Titus 3 - ALA WENE HIVIS DIRUP WATUGWA

Ala aburi halok ogagu dogop wene

¹ Avakwa en it enasini pemerintah menda inim, it ap o vagago agarwik inim, enavema dugwit, enane hunggwis, eke, sek ogarup ambi werek agya halok, “Ogagu dogosogom o,” umbutwi, ogagu dogopwak yiluk inilup erogo yugirigya dogwen.

² Ap ambi wiyiknom-weyaknom erogo bagwi, war-wat yugwi, ogagu dogobuk. Ata, enendawi sagain vaga dugwit, yi ap ndi ap ovok erogo enendawi sovalek vaga woginipu dogopwak yiluk, yugirigya dogwen.

³ Nit ogo, muk anderogo ndatak, wes ovagak werekma, wene yuknirugwi ako hunggitek, sup adikmu nomalogo lagwi, ap ambi ayeloman yugugu halok, “E o,” yiluk, ogasiga andi hak, nit nenendawi ninggya halok ogarup nenendawi hogop ombasagwi ako adigat ogagwi, ogagu lagagup. Yi menda ndi menda ogarit lagu dugwit, weyak adigat ogagwi, naburuk-haburuk yugwi, naninis-haninis yugwi, andi menda adigat ogagu lagagup ovara,

⁴ nenagap wendarisiga menda Ala en yi avakwa ndi avakwa enabwa en sek okbininaup ako, sigam ari wagya lagagirik,

⁵ nenagap wendakninipigi. Nit sek ogagu lagagup vaga nenagap wendakninipigibuk. Ata, At aigwak aberen nit Yesus avyarat ombasagwi menda ako nenendawi weyak horogo baluk, swi endarogo bininggu, Averiniki en nenendawi swi erogo okbininggu, ogagagi andi vaga nenagap wendakninipigi.

⁶ At nenagap wendarisiga menda Yesus Keretus vaga Ala en Averiniki ndun erogo wokneragagi.

⁷ At Ala nenabwa en okbininggigi vaga, “Wene enovaga bisaup dek o,” yiluk, wokninipu lagagirik, ap ambi asin eyase hedaliga hak, nit niniluk mondok-mondok dogop nenape wenggelek ako hedaguluk, Averiniki ndun erogo wokneragagi.

⁸ An wene yukhisiga yi, avyarat. It avakwa enendawi Ala ovaga vanggabaluk, avyarat ombasagwi ako enendawi dibaluk, yi yavup ndi yavup sek menda ogagu dogopwak yiluk, an yukhisiga yi, ndugurek-ndagarek hane anye vaga yugirigya dogwen. Avakwa ovok erogo “Wene yi, sek aro,” yiluk, welagwi vaga sek ambi okhedaup atma, yugirigya dogwen.

⁹ Ap wes ovagak inunggut dugwit wene onggo-onggo yugwi inim, ap enadem mbilinggwis inim, Musa wene warek vaga, “Yerogo-nderogo,” yugu dugwit wunumuk yugwi inim, andi ogarit lagu dugwit, atok vaga andoma ambi okhedaup dek hegek un enam warogo yugusim, hekbaup.

^10-11 Ap ogot bisaliga menda akoen eve wene hekbaluk, weyak adigat ogarit lagya vaga weyak onggo ovaga horabetagas hegek, ogarit landiga hilup atma, elap mberen vaga aruk wakbaluk, hekbaup.

Wene atok vaga yugogogi wene

¹² An o soges ogasiga mbeda o Nikopolis andoma dogop imbitirikmu, anen ap Aretemas a, ap Tikikus a, ambi lakba wagya neyalok, andoma werekma, hat hodorogo nadema warinok yiluk, ogagya dogwen.

¹³ Ap Apolos ako inim, wene amburup mbalisiga menda ap Senas ako inim, hodorogo lakbisa wagya dugwit, it enangge-enangge dek halok, wogerano.

¹⁴ It nit menda andien, avakwa enangge dek halok, okbugu dogopwak yiluk, yavup sek erogo ogarup mamulhidugu dogopwak. Andi ogaguselok, enggen yigitek dogosogombuk o.

¹⁵ It ap ninim agurik ovok erogo an ninim en “Wa,” yukhisagwi o. Eke, it Yesus Keretus avyarat umbutu dugwit, enendawi hunik okbininalagwi hinim agipik andoma ovok erogo “At Paulus en ‘Wa,’ yukheraga o,” yiluk, yugerano. Ala henabwa en okbugugu dogopwak o. Nabut wa!