Wahyu 11 - ALA WENE HIVIS DIRUP WATUGWA

Ap mberen Ala wene yugurugusigik, initugwa wene

¹ Anderogo yuknugu ako higya lagirik, werekma, wanggun yo ilirangge ambi woknugu dugwit, “Ala awi valekma inim, Ala ake warogo hali hunisagwima inim, adup maren hudi yiluk, ilit okhelak. Eke, avakwa Ala awi valekma en inis adup ogasagwi akoma, eneyave hinggis dinggilivilak.

² Ogarit lagya dugwit, Ala awi valekma mbumbumu ako ilit ogarubuk. It avakwa weram Yakuri dek menda en o kota eve sek adik denek agarikmu akoma inisok sovalogo bisilin lagu dugwit, Ala awi valekma mbumbumu andoma inim sovalogo bigik lagusigik, saut 42 hudi nggao yup yiluk ogarogo bagarikmu, ilirangge ogarup moga.

³ Eke, it ap eneyave mberen An Ala nane vagalogo yugurugu dogopwak yiluk, lakbisayogon akoen enasum libilik weyak menda yirik dugwit, An Ala nane yugurugusigik, ndugwis 1.260 hari dogosogon o,” yiluk, yuknugu higi.

⁴ It ap eneyave mberen andi, yo saitun mberen hak, hali yevedogo bagek mberen ovagak, dugwit, Nenasin Inis Ombok yi menda ndi menda adem andok ako elokwema agarwik andi, it ap andi aro.

⁵ It ap mberen andi, enelagapma en hali wuluk yagan wulu wagya dugwit, it inim ogorek agarwik ako inirisagwi atma, “Ap mberen andi, inarusogom o,” yiluk, iniruguluk ogagusigik, it enelagapma en hali wuluk yagan wulu wagya dugwit, it inirup ogasagwi eneyave ako hali abya yevedogo hali nunggu sigis.

⁶ It ap eneyave mberen ako andi, enendawi hobaluk, “O hivi vaga wene yugurugu dogopim musu wambu warubuk,” yiluk, yuguselok, musu wagetek mbup iris, “Is yi, amuya aru,” yuguselok, amuya agya, eke, “O wen vaga yoma adwanggak wisane oklaru,” yuguselok, adwanggak wisane agya, anderogoat ogarit lagu dogopwak yiluk, ap mberen ako Ala en andok okbugu higi.

⁷ Higya lagima, At wene yuknugu akoen ambi inim yuknugu dugwit, “Wene yugurugu dogopwak yiluk, lakbisayogon ako hivis erogo yugeramundikmu, yangge do ovagak aninis werek ambi hambuluk lendagwima nggilin elola en daga warisogon. Daga wagya dogomindik, ap eneyave mberen ako hait enombolok enambetaga lagya dugwit, hivirinivisogon. Hivirinipu halok, hambugu dogomwima,

⁸ eneyave o kota ombok Enowa Inis Ombok yo winik vaga warogo bagagwarikmu sup ombok yago ako vaga, vidis agu dogopwak yiluk, hekbisasogom. O kota ombok ako, it nin wene atok lovarogo yugu dugwit, ‘O Sodom inim, o Mesir inim,’ yiluk, yagalagwima, akoma en eneyave hekbisasogom.

⁹ Hekbugu dogomundik, it avakwa ininis unggul adik-adik inim, enane adik-adik inim, enagamut adik-adik inim, yi avakwa ndi avakwa ovok erogo en, bigisa warusogom. Tiga setengah hari vaga wen sabisaup sek hegek ovara, ‘Hekbisines,’ yiluk, sabigitek dogosogom.

¹⁰ “Eke, it avakwa wen vaga agarwik ako en, ‘It ap mberen yien wene yuknirugu lagao vaga, nit edup-mbedup mondok wisane okbinilin nagu lagarwikmu, inyagot! Segat hombagao,’ yiluk, enadenggen hugwi, yi menda ndi menda unat wok-wok yugwi, ogarusogom o,” yiluk, yuknugu higi.

