya dugwit,

¹⁷ “It avakwa andi, yangge endak daga waga ako, at inis a, ata at anomor a, eneyave vaga dirup warekdek halok andi, enangge onggo hunhidugwi, eke, yi menda ndi menda onggo mbalirugwi, ogagu dogop mondok moga o,” yiluk, wene mbilinogo yugirigya higi.

¹⁸ Yugirigya ako higya lagirik, at wene yuknigas akoen ambi inim yuknugu dugwit, “Wene mbilinogo yugirigya hegen ako andi, it ap enendawi werek en adigat sigam hugu dogosogom. At yangge akoen dirup watas ako andi, ap ambi inis anomor dirup warek 666 atma, it avakwa enendawi werek halok, ‘Nomor weyak andi, yiat higi o,’ yiluk, dibagu dogopwak,” yiluk, yuknugu higi.