Pilipi 2 - ALA WENE HIVIS DIRUP WATUGWA

“At Keretus endawi sovalek dugwit ogagya lagagi hak, hit anderogo ogagu dogones,” yiluk, yugeragagi wene

¹ Nit Keretus ninim hunik atma, Aren nenendawi aik wakbininggu, At nenabwa imbita dugwit, nenendawi yonggon-ninipu, ogagya hegek, Averiniki ninim hunik dugwit, nitnirat nenendawi enggen vaga nendawi-hendawi hunik ogasagwi.

² Andi halok, an nendawi adenggen ambi inim hagiluk, hit anderogoat henendawi ambiat okbaluk dugwit, Keretus endawi hunik okhinivisiga ako hak, henaswemuni hinim nendawi-hendawi hunik ogagwi, henendawi ambiat dambulik dugwit ogarup ambi wenggebaluk ogagwi, ogagu dogones.

³ Hit yi menda ndi menda ogagu dugwit, ambi hedaguluk okbugwis, eke, “Siyabanupwak,” umbutu dugwit ogagwi, anderogo ogagu dogobuk. Ata, henendawi sovalek dugwit, “An andi, meyan, eke, naswe andi, iya,” umbutu dugwit, anderogoat oginipu dogones.

⁴ Hit henadigetap hogop ombasagwi andi adigat wenggenggu dogobuk. Ata, henaswemuni hogop ombasagwi ako inimat wenggenggu dogones.

⁵ At Keretus Yesus ovavut welagagi ako hak, hit ogo henovavut anderogoat dogones.

⁶ At Keretus ako andi: Ala endawi agarik ovagak, Keretus endawi ndatak-at welagagi ovara, “An Ala niperen agurik yi, ndatak-at dogosogon o,” yiluk, imbitigibuk.

⁷ Ata, At endawi enat sovabatigya lagagirik, “Avakwa enayeloman ovagak okhedayogon o,” yiluk, nit avakwa ovagak endaklagagi.

⁸ Endaklagya lagagirik, nit avakwa ovagak nagu dugwit, yo winik vaga andi, hambup dek hegek ovara, endawi sovabetaluk, “Hambup sek aro,” yiluk, Asin endawi imbitigi wane-wane, hombagagi.

⁹ Anderogoat ogagya lagagimu, At Ala en mondok winimen-at ilik bagagi. Yi avakwa ndi avakwa ovok erogo ininis sovalek inigik, At adigat inis werek dogopwak yiluk, mondok siyalek agarik atma,

¹⁰ it mbogot vaga menda inim, wen vaga menda inim, wen avema menda inim, it ovok erogo, At Yesus inis yugu dugwit, avema seve yiluk, agayuk wutwis,

¹¹ eke, avakwa ininis unggul adik-adik ovok erogo, At Nenasin Ala inis siyak yupwak yiluk, “Yesus Keretus andi, Nenowa Inis Ombok aro,” yiluk, ombokma en vaganggwis, ogagu dogopwak yiluk, siyabagagi.

Hali abya ovagak yevedek dogop wene

¹² Anderogo atma, naswemuni nendawi hunik. Endak hit ninim andoma dugwit, an nane iri lagagis wane-wane ogagu lagagup ako hak, yogak neyave yoma neyagek, “Ala en nenagap wendarisogon o,” yiluk, henalon en henowak dede yugu dugwit, ovok atok weralogo ogagu dogones.

¹³ At Ala en sek ogarup endawi ombasiga ako, hirenen, “Ogarup,” ombasagwi inim, eke, eyave ogasagwi inim, At Ala adigenat okbigigaliga.

^14-15 It avakwa o yogak endago agarwik yi enovavut amor erogo dek enendawi weyak adigat wenggelisagwi atma, hit it enanggelekma dadiwap herek-damok yagaliga hak dugwit, Ala aburi weyak dek sek adigat hinigik, enane hit henovaga agetek ogarit nagu hinisapwak yiluk, hit yi menda ndi menda ogagu dugwit, uwa mba-mbal yugwi, wunumuk yugwi, ogarubuk.

