Titus 1 - ALA WENE HIVIS DIRUP WATUGWA

¹ Nabut Titus wai. An Paulus Ala ayeloman Yesus Keretus en lakbigik menda baninggigi akoen wene ambi yukhisogon o. It avakwa Ala en miginipigi ako enendawi Yesus avyarat ombakluk des erogo wugwi, eke, avyarat wene ako wokbaluk, enendawi eve vaga ogarit lagwi, ogagu dogopwak yiluk, lakbigik menda baninggigi.

² Avyarat wene nit nenendawi Yesus ovaga vanggabaluk, avyarat umbutu niniselok, niniluk mondok-mondok dogosogom o, Ala en yagagi ako, okninivupwak yiluk, nenendawi vonggabaluk wenggelek agurik. Ala huluk yagaligadek avyarat adigat yagaliga akoen, “Iniluk mondok-mondok dogosogom o,” yiluk, o yi ao wakhegetek hegek, hologo bagagi ako, o muk erogo hologo bagagi ovara,

³ “O andi hudi sigam asogon,” imbitigi ako nenagap wendarisiga menda Ala en, “Paulus An nawene yugirigya dogopwak o,” yiluk, yavup ninggimu baninggigi ako avakwa wisane yugirigya vaga, sigam asiga.

⁴ Ai nabut Titus wai. Niperen Yesus avyarat ombasagwi ako vaga hat nabut agagindikmu, wene yi yukhisogon. Nenasin Ala, nenagap wendarisiga menda Yesus Keretus Ala en denogo lakba wagagi ako iperen habwa en okhitwis, hendawi ugun wadokdek adenggen dogonyok yiluk, okbagagwi, ogagu dogopwak.

Titus o Kereta dugwit, ogagya dogop yugogogi wene

⁵ An ogagetek baluk wagagis ako hologo bugu, eke, o kota adik-adik Ala aburi enasini dogopwak yiluk, “Ap andi menda mondok okbisaup,” yukhogogis ako mondok okbugu, ogagya dogonyok yiluk, hat o Kereta hekbagaluk, an wulu wagagis.

⁶ Ala aburi enasini dogopwak yiluk mondok okbisaup ako andi, avakwa en weyak ogagetek iniselok enane enovaga biselagwidek halok, enogwa ambiat wogo halok, enaburi avyarat ombasagwi halok, avakwa en, “Ap andi aburi en ugun-ugun ogarit nagu dugwit, inisai-enasini enane hulisagwidek ovara, enaruk watitek ayai!” yagalagwidek halok, adigat mondok okbisaup sek.

⁷ It ap Ala aburi vagenombogo dogop ako andi, Ala eyavup ogasagwi atma, weyak ogaguselok avakwa enane enovaga bisaguven, sek adigat ogarit lagu dogopwak o. It ombasagwi adigat ogarup umbutwi, enaninis mbikit agwi, amburup nenek oginivisiga menda enagaum erogo nunggwi, war-wat yugwi, avakwa enayoparip hedaguluk, yewes okbugwis, ogasagwi halok, ap andi menda mondok okbisabuk.

⁸ Ata, ap enagania isaguselok, sek ogarup enendawi hunik umbutuselok, enendawi werek halok, atma nggedok ogaguselok, Ala wene wokbaluk sek adigat ogaguselok, ogarup agya hegek ovara, enendawi yunggubaluk, mbup yuguselok, ap andi menda mondok okbisaup sek.

⁹ Avyarat wene Yesus avok mamulik ako, it ndatak nggitik-nggetok erogo vagago iniselok mondok okbisaup sek. Vagago dugwit, wene adem Ala aburi vagago dogop modo wene andi vaga avakwa enendawi aik wakbugu dogopwak. Eke, it nin modo wene ako waup enanggon ombasagwi halok, wapwak yiluk, ambi inim enaruk watu dogopwak.

¹⁰ Ap enane, “E o,” yiluk, hunggitek dugwit, enane amburup nditik yagan nagwis, avakwa enambukmu unggwi, ogasagwi andi, it eneyave wisane ovara, it Yakuri menda ninen huluk wene yugurugu dugwit, ‘Henagap wendarupwak yiluk, henagamut mbales,’ yiluk, yagalagwi menda andi, eneve iya iren ogo anderogo ogarit nelagwi.

¹¹ It ap andi, wene mamulup dek menda mamulirugu dugwit, ap enabur-enogwa wisane inim enendawi avut dagauk-bagauk oginivit lendagwi. Eke, it avakwa enangge hedaguluk, enanggadi arup menda hegek, ogasagwi. Anderogo atma, it enane mondok degerogo bugu dogwen.

¹² Ap navi Kereta menda ambien iri dugwit: “It ap o Kereta menda andi, mondok enane huluk yagalagwi menda aro. Yangge edup en ap ugun hivirinivisiga hak, it anderogo dugwit, enanggatek en enovadek agarwik o,” yiluk,

¹³ yugeragagi ako andi, avyarat yagagi. Anderogo atma, it huluk wene musek lendagwi andi, Yesus Keretus wene avyarat umbutugwa ako mondok wadokdek vagago dogopwak yiluk, hane anye vaga enaruk watya dogwen.

¹⁴ Eke, Yakuri menda enarivit mbilinisagwi wene inim, it ap avyarat wene hekbaluk, enendawi ugun wenggelogo, “Yerogo ogarup, nderogo ogarup,” yagan nelagwi wene ako inim, “Dibaup moga,” yiluk, hane anye vaga enaruk watya dogwen.

¹⁵ It avakwa enendawi sek adigat dugwit weyak ombasagwidek, Averiniki enendawima yi sek, yi weyak, yugirigya hegek ogasagwi halok, yi menda ndi menda Ala en “Naup moga dek,” yiluk, yagagirikmu, it huluk wene yagalagwi menda en, “Naup moga,” yugusigik nungguselok, enendawi weyak asigadek. Sek aro. Eke, it avakwa Yesus avyarat embetetek weyak adigat ogasagwi halok andi, it ambi nano vaga enendawi sek okhedabuk. It ogarup enendawima wenggelisagwi inim, enendawi ombasagwi inim, andi weyak adigat dogosogon.

¹⁶ It ap huluk wene [‘Henagap wendarupwak yiluk, henagamut mbalup,’ eke, ‘Andi naup moga,’] mamulerelagwi menda andien yugu dugwit, “Ala ninilup,” yagalagwi ovara, it ogarit lendagwi vaga en, “Ala nenanggon,” umbutu dugwit, yagalagwi, yiluk, yedok iniselagwi. Ala wene hunggitek sovalogo baik lagu dugwit, sek ambi ogasagudek weyak adigat ogasagwima, alonedok werek iniselagwi.