Wahyu 12 - ALA WENE HIVIS DIRUP WATUGWA

Hwa inim, mbas inim, ogagu sogogi wene

¹ Ogagwi ako inugu lagirik, mbogot vaga andoma ninilup arup menda mondok iya erogo ambi ogagya higi. Higya dugwit, hwa ambi saut eyave vaga mendek werekma, sogwesum hak andi, mo il-at yirik, eke, unggul vaga nggudit-nggudit mendarek anggelekma dadiwap 12 hudi hunik higi.

² Hwa ako, avula werekma, eyak iluk agya lagarik, endakhedagiluk eduven yagan watya dugwit, na iri higi.

³ Na iri lagama, mbogot vaga andoma ninilup arup enalon werek menda adik ambi ogagya higi. Higya dugwit, mbas ombok awigovak ovagak ambi, agap mudu swa nggenak ovagak atma, eyave ambiat ovara, unggul 7. Unggul ako vaga aruk adema aik 10 yago higi, eke, unggul 7 ako vaga nggudit-nggudit sivovo ovagak mendarek ovok yirik higi.

⁴ At mbas ako agya vaga dadiwap mbogot vaga agarik ako nin mberen inigik, nin ambi agako higirogo ako vedalogo wema wombaba wagya higi. Higya lagirik, mbas ombok akoen, “Hwa ako eyak endaklagya halok, nayogon,” yiluk, hwa ako adema hanjalek welaga.

⁵ Hanjalek welaga ovara, at hwa ako eyak Ap-at endaklagya lagama, Avyak ako haurogo wolok wene yugeraligama At Ala adema ba inggya higi. Avyak ako yi avakwa ndi avakwa ovok erogo Enasin Inis Ombok dugwit ane anye vaga wene yugirigya dogosogon.

⁶ Eke, Avyak ako ba inggya lagama, isa ako, dogopim Ala en dikduk okbagarikmu harumu avakwa dekma andoma hoda lagarikmu, Ala malogo hegek, ndugwis 1.260 hari agya higi.

⁷ Anderogo ogagya higya lagirik, o mbogot vaga andoma ndup sumbutu inigis. At malaikat Mikael ako, aori malaikat menda inim, at mbas ombok awigovak ovagak ako, aori malaikat weyak menda inim, mbogot vaga andoma ndup sumbutu dugwit war-wat yugu sigis.

⁸ Ndup sumbutu dugwit, iren mbas ombok ako aori inim enanyedek erogo bugu lagarwik, “O mbogot vaga yoma dogop dek,” yiluk,

⁹ at mbas ombok ako aori inim haryogo wema mbombo bisa wagu sigis. At mbas ombok awigovak ovagak wombaba waga ako andi, o muk en yi avakwa ndi avakwa ovok erogo enambukmu dagasiga menda inis Sile ako andi, inis ambi Setan aratma, at aori inim ovok erogo mbogot vaga en haryogo wen vaga wombabisa wagu sigis.

¹⁰ Haryogo wombabisa wagu lagaoma, ane ombok ambi mbogot vaga andoma en iri dugwit: “At Ala ivaga nenaswei Ala aburi hutun-howam huluk wene enovaga bisaliga ako, vage wombaba wagarikmu, At Ala anye vaga Sile sovalogo baluk, aburi enagap wendatya, Nenasin Ala en it yi avakwa ndi avakwa ovok At avema bugu, At Abut denogo bagagi Keretus ako, Enasin Inis Ombok dugwit wene yugirigya, ogagu dogop vage amor ari waga yiat.

¹¹ It nenaswei Ala aburi ako andi, ‘Ninirup halok sek aro,’ yiluk, inugutek dugwit Sile aburi en initao, Wam Ndomba Eyak amuya winggigi ako enendawi andi vaga vanggabaluk dugwit, Yesus wene iri lagagi ako vagalogo yugeregek nagwis vaga, Sile sovalogo bagao.

¹² Hat mbogot inim, hit mbogot vaga agipik inim, henendawi adenggen umbutu dogones o. Eke, hit wen vaga agipik ako inim, is ombok yanggadek laut vaga agipik ako inim, hit ako andi, henanggelekma at Sile wombaba waga akoen, ‘An dek okbanup ako, o vage horok ari wandiga o,’ yiluk, aninis wisane en hit avakwa sali-vali erogo bigigayogon atma, Henabwa o!” yiluk, iri higi.

¹³ Eke, at mbas ombok akoen, “An wen vaga mondok-at mbo wombabani waga higi,” imbita lagarik, hwa ako amusek laga. At hwa eyak Avyak endaklaga akoat amusek laga.

¹⁴ Amusek lagya lagama, watya haoen, at hwa ako dogopim Ala en dikduk okbagarikmu harumu avakwa dekma akoma lapwak yiluk, Ala en swa erambongga amik ndatak, hwa ako, amik ombok werek okbagya lagarik, wigak-wigak yagan o akoma laga. O akoma lagya lagarik werekma, Ala en malogo hegek, tiga setengah tahun ogagya higi.

¹⁵ Eke, lagya hegek, is en hwa andi wolok lapwak yiluk, is nggut landiga hak, at mbas ombok ako elagapma en is suvurogo adoma lakbagas.

¹⁶ Lakbagas ovara, wen akoen hwa ako yonggat-higya dugwit, elagap bisak baluk, is ombok mbas elagapma en suvurogo lakbagas ako, wen elagap banerekma andoma wombabagya higi.

¹⁷ Andi ogagya lagama, at mbas ombok akoen hwa ako inim aninis ane iri lagarik, hwa ako eyagi nin inim ndup sumburi lagya higi. At hwa eyagi andi, At Ala en wene yukneraliga menda des erogo ogarit lendagwi inim, Yesus en vagalogo yugeragagi wene avyarat ombakluk musek lendagwi inim, at hwa eyagi andi it aro.

¹⁸ Eke at mbas ako andi, is ombok yanggadek laut omban vaga mendek yi lagya lagarik higi.