Titus 2 - ALA WENE HIVIS DIRUP WATUGWA

Modo wene halok adigat mamulirigya dogop wene

¹ Hat halok andi, Ala aburi Yesus ovaga vanggabaluk nggarogo ogagu dogop modo wene ako ndatak mamulirigya dogwen.

² It ap enanggok andi, enendawi suam watwis, enovavut sek agwi, enendawi werek agwi, it enendawi Yesus avyarat ombasagwi ako wadokdek welagwi, anderogo ogagu dogopwak yiluk, yugirigya dogwen. Avakwa ovok erogo avyarat enendawi hunik okbugwis, eke, anggin enovaga agya halok enendawi wadokdek dugwit, wugwi, ogagu dogopwak yiluk, yugirigya dogwen.

³ It akwa enanggok andi, yi menda ndi menda ogagu dugwit, Ala agayuk wutu dogopwak yiluk, ap enanggok yugeraup yukhigis ako ndatak yugirigya dogwen. Enabis adup okbaluk wolok-wolok ane yagan nagwis, amburup nenek oginivisiga menda enagaum erogo nunggwi, anderogo ogagu dogobuk. Ata, eve wene halok adigat mamulirugu dogopwak yiluk, yugirigya dogwen.

^4-5 Avakwa en Ala wene wiyiknom-weyaknom erogo bagu saoen, it akwa ndugum akoen enaguni inim, eneyagi inim, enendawi hunik agwi, enendawi werek agwi, avakwa enabwa en sek okbugwis, enawi sek erogo vagenombogo welagwi, akwa enendawi sek adigat dugwit, enaguni enavema seve yiluk, enane hunggwis, ogagu dogopwak yiluk, it akwa enanggok akoen akwa ndugum mamulirugu dogopwak.

⁶ Eke, it apsawe andi, anderogo enendawi werek dogopwak yiluk, enaruk watya dogwen.

⁷ Avakwa hat vaga il wakhegek ogagu dogopwak yiluk, hat yi ogagek ndi ogagek ogagya dugwit, sek adigat ogarit lagya dogwen. Ogarit lagya dugwit, wene mamuleraliga ako, ugun hat hane inim hondalogo mamulirigya, hagayuk dek enda wene adigat yugirigya, ogagya dogobuk.

⁸ Ata, hat wene yugirigya dugwit it ap hane waup “Nenanggon,” ombasagwi akoen, ‘Hat wene weyak yagas,’ yiluk, nenavok yusogombuk atma, it enanggadi arupwak yiluk, hane sek adigat yugirigya dogwen.

⁹ It avakwa enayeloman onggo hunik menda ako andi, enasini en yugurugwi ako, enavema seve yiluk, enane hobaluk, wene onggo yugeregetek iniselok, enasini enendawi hunik dogopwak yiluk, yugirigya dogwen.

¹⁰ It avakwa enayeloman ako andi, enasini enangge enonggop wugu dogobuk. It ako andi, yi ogagek ndi ogagek ogagu dugwit sek ogarit lagwi vaga avakwa nin akoen, “Nenagap wendarisiga menda Ala wene wasogom,” ombarupwak yiluk, “Henasini enangge wegetek segerogo dogones,” yiluk, yugirigya dogwen.

¹¹ Andi, Ala nenabwa en okbininaliga wene ako, avakwa enagap wendarupwak yiluk, it ovok erogo enake sigam agagi.

¹² Sigam agagirikmu, wene andi vaga Ala en, “Hit o wen vaga yoma dugwit Ala henalon embetetek weyak ogasagwi inim, wen vaga ogarup henendawi ninggya inim, ovok erogo hekbaluk, henendawi werek akluk, weyak ogagetek sek adigat dugwit, Ala wene wokbaluk ogarit lagu dogones o,” yiluk, yukneraliga.

¹³ Yukneraligama, yogak ogagu dugwit, Nenasin Ala Inis Ombok nenagap wendarisiga menda Yesus Keretus, mondok abinak werek dugwit sigam ari warup ako vaga nenendawi vonggabaluk wenggelek werekma, nenadenggen vaga abyam agurik.

¹⁴ Nit yi weyak ndi weyak ogasagwi ako ogagu dogoguven yiluk, At Yesus ako nit avyarat ombasagwi menda nenonggo mbalogo heda visibininagiluk, At eyave wogeragagi. Eke, “An naburi nake denek dugwit, sek ogarup enendawi sek vaga ogarit lagu dogopwak,” ombakluk, nenomaduk horogo bininigiluk, nit nenake At eyave wogeragagi.

¹⁵ Yi wene ndi wene yukhisiga yi, yugirigya dogwen. Ala en hat yavup yi handok okbagagagirikmu, hane anye vaga enaruk watya, enanggadi watya, ogagya dogwen. Eke, ap ambien hat sovalogo bagaup meyan.