Wahyu 1 - ALA WENE HIVIS DIRUP WATUGWA

¹ At Ala en yi ogarup ndi ogarup vage ogarup wene ako, yi aro. Wene yi nit At ayelomani ninilup arupwak yiluk, Ala en Nenowa Inis Ombok denogo mendok okbagagi Yesus Keretus ako yugugu lagagimu, Aren vagalogo yukneraliga yi aro. Ala en Yesus Keretus yugugu lagagimu, Ala ayeloman an Yohanes ako nilup okbanupwak yiluk, Yesus Keretus en At ayonggo malaikat ambi wombaba wagagi.

² Eke, malaikat wombaba wagagi akoen, an yuknugu lagagimu, Ala wene Yesus Keretus en vagalogo yuknugu hagagis ako ovok erogo mbilinogo dirup watis yiat.

³ Anderogo atma, wene yi ogarup ako vage horok ari wagarikmu, it avakwa en hivis ogarup wene dirup warek yi, bikhegek mbilinogo yugurugwi, eke, yugurugusigik, enaruk hobaluk, des erogo wugwi, ogaguselok, Ala en adenggen enovaga bugu dogosogon.

Yesus aburi 7 gereja vaga homarisagwi ako wa yugeragagi wene

^4-5 Wa. An Yohanes en hit Yesus aburi o Propinsi Asia 7 gereja vaga homarisagwi ako, wa yukheraliga. Nenasin Ala inim, Averiniki inim, At Yesus Keretus inim, it ovok erogo enendawi henabwa en okbugugwis, eke, henendawi ugun seyalek wadokdek adenggen dogovovok yiluk, okbugugwis, ogagu dogopwak. At Ala andi, endak welagagi, yogak agarik, hivis dogosogon mondok itok agarik. Eke, Ala Averiniki andi, At andogon adem 7 ogasiga ako Ala ane yugeraligama avema agarik. At Yesus Keretus andi, avyarat wene adigat mondok des erogo vagalogo yugeraliga menda arat. At Yesus Keretus ako hambuluk lendagwima en At endak iluk akluk mendek iri lagagirik, yogak it ap wen vaga menda enasini ininis werek menda ako Enasin Inis Ombok agarik. At nenabwa en endawi hunik okninipigi. At amuya vaga nenomaduk visilogo bininggigi.

⁶ Eke, nit avakwa At avema dugwit, imam-imam hak At Asin Ala ake ogagu dogoguluk, denogo bininggigi. Anderogo okbininggigirikmu, At anye wisane atma, nit yi ovok erogo At inis adigat siyabagwi, At ane adigat hunggwis, mondok-mondok ogagu dogosogom o, yiluk, amin!

⁷ Dibagu dogones! At Yesus hena anggelekma wagya halok, it avakwa o wen vaga agarwik ininis unggul adik-adik At watugwa ako menda inim ovok erogo enadik-enadik inil hugu dogomundik, yup yarusogom atma, avyarat yukheraliga o. Amin.

⁸ Endak welagagi, yogak agarik, hivis dogosogon At Anye Adigat Agarik Nenasin Ala en iri dugwit, “O endak erogo welagagis adem Alpa inim, eke, hivis atok vaga mondok dogop Omega inim, andi An aro,” yiluk, yagaliga.

Yohanes o Vatmos dugwit, abi hagagi wene

⁹ Hit anggin-mbanggin henovaga bugugusigik ovara, “Ala avema bininggigi atma, sek aro,” yiluk, Yesus hinim hunik henendawi wadokdek dugwit, welagwi. An henaswe Yohanes ogo, anderogo wane-wane anggin-mbanggin okbanunggusigik, wigya lagagis. Andi, anen Ala wene yukhirigya, eke, Yesus wene iri lagagi ako vagalogo yukhirigya, ogasiga ako vaga, ilim is enggema o inis Vatmos bani wagagwa andoma welagagis.

¹⁰ O andoma werekma, samban vaga Ala Averiniki nendawima des iri lagagimu, nambukmunggan en ane ombok ogasiga trompet ako ovagak ane ombok iri naruk hunggis.

¹¹ Hunggu neyagek, yuknugu dugwit, “Hivis ogarup inuk hugu neyagek, mbuku virik-verek vaga dirup waru. Dirup watya dogomindik, it Ala aburi o Evesus inim, Simirana inim, Veragamus inim, Siyatira inim, Saridis inim, Viladelipia inim, Laodikia inim, 7 gereja vaga homarisagwi ako ovok erogo bikhapwak yiluk, lakbisin,” yiluk, yuknugu hunggis.

¹² Naruk hunggu lagirik, “Saen yuknisiga,” yiluk, eyave nil hagiluk, nelokwe endenogo bikhigya lagirik, hali yevedogo bagek 7 mbusi emas vaga ogarek higi.

¹³ Eke, hali yevedogo bagek 7 ogarek ako anggelekma ilim andenam avakwa enelose ovagak ambi higi. Ap ako andi, asum adup unggumu en isokmu hudi yirik, eke mbup nggetalek mbusi emas menda eyave vaga yirik higi.

¹⁴ At iris andi, swa yanggwi iris mudu ako ovagak higi. At il andi, hali abya wuluk-herek yagaliga ovagak higi.

¹⁵ Eke, At isok andi, mbusi tembaga halima mabaguselok, mudu dede erogo yiklagarikmu, amumulip wisane ogasiga hak, isok anderogoat amumulip wisane higi. At ane andi, is satut ane ndun yagaliga ovagak, anderogoat iri higi.

¹⁶ At inggis amotkan dadiwap 7 vagago higi. Mbusinggarep erasul ovagak venak-venak ovat marek elagapma sisik erek, eke, At elose andi, mo abya ovagak, amumulip wisane ogagya higi.

¹⁷ At eyave anderogo ogarek higya lagirik, an Yohanes nggorak ovagak At avema ndun yi lagi. Ndun yi lagirikmu, At inggis amotkan vaknitya dugwit, “Endak erogo welagagis inim, hivis atok vaga mondok dogop inim, andi An atma, halon habuk.

¹⁸ Niluk Nitok Agirik andi An aro. Yokneyan! An endak hombagagis ovara, yogak andi, niluk mondok-mondok agirik. Hambisagwi inim, Hambuluk Lendagwima inim, adem mberen andi An nadigat vagago dugwit, sup hurisagwi hunsi vagago agirik o.”

¹⁹ “Anderogo atma, An hali yevedogo bagek 7 ogarek ako anggelekma ogarit lagya hil hegen inim, yogak ogasiga hil haliga inim, eke, hivis ogarup hil hayogon inim, ovok erogo dirup warogo bagya dogwen.

²⁰ Dadiwap 7 ninggis amotkan vagago neyagen ako inim, eke, hali yevedogo bagek 7 mbusi emas vaga ogarek hegen ako inim, andi wene eve hwilago agarik atma, adem des erogo yukhisogon: Dadiwap 7 ako andi, it malaikat 7 An naburi 7 gereja vaga homasagwi malenombogo agarwik akoat inigin. Eke, hali yevedogo bagek 7 ako andi, An naburi 7 gereja vaga homasagwi akoat inigin o,” yiluk, yuknugu higi.