Vilemon 1 - ALA WENE HIVIS DIRUP WATUGWA

¹ An Paulus Yesus Keretus wene yugeregek landiga vaga heda maknitugwa ako, nenaot Timotius niperen en, hat nenaswe Vilemon ninim nenendawi hunik dugwit, ninim Ala eyavup ogasagwi ako,

² nit nenarup hwa Apia inim, nenaswe Arikipus anggin-mbanggin hegek Ala eyavup ogasiga ako inim, Ala aburi hat Vilemon hamwa homasagwi menda inim, ovok erogo wene ambi dirup warek yi vaga yukherelagwi o.

³ Nenasin Ala, Nenowa Inis Ombok Yesus Keretus iperen henabwa en okbugugwis, henendawi ugun seyalek adenggen dogovovok yiluk, okhinipwis, ogagu dogopwak o.

Vilemon ogagagi vaga Ala, “Wa!” yugogogi wene

^4-5 Naswe Vilemon wai. Hat hendawi Nenowa Inis Ombok Yesus ovaga vanggabaluk avyarat ombasiga inim, it Ala aburi adik denek ovok erogo hendawi hunik oginivisiga inim, havok an naruk hulisiga atma, samban ogagya dugwit, hat vaga nape wenggelek dugwit, o ndugurek-ndagarek, Nenasin Ala, “Wa,” yugisiga.

⁶ Hit Yesus avyarat umbutu dugwit Ala aburi hinim henendawi ambiat dambubaluk, Keretus ninim hunik dugwit sek menda okbininaup ombasiga ako, ovok erogo hinilup arovovok yiluk, henake samban ogasiga.

⁷ It Ala aburi adik denek hendawi hunik okbugu dugwit, enendawi aik wakbigik lagya vaga nendawi hora okbaninggigindikmu, naswe nendawi adenggen wisane haliga.

Onesimus wapwak yiluk yugogogi wene

⁸ Anderogo atma, an Howa Keretus ninim hunik dugwit, hat ambi ogarup higi ako, ogagya dogonyok yiluk, nane anye erogo yukhirup sek ovara,

⁹ hat an nendawi hunik atma, nane seve erogo yukhirisogon o. An Paulus ako ap ovok nanggok agirik. Eke, Yesus Keretus wene yugeregek landiga vaga heda maknitugwa yogak yoma dugwit,

¹⁰ an nabut Onesimus hat hayeloman onggo hunik menda ako avok yukhisogon. An lembaga yoma heda mago dugwit, at an nabut ovagak agagirikmu,

¹¹ endak, hat heyavup ogarup meyan welagagi ovara, yogak andi, hat ogo, an ogo, ninim ogarup sek adigat agya higirikmu yiluk, yukhisiga.

¹² Yogak avyak yi eyami vaga hat hadema lakba wandiga ovara, at an mondok nendawi malek hegek lakba wandiga.

¹³ Sek wene yugeregek lagya lagagis ako vaga an heda marogo banunggugwa yoma werekma, at hat havoloma an yonggat-nitya dogop mbup okbaup sek imbiti ovara,

¹⁴ hat handok werek en, “Yu, sek. Hiperen dogones,” yuknigitekma, an napedimot en at ninim dogop yup meyan. Ata, an nendawi hogop andi, hat handok werek hendawi en yinok yiluk, lakba wandiga. Ovara, hat hendawi en, “Nanggon,” imbita heyagek, anen nane anye erogo yukhirup andi, nanggon.

^15-16 Eke, yogak at hadema wandiga ako andi, ap enayeloman onggo hunik menda ovagak hadema wandigadek. At Onesimus endak winggigi ako andi, un sidok hekbagaluk winggigi ai? Eke, yogak andi, hat haswe hiperen henendawi hunik adigat dogoguluk wandiga atma, mondok-mondok hinimat dogopwak yiluk woman. At niperen andi, nenendawi mondok hunik ovara, hat hayeloman onggo hunik menda atma, eke, at ogo, Keretus inim endawi hunik dugwit, hadema warisogon atma, naswe, hekbabuk.

¹⁷ Andi halok, hat niperen ndatak avyarat umbutugurikmu, ‘Naswe Paulus aro,’ yiluk, an wokneraup ombasiga ako ndatak, at Onesimus woman.

¹⁸ Endak Onesimus hinim dugwit, weyak ambi okbagagya, hangge ambi wigya, ogagagi halok, at yugurubuk. Ata, mbalegangge ambi werek halok, an novadombok atma, anat yuknirup.

¹⁹ “At Paulus en yugigitek hegek dirup watas o,” nimbita heyaoen, “An Paulus enat onggo wokhirisogon,” yiluk, wene ambi andi, an nadik ninggis vaga dirup warogo wokhisiga. An Sek Wene yukhogogis vaga hendawi avyarat imbitigin ako andi, nomarangge hak hovaga werekma, ambi yi inim hovaga bagaup ndak ovara, hekbagaliga.

²⁰ Ai, naswe. Yukhigis andi, niperen Ala inim hunik atma, an sek okbaninok yiluk, Onesimus woman. Niperen Keretus aburi atma, nendawi adenggen erogo okbaninok yiluk, yukhisiga o.

²¹ An dirup wasiga yi ako adigat hat ogagya dogonyok yiluk, yukhisigadek. Ata, nin hat hendawi en hobaluk ambi inim ombok erogo ogagya dogosogon avyarat himbita dugwit dirup wasiga.

²² Wene yukhisiga andi, ogagya dugwit, hit nake samban ogasagwi Ala en aruk hobaluk, an heda mago werekma heda visilogo hit henadema bani warisogon avyarat ombasigama, wakluk nogo yup o kamar ambi wererogo baninggya dogwen.

Hivis atok vaga heyaga wakbagagi wene

²³ Ap Epaveras Yesus Keretus wene yugirigya lagagi ako vaga heda marogo bagagwa yoma ninim dugwit, aren hat Vilemon wa yukhisiga.

²⁴ Eke, it naori ninim ogasagwi ako, Markus ogo, Aritakus ogo, Demas ogo, Lukas ogo, nit ovok erogo wa yukhisagwi o.

²⁵ At Nenowa Inis Ombok Yesus Keretus henabwa en okbugugu dogopwak o. Wa!