Wahyu 10 - ALA WENE HIVIS DIRUP WATUGWA

Malaikat en mbuku maduk veralek wolok wagya lagagirik Yohanes wogogogi wene

¹ Ogasagwi ako an Yohanes en inugu lagirik, werekma, malaikat anye werek ambi, ayum hena vaga virik-verek ogarek mbogot vaga en wambu wagya higi. Unggul vaga andi, yuwaru danggulik. Elose andi, mo il ovagak, eke, isok andi, yo mot adup vaga hali abya wuluk-herek yagaliga ovagak iri higi.

² At inggimu mbuku virik-verek ogarek maduk ambi mbigabaluk higi. Isok amotkan is ombok laut yanggadek ako agakoma bagya, eke, isok hware ako wen vaga bagya, okbaluk,

³ yangge singga ane ndilun-nggolak yagaliga hak, ane ombok anderogo iri lagama, o unggulane elap 7 hudi ogagya ako naruk hunggis.

⁴ O unggulane elap 7 hudi iris naruk hobaluk, yagas ako dirup warigen yiluk ogagyaim, mbogot vaga en ane ambi yuknugu dugwit, “O unggulane elap 7 hudi iri hegen ako andi, dirup warubuk. Ata, hendawima adigat hwilakbaluk dogwen,” yiluk, yuknugu higi.

^5-6 Yuknugu lagama, nil neyagek, malaikat isok ambi is ombok laut agakoma bagya, ambi wen vaga bagya, okbaluk, mendek higi akoen, mbogot inim, mbogot vaga agarwik inim, wen inim, wen vaga agarwik inim, is ombok laut yanggadek inim, is ombok laut yanggadek endawima agarwik inim, eve ovok erogo ogagagi mondok itok iluk agarik ako inis hanum mbanggya dugwit, “Ala en anggin okbisaup andi, epimbo ogarisogonbuk. Mbikit ogarisogon!” atma, avyarat ombarupwak yiluk, inggis amotkan mbogot vaga ilikbagya higi.

⁷ Higya lagirik, malaikat akoen ambi iri dugwit, “It malaikat eneve 6 en ane ombok ogasiga trompet ako ovok enane ogagarwikmu, ambi 7 ako, trompet ane ogagya halok, wene mbauk hwilago Ala en At ayelomani navi-navi yugeragagi ako, atma arisogon o!” yiluk, iris ako naruk hunggis.

⁸ Naruk hunggu lagirik, werekma, mbogot vaga andoma en ane ambi yuknugu higi akoen ambi inim an Yohanes yuknugu dugwit, “Mbuku warek ako hedelak. At malaikat isok venak wen vaga bagya, venak is ombok yanggadek laut vaga bagya, okbaluk, mendek agarik ako adema lagya dogomindik, mbuku warek inggimu mbigalek agarik andi, hedelak.”

⁹ Yuknugu lagama, malaikat ako adema lagya lagirik, “Mbuku maduk andi, wokniru,” yugugu lagima, at malaikat akoen woknigas. Woknugu dugwit, “Hidigya dogomindik namin. Ninggya heyagek, helagapma nggin amburup ovagak ai hayogon ovara, halotma andi, eda arit lagya hayogon,” yiluk, yuknugu higi.

¹⁰ Yuknugu lagama, mbuku maduk malaikat inggimu agarik ako vakbaluk ninggya neyagek, nelagapma nggin amburup ovagak ai weyak higi ovara, nalotma andi, eda arit lagya higi.

¹¹ Mbuku ako an Yohanes ninggya lagima, mbogot vaga ane yuknugu higi akoen ambi inim yuknugu dugwit, “Avakwa ininis unggul adik-adik inim, enagamut adik-adik inim, enane adik-adik inim, ap ininis ombok inim, yi avakwa ndi avakwa wisane, hivis oginivisogon wene andi, yugirigya dogwen o,” yiluk, yuknugu higi.