¹⁶ At Keretus warup amor ari wagya andi vaga, “An vupuk lagya, an nova dambi-dambe oknitya hegek ogarit lagya, ogagya lagagis ako andi, enam warogo ogagya lagagibuk, segat ogagagis ai,” imbita dugwit, nadenggen hagiluk, wene niniluk okninivisiga wene ako, hit des erogo vagago dogones.

¹⁷ Hit avyarat umbutu dugwit heneyave ovok Ala wogokluk, At ake ogarit lendagwi ako andi, Ala ake warogo wogisagwi hak atma, segat. Eke, an ogo Ala ake inim, hit henake inim, ogagya neyagek, an vage narup imbita dugwit, anggur agas Ala ake yiluk ndilhelagwi hak atma, andi ogo segat ombasiga. Andi halok, hit hinim nenendawi adenggen wisane agurik.

¹⁸ An nendawi adenggen ombasiga hak, hit wane-wane henendawi adenggen umbutu dogovovok yiluk, yukheraliga o.

Timotius Epavoroditus enavok mbilinogo yugeragagi wene

¹⁹ Hit nggarogo agipik ako dibigiluk yukniri wagya halok nilup agya dogomindik, nendawi ugun seyalek dogogiluk, Nenowa Yesus en sup hutbagya halok, Timotius yiluguluk bikhinisa warupwak yiluk, henadema lakba warup ombasiga.

^20-21 It avakwa yoma ovok erogo Yesus Keretus adigat ake ogarit laup, ombasagwidek, it enake adigat okhedegek lagusigik ovara, at Timotius adik andi hit nggarogo agipik ako, mondok avyarat heneyave ape wenggelek atma, arat lakba warisogon.

²² Ap ambi abut en asin yonggat-haliga hak, an Sek Wene yugeregek lagya neyagek, at hutun-howam yonggat-nitya lagagi andi vaga, at andogon hinilup atma,

²³ nggarogo yiluk okbanup nawene yagalagwi ako, nilup agya dogomindik, yiluguluk henadema lakba warisogon ombasiga.

²⁴ Eke, an ogo, vage bikhinisa warup Nasin Ala en sup hurogo banisogon avyarat ombasiga ovara,

²⁵ wagetek neyagek, yonggat-neyapwak yiluk naswe Epavoroditus hit lakba wagep ako, eyami vaga henadema lakba wandiga. At ako andi, Ala wene wigalarupwak yiluk, anggin-mbanggin hegek ninim Ala eyavup ndatak ogasagwi.

²⁶ At akoen, “An aup idup oknetas naswemuni vage hunggarwikmu, nggarogo numbutusigik dogogwisen, biginisa laik ai?” yiluk, endawi anggin higya lagirik, at endak henadema lakba wandiga.

²⁷ At aup idup en avyarat hambigiluk ogagagi ovara, Ala abwa imbita dugwit, sek okbagagi. At adigat abwa imbitigibuk. At aup idup ogagagi ako vaga an ogo nendawi ambi inim anggin dugwit, wakhidigya dogogwisen, nendawi seyalek dogogiluk, sek okbagas.

²⁸ Anderogo atma, henadema wagya halok, henendawi adenggen vaga hai warogo wugu hiniselok, an nendawi anggin agirik ako, seyalek dogogiluk, yiluguluk henadema lakba wandiga o.

^29-30 At henadema wagya halok, “Nenaswe Keretus iperen hunik ako nenadema wandiga yi o,” yiluk, henendawi adenggen vaga hai warogo womanes. Hit okbanup umbutugup ako meyan atma, aren henavoloma yonggat-nitya dugwit, “Keretus ake ogarit lagya dugwit, hambup ogo segat,” yiluk, eyave idi okhedegetek hambilip ovara. Eke it ap anderogo menda ambi henadema waguselok, hai warogo woginipu dogop o.