¹¹ Higya lagirik, nil neyagek, tiga setengah hari okbaluk, Ala en elagap agarero ap mberen ako enendawima mabugu lagama, iniluk akluk, mondok yagao. Mondok yugu lagaoma, avakwa inil welagao ako enendawi obak agu dugwit enalon wisane agu sigis.

¹² Enalon wisane inigik, mbogot vaga en ane ombok iri dugwit, “Dagamanes,” yugirigya lagama, enaruk hobaluk, it inim ogorek ako inil inigik, mbogot anggelekma hena vaga unggu sigis.

¹³ Ao unggusigik, o wadok ombok ogagya hegek, o kota andoma avakwa enawi wisane valek ako nin hekbagya, nin agako sepersepuluh higirogo masok-danggok erogo lagya, ogagya dugwit, avakwa ovok eneyave 7.000-at sopalinipu lagama, it nin hekbigas ako enalon en At mbogot vaga agarik Ala ako mondok siyabagu sigis.

¹⁴ Inugu lagirik, nil werekma, At mbogot vaga en ane iris ako ambi inim yuknugu dugwit, “Avakwa mondok anggin okbisaup menda ako andi, mberen vage ogagya hegen ovara, ambiat ako vage ogarigiluk ogagyama, hil dogwen,” yiluk, yuknugu higi.

Ane ombok ogasiga trompet 7 vaga ogagya dugwit, avakwa mondok anggin okbisaup henggam ako ambi hivis okbugu hagagi wene

¹⁵ Yuknugu halok, nil werekma, malaikat 6 akoen ane ombok ogasiga trompet ako ane ogagu lagaoma, ambi akoen trompet ako ane ogaga. Ogagya lagama, it mbogot vaga andoma en enane ombok yugu dugwit, “O wema andoma avakwa ovok erogo pemerintah enavema agarwik ako, At Nenasin Inis Ombok Ala inim, Arenen denogo mondok okbagagi Keretus inim, iperen enane hunggu dogoguluk, enavema ari wagao. Ari waguselok, Keretus akoen Enowa Inis Ombok dugwit, mondok-mondok wene yugirigya dogosogon o,” yiluk, yugu sigis.

¹⁶ Yugu lagaoma, nil neyagek, it mbogot vaga agarwik enanggok ap ombok-ombok eneyave 24 wene yugerelagwima kursi sek vaga Ala avema horaik agarwik akoen enelose Ala avema samup yi lagu lagarwik, siyabagao. Siyabagu dugwit, ndawi yerogo watao:

¹⁷ “Hat Hanye Hadigat Agindik Nenasin Ala, endak welagagin, yogak ovok agindik, Harat. Yogak Hat Hinis Ombok dugwit, Hat hanye wisane atma, avakwa ovok erogo havema bisiluk, wene yugirigya dogosogon andi vaga, nit ‘Wa, wa,’ yukhisagwi o.

¹⁸ Yi avakwa ndi avakwa ininis unggul adik-adik en, enaninis hugu dugwit, ‘At Nenowa Inis Ombok dogop nenanggon o,’ yiluk, yagan wagwi ako, haninis enovaga bugu, it hambit lagagwa ako enowak dilogo bugu, it hayelomani navi-navi inim, haburi hake denek ako inim, it hinis siyabagalagwi inim, ininis dek ininis werek ovok erogo, sek ogaguselok onggo wogirigya, eke, it o wen vaga andoma weyak erogo biselagwi ako, degerogo bugu, ogarup vage amot ari wagarikmu, wa,” yiluk, yugugu sigis.

¹⁹ Yugugu lagaoma, Ala awi valek mbogot vaga akoma sup hutlagya lagama, wene Ala en nggatuk erogo yugeragagi 10 hukum dirup warek yo peti ogarek vaga yidik agarik ako, sigam agya higi. Sigam agya hegek, o digavok ogagya, unggulane iris, o wadok iris, musu hol es salju mondok yuvulogombo wambu wagya, ogagya higi o.