Pilipi 4 - ALA WENE HIVIS DIRUP WATUGWA

Ogagu dogopwak yiluk enaruk watigi wene

¹ Anderogo atma naswei o. Hit an nendawi mondok hunik atma, heneyave mondok nape wenggelek-at agirik. An nanggudit-nggudit mendago inim, nendawi adenggen ombasiga inim, andi, hit heneyave atma, Nenowa Inis Ombok hinim hunik dugwit, wene andi mondok wadokdek vagago dogones. Ai, naswei nendawi hunik wa!

² Hit akwa Eyodia ogo, Sindike ogo, hiperen Nenowa hinim henendawi hunik dugwit, henendawi ambiat dambulik dogovovok yiluk, yukheraliga.

³ Eke, hat naswe Sundugos ogo, niperen Ala eyavup ndatak ogasagwi menda atma, it akwa mberen andi, yonggar-inipu dogwen. It akwa andi, ap Kelemen ogo, it an naswei nin Ala eyavup ninim ogasagwi ako ogo, Sek Wene wigalarupwak yiluk, ninim musek-hasek ogarit nagu lagagwa atma, Ala ambuku it avakwa mondok-mondok iniluk okbisaup ininis dirup warek agarik ako, it ogo ininis ovok dirup warek agarik.

⁴ Nenowa inim hunik dugwit, henendawi adenggen adigat umbutu dogones. An ambi inimat yukheraliga: henendawi adenggen umbutu dogones!

⁵ Nenowa Inis Ombok eyave horok ari wagarikmu, it avakwa ovok en, “Enendawi sagain vaga avakwa sek okbisilin nagu sugup o,” yiluk, henombarupwak yiluk, ogarit nagu dogones.

⁶ Anggin nano menda ambi henovaga agya halok, henendawi anggin habuk. Ata, “Anggin anderogo novaga aga o,” yiluk, samban ogagwi, eke, hit ambi ngga menda dek halok, okbigigapwak yiluk, “Ala wa,” yiluk, nggino yugugwis, ogagu dogones.

⁷ Andi ogagu hiniselok, nenendawi anggin dek ugun seyalek adenggen dogoguluk, okbininaliga menda adem nit yedok hegetek ninigik ovara, okbininggik adigat ogasiga Ala akoen, Keretus Yesus hinim henendawi hunik atma, hit henendawi des erogo malhenombogo dogosogon.

⁸ Naswei o. Wene atok ambi yi inim yukherayogon. Avyarat menda halok, eyave widao menda halok, atma nggedok ogasagwi menda halok, weyak dek menda halok, enane ai yagalagwi menda halok, sek helagwi menda halok, yi menda ndi menda ovok erogo avakwa en “Wi,” yiluk, siyabelagwi menda halok, andi menda adigat henendawi wenggenggu dogones.

⁹ An wene mamulhirigya neyagek, wugu lagagup inim, iri neyagek henaruk hunggu lagagup inim, ogagya neyagek hinil neyagu lagagup inim, ako ovok erogo ogarit nagu dogones. Eke, nenendawi ugun seyalek adenggen dogoguluk, okbininaliga Ala ako enat hinimat dogosogon.

Ala aburi o Pilipi menda en Paulus yonggat-hagagwa vaga wa yugeragagi wene

¹⁰ Hit endak an henape wenggelnetetek welagagup ovara, yogak andi an henape wenggelagya hinigu lagirik, Nowa Inis Ombok niperen hunik dugwit, nendawi mondok segat agirik. Endak an un henape wenggelek welagagup ovara, yonggat-neyaup ao agetek halok, mbuverek welagagup atma yiluk yukheraliga o, naswei.

¹¹ An yi menda ndi menda ovok erogo novaga agya hegek, nendawi sek wadokdek dogop mamulhedagagis atma, an ambi hogop en nggino yukherayogonbuk.

¹² An ninggis werek halok, dek halok, andi nilup-at agirik. An erom nagaum agya, uvup oknitya, andi ogo nilup-at. Eke, nangge wisane agya, nangge dek agya, yi menda ndi menda sek-weyak ovok erogo novaga agya hegek, nendawi sek wadokdek dogop mamulhedagagis.

¹³ Keretus niperen hunik dugwit, nanye okbaninggya hegek, yi menda ndi menda sek-weyak ovok erogo novaga agya ako hegek, ogarup segat haliga.

¹⁴ Ogarup segat haliga ovara, an anggin novaga werekma, hiren yonggat-neyagagup atma, “Wa,” yukheraliga o.

¹⁵ Hit avakwa Pilipi menda yi wai. An endak Sek Wene yi awi ndi awi yugeregek nagu dogogiluk, o Makedonia hekbaluk o adikmu lagya neyagek, Ala aburi homasagwi ako, yonggat-yonggat ogasagwi ovara, it ovok erogo mbuverek inigik, hit Ala aburi o Pilipi en adigat woknogogup ako hinilup aro.

¹⁶ An o Tesalonika neyagek, hiren ndugwis mberen vaga woknogogup ako ogo nilup-at agirik.

¹⁷ Henangge ambi woknerovovok yiluk, an nggino yukheregetek neyagek, woknugu lagagupmu wogogis ako andi, Ala en hivis onggo ombok wokherapwak yiluk, yo enggen yilin landiga hak, hit anderogoat enggen ombok yikhidugu hinisaigen yiluk, wogogis.

¹⁸ Hit wokniri wagagup ako, ovok erogo wogogis atma, dek agetek agarik. Hit an nake bago ap Epavoroditus en woknirupwak yiluk lakbani wagagup ako, wokniri wagya lagagimu, wigya lagagirik, agako higirogo bagetek ao dek agetek agarik. Ala ake bago hali hunggusigik amben sek halok Ala en, “Sek woknigao,” yiluk, endawi adenggen ombasiga hak, hit woknogogup ako anderogoat Ala endawi sek ombasiga.

¹⁹ Hit yi menda ndi menda ambi dek halok, Keretus Yesus ogagagi vaga nin agako higirogo Nasin Ala en wokhirigya dogosogon.

²⁰ “Nenasin Ala inis mondok-mondok siyabagu dogosogom o,” yiluk, avyarat yukheraliga o. Amin.

Atok vaga wa yugeragagi wene

²¹ Ala aburi adik denek Keretus Yesus hinim hunik agipik ako hit ovok erogo wa yugurugu dogwes. Eke, an naswemuni ninim yoma agurik akoen wa yukherelagwi o.

²² Ala aburi ake denek o yoma agarwik it ovok erogo en wa yukhirugusigik, eve iya erogo andi, ap inis ombok Kaisar amwa agarwik menda en wa yukherelagwi.

²³ Nenowa Inis Ombok Yesus Keretus henabwa en okbugugu dugwit, hinimat dogosogon o. Wa.