Pilipi 3 - ALA WENE HIVIS DIRUP WATUGWA

Keretus ovaga vanggabaluk, avyarat umbutu niniselok, Ala en wokninivisiga wene

¹ Naswei o. “Henowa Inis Ombok inim hunik dugwit, henendawi sek adigat dogones o,” yiluk, wene atok vaga yukheraliga andi aro. An endak dirup warogo wokheragagis ako wane-wane, hivis warogo wokheraup nanggon ombasigadek. Hit henendawi wadokdek dogovovok yiluk, warogo wokheraup segat ombasiga.

² It ap yangge do ovagak weyak adigat ogasagwi ako, henadoma wagu dugwit, “Henagamut mbales,” yiluk, yukhera wagu saoen, dibaluk henendawi suam watu dogones.

³ “Nit neneyave anderogo okbinunggugwa,” yiluk, nenendawi andi vaga vanggabaluk, agurikbuk. Ata, Ala Averiniki en nenendawima dugwit, Ala inis siyabagwi, Keretus Yesus ninim hunik dugwit wa yugugwis, ogasagwi ako andi, Ala aburi nenagamut mbalek ovagak nit aro.

⁴ It ninen, “Nit nenagamut mbalek menda agurik,” andi vaga enendawi vanggabaluk, ombasagwi ako andi, horogat okbogogwa hegek ombasagwi. Eke, an andi, Yakuri enandogon ogasagwi menda eve iya erogo okbanunggugwa atma, nendawi andi vaga vanggabaluk, dogop segat ovara, “Andi vaga ambi okhedaup dek,” imbita lagirik hekbagagis ako yerogo:

⁵ An endago neyagek nogo 7 yikbaluk, 8 vaga nagamut mbanggugwa. Neyave andi, Iserali menda-at endaklagagis, ninis unggul andi, Mbenyamin menda-at agirik, hinya-nasin ogo, Iberani menda-at. Eke, Musa wene dirup watigi ako an des erogo ogagya dugwit, Varisi menda-at welagagis.

⁶ Wene andi ako, nendawima en idi okhidigya dugwit, Ala aburi homarit nelagwi ako anggin-mbanggin ogarogo bisilin lagya lagagis. Sek okhedagiluk, Musa wene wane-wane ogasagwi ako, an ogo wane-wane-at ogagya lagagis atma, avakwa en enane novaga banenggetek-at welagagwa.

⁷ Andi vaga an ambi sek okhedagiluk, okhidigya lagagis ovara, yogak Keretus eyave hidigya lagagirik, “Wene endak ako, enam warogo ogarit nagu lagagis higi,” yiluk, hekbagagis.

^8-9 Eke, ambi inim, an Nowa Inis Ombok Keretus Yesus nilup arup andi mondok iya atma, “Yi menda ndi menda ogagya lagagis ako ovok erogo enam warogo ogagya lagagis higi,” imbita lagagirik, Musa wene wane-wane ogagya lagagis ako vaga Ala en an woknavup andi degat haliga. Ata, Keretus avyarat ombasagwi vaga Ala en nit sek erogo wokninivisiga ako menda, “Vage wokhitirikmu, Keretus hendawi hunik heyaliga o,” yuknirupwak yiluk, Keretus hidigya lagagirik, an yi ogagek ndi ogagek ogagya lagagis ako ovok erogo, “Yi nombabuk-at higi,” yiluk, mbo hagagis.

^10-11 At Keretus inim, eke, Keretus nenavoloma hambigya lagagimu, Ala anye vaga iluk erogo mondok okbagagi ako inim, “Dibetaik ai,” ombasiga. Eke, an hambuluk lendagwima en niluk erogo mondok okbanupwak yiluk, At Keretus endawi sagain hegek, anggin-mbanggin ovaga baluk, watu lagagwama, hambigya lagagirik iluk agagi ako hak, an ogo anderogo okbanup segat ombasiga.

Hupuk lagu dugwit, hedelaup wene

¹² An vage nendawi anderogo modo okbaninggya, eke, wene yagan wagi ako ovogat okbaninggya, ogagya higirikmu yiluk yukheraligadek. Ata, Keretus Yesus en okbanigiluk vaknitigi ako, “At andiat hedayogon o,” yiluk, an nelokwe amor-amor-at musek landiga.

¹³ Aren okbanupwak yiluk, vaknitigi ako andi, vage okbaninggigi atma yiluk, ombasigadek, naswei. Ata, an endak ogagya lagagis ako, nggolalogo nambukmunggan hekbaluk, swi menda hedaup okbaninggigi ako, hedelagiluk ogagya dugwit,

¹⁴ Keretus Yesus ogagagi vaga At Ala niperen mbogot vaga dogogiluk, nayonggo baninggigi ako adigat nelokwe amor-amot okbaluk hupuk-at, amusek landiga o.

¹⁵ Hit henendawi vage modo agya halok ninim anderogoat wene andi adigat dibagu dogosogom. Eke, hit nin anderogo ombasagwidek halok, hit anderogo umbutu dogovovok yiluk, Ala enat sigam erogo okbigigayogon.

¹⁶ Ovara, nit yogak wene ako ndatak erogo ogasagwi halok andi, mondok anderogoat ogarit lagu dogosogom.

¹⁷ Naswei-narupwi. An ogasiga hak, hit wane-wane ogagu dogones. Eke, henaswemuni ninen nit ogasagwi hak ogaguselok, hinil des erogo dombalinipu dogones.

¹⁸ An endak wene hunogo ambi inim dek, ako adigat yukhirigya lagagis ako, yogak ambi inim yup yagya dugwit yukheraliga: it ap nin wisane akoen, “Keretus yo winik vaga hombagagi wene waup nenanggon,” umbutu dugwit, enendawi adik wenggelit lendagwi atma, it Ala inim ndup-at agarwik o, yiluk, yukheraliga.

¹⁹ It ap andien wen vaga menda adigat wenggenggwis, enagaum ake adigat okhedegek lagwi, enanggadi arup hegek nit iya atma yugwi, ogasagwi ako atok vaga it eneyave-at dek arusogom ovara,

²⁰ nit andi, nenawi adem mbogot vaga atma, nenagap wendarup Nenowa Inis Ombok Yesus Keretus mbogot vaga en, “Hodorogo omanik ale, ai,” yiluk, abyam agurik o.

²¹ Wambu wagya dugwit, At anye vaga yi menda ndi menda ovok erogo At avema dogopwak yiluk, sovabisiluk agarik ako vaga, nit neneyave vidis asiga menda yi, nggolalogo baluk, avoloma At agamut mondok adik swi menda akoat yikbininayogon